សៀមរាប៖ ដើម្បីជំរុញវិស័យវិនិយោគនៅខេត្តសៀមរាបឱ្យកាន់តែល្អប្រសើរថែមទៀត ក្រុមអ្នករកស៊ីមួយក្នុងខេត្តសៀមរាប បានរៀបចំជំនួបពាណិជ្ជកម្មរវាងអ្នកវិនិយោគកម្ពុជានិងសិង្ហបុរី ក្នុងបំណងដើម្បីផ្លាស់ប្ដូរ ចែករំលែក និងស្វែងរកឱកាសវិនិយោគនៅខេត្តមួយនេះ។ ក្លឹបប្រតិបត្តិករទេសចរណ៍ខេត្តសៀមរាបបានរៀបចំជំនួបនេះ ហើយអ្នកវិនិយោគសិង្ហបុរីជាង២០រូបត្រូវបានអញ្ជើញឱ្យចូលរួមក្នុងជំនួបដ៏កម្រនេះ ហើយជាលទ្ធផលគឺមានវិនិយោគទុនសិង្ហបុរីមួយចំនួនបានបង្ហាញការចាប់អារម្មណ៍លើវិស័យមួយចំនួនក្នុងខេត្តសៀមរាប។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកស្រី អ៊ីសា រ៉ហានី ពីខេត្តសៀមរាបដូចតទៅ
វិនិយោគទុនកម្ពុជាមានឱកាសជួបវិនិយោគទុនសិង្ហបុរីដោយផ្ទាល់ក្នុងជំនួបពិភាក្សាផ្នែកពាណិជ្ជកម្មដែលរៀបចំឡើងនៅសណ្ឋាគារ មេម៉រផាឡេស នៅពាក់កណ្ដាលខែមិថុនា។ ជំនួបនេះត្រូវបានរៀបចំឡើងដោយក្លឹបប្រតិបត្តិករទេសចរណ៍សៀមរាប ហៅកាត់ថា STC (Siem Reap Tourism Club) ដោយសហការជាមួយសាលាអន្ដរជាតិសិង្ហបុរីមួយនៅក្រុងសៀមរាប ដែលបានអញ្ជើញអ្នករកស៊ីសិង្ហបុរីចំនួន ២៧រូបមកស្វែងរកឱកាសវិនិយោគក្នុងខេត្តទេសចរណ៍មួយនេះ។
ប្រធានក្លឹបប្រតិបត្តិករទេសចរណ៍ខេត្តសៀមរាប លោក កៅ ហ្វីលីព បានបង្ហាញអារម្មណ៍រីករាយនៅពេលជំនួបផ្នែកពាណិជ្ជកម្មជាលើកដំបូងនេះ ទទួលបានសញ្ញាវិជ្ជមានច្រើនហួសពីការរំពឹងទុក។ លោកបន្ថែមថា ការងារនេះជាផ្នែកមួយនៃចក្ខុវិស័យរបស់ប្រតិបត្តិករទេសចរណ៍ខេត្តសៀមរាប ក្នុងការធ្វើយ៉ាងណាអភិវឌ្ឍន៍វិស័យមួយនេះ ឱ្យកាន់តែខ្លាំងក្លានិងមាននិរន្តរភាព។ ជាងនេះទៅទៀត គឺដើម្បីទាក់ទងអ្នកវិនិយោគគិនបរទេស ឱ្យសំឡឹងឱកាសវិនិយោគក្នុងខេត្តសៀមរាប។ ជាប្រតិបត្តិករផ្នែកទេសចរណ៍មួយរូប លោក ហ្វីលីព ក៏រំពឹងថាក្រោយជំនួបនេះហើយ នឹងអាចទាក់ទាញអ្នករកស៊ីសិង្ហបុរីឱ្យមកបង្កើតអាជីវកម្មនៅសៀមរាបនាពេលខាងមុខផងដែរ។
វិនិយោគគិនដែលមកទស្សនកិច្ចសិក្សាឱកាសរកស៊ីនៅខេត្តសៀមរាបមានចម្រុះវិស័យ ដែលរួមមានវិស័យទេសចរណ៍ វិស័យបច្ចេកវិទ្យា វិស័យអគ្គិសនី វិស័យសុខាភិបាលជាដើម។ នេះជាសញ្ញាដ៏ល្អមួយសម្រាប់ខេត្តសៀមរាប នៅពេលមានការចូលមកវិនិយោគរបស់ជនបរទេសដែលនឹងជំរុញឱ្យសេដ្ឋកិច្ចក្នុងខេត្តទេសចរណ៍មួយនេះកាន់តែរីកចម្រើន។ ការចុះមកសិក្សាឱកាសវិនិយោគនេះក៏ជាផ្នែកមួយនៃការផ្សព្វផ្សាយទិសដៅទេសចរណ៍នៅទីនេះ ទៅដល់ពលរដ្ឋសិង្ហបុរីផងដែរ ដើម្បីទាក់ទាញទេសចរជាតិសាសន៍នេះមកកាន់ទឹកដីអង្គរ បង្កើនផលិតភាពនៃវិស័យនេះកាន់តែរីកចម្រើនទៅមុខ។
មានមូលហេតុសំខាន់ចំនួន២ដែលបើកឱកាសឱ្យមានជំនួបពិភាក្សាការវិនិយោគជាមួយអ្នករកស៊ីកម្ពុជានិងសិង្ហបុរីនៅលើទឹកដីខេត្តសៀមរាបនេះ។ ទី១ រដ្ឋាភិបាលសិង្ហបុរីមានគោលនយោបាយជំរុញឱ្យអ្នកវិនិយោគក្នុងស្រុកចេញមកវិនិយោគនៅតំបន់អាស៊ាន និងទី២ទេសចរសិង្ហបុរី ត្រូវបានចាត់ទុកថាជាទេសចរដែលមានសក្កានុពលខ្ពស់ក្នុងការមកទស្សនាខេត្តសៀមរាប ដ្បិតប្រទេសទាំង២មានរយៈចំងាយជិតអាចហោះហើរបានយ៉ាងងាយស្រួលទៅវិញទៅមក។ សម្រាប់ទេសចរជនជាតិនេះ កន្លងមកខេត្តសៀមរាបមិនសូវទទួលបានច្រើនទេ តែពួកគេបានបង្ហាញវត្តមានច្រើននៅប្រទេសជិតខាងកម្ពុជាទៅវិញ។ នេះជាការលើកឡើងរបស់លោក ហ្វីលីព ដែលថាគួរតែមានការផ្សព្វផ្សាយបន្ថែមដើម្បីទាក់ទាញទេសចរទាំងនោះមកកម្សាន្តខេត្តសៀមរាប។
លោក សាវ៉ាន់ ប្រធានផ្សារផលិតផលកម្ពុជាដ៏ល្បីល្បាញក្នុងក្រុងសៀមរាបក៏បានចូលរួមក្នុងវេទិកាជំនួបពិភាក្សាការវិនិយោគនេះដែរ។ មានក្រុមហ៊ុនមួយបានបង្ហាញការចាប់អារម្មណ៍ទៅនឹងផ្សារសិប្បកម្មរបស់លោក សាវ៉ាន់ និងចង់ផលិតសម្រាប់ការនាំចេញទៅក្រៅស្រុកផង។ តាមការបញ្ជាក់ពីម្ចាស់ផ្សារផលិតផលកម្ពុជានេះ ក្នុងនោះក៏មានក្រុមហ៊ុនផ្សេងទៀតចាប់អារម្មណ៍ការនាំចេញផ្លែស្វាយពីកម្ពុជាទៅទីផ្សារបរទេសផងដែរ ដែលការណ៍នេះនឹងជំរុញដល់សេដ្ឋកិច្ចក្នុងខេត្តសៀមរាបប្រសិនមានការវិនិយោគពិតប្រាកដមែននោះ។
ជាមនុស្សម្នាក់ដែលមានបទពិសោធន៍ផ្នែកអាជីវកម្ម លោក សាវ៉ាន់ យល់ឃើញថា អ្នកវិនិយោគសិង្ហបុរីដែលមកនេះ គឺមានភាពវ័យចំណាស់ ដែលអាចចែករំលែកដល់អ្នកវិនិយោគកម្ពុជាសិក្សារៀនសូត្របាន។ ជាមួយគ្នានេះលោក សាវ៉ាន់ ក៏កោតសរសើរចំពោះអ្នករៀបចំជំនួបដ៏មានសារសំខាន់នេះដែរ ដោយរំពឹងថាវេទិកានេះនឹងក្លាយជាជំនួបដ៏ល្អសម្រាប់ការអភិវឌ្ឍសេដ្ឋកិច្ចក្នុងខេត្តសៀមរាបនាពេលខាងមុខ។
ប្រធានសភាពាណិជ្ជកម្មខេត្តសៀមរាប-ឧត្តរមានជ័យ លោក ហ៊ុយ ភៀវ ក៏បានផ្តល់ការវាយតម្លៃខ្ពស់ចំពោះជំនួបពាណិជ្ជកម្មនេះដែរ។ លោក ហ៊ុយ ភៀវ បានបញ្ជាក់ថាក្នុងជំនួបនេះមានក្រុមហ៊ុនមួយរកទិញអង្ករនាំចេញទៅប្រទេសម៉ាឡេស៊ី ដែលនេះជាសញ្ញាដ៏ល្អសម្រាប់ខេត្តសៀមរាបដែលកន្លងមកមិនទាន់មានការវិនិយោគលើផ្នែកនេះនៅឡើយ។ យ៉ាងណា ភាគីក្រុមហ៊ុននោះមិនទាន់បញ្ជាក់ពីបរិមាណដែលចង់បាននៅឡើយ ដោយសុំការពិភាក្សានិងជជែកគ្នាបន្ថែមដើម្បីឱ្យការងារនេះជោគជ័យ។
ដ្បិតថានេះជាជំនួបដើម្បីសិក្សាពីលទ្ធភាពវិនិយោគពីគ្នាក៏ពិតមែន តែប្រធានក្លឹបប្រតិបត្តិករទេសចរណ៍ខេត្តសៀមរាបមានសុទិដ្ឋិនិយមខ្ពស់ថា ជាការងារដ៏ល្អក្នុងគៀងគរអ្នកវិនិយោគទុនពីក្រៅប្រទេសមកកាន់ខេត្តទេសចរណ៍មួយនេះ។ អ្នកវិនិយោគទាំងនោះបានរៀនសូត្រពីគ្នា និងបានដឹងពីព័ត៌មានលើគម្រោងអភិវឌ្ឍន៍ក្រុងនាពេលអនាគត ដែលជាចំណុចដ៏ល្អក្នុងការឱ្យអ្នកវិនិយោគទាំងនោះយកទៅពិចារណានិងសម្រេចចិត្តបោះទុនវិនិយោគនាពេលអនាគត៕