អន្តរជាតិ
ទីម័រខាងកើតដាក់គម្រោងប្រែក្លាយខ្លួនជាប្រទេសដែលគ្មានប្លាស្ទិក រោងចក្រកែច្នៃសម្រាមរបស់អូស្ត្រាលី (រូបភាព៖ Inside Waste)
×
ទីម័រខាងកើតមានគម្រោងប្រែក្លាយខ្លួនឱ្យទៅជាប្រទេសទីមួយនៅលើពិភពលោកដែលកែច្នៃឡើងវិញទាំងស្រុងនូវកាកសំណល់ប្លាស្ទិកគ្រប់ប្រភេទ។ ការប្រកាសនេះធ្វើឡើង ក្រោយកោះមួយនេះសហការជាមួយក្រុមអ្នកស្រាវជ្រាវជនជាតិអូស្ត្រាលីដើម្បីកសាងរោងចក្រកែច្នៃសម្រាមប្លាស្ទិកកាលពីពាក់កណ្តាលខែឧសភាកន្លងទៅ។
រោងចក្រថ្មីមួយដែលមានតម្លៃ៤០លានដុល្លាសហរដ្ឋអាមេរិកនឹងធានាមិនឱ្យមានសំណល់សម្រាមប្លាស្ទិកដែលបានប្រើប្រាស់នៅក្នុងរដ្ឋអាស៊ីអាគ្នេយ៍មួយនេះឡើយ។ នៅក្នុងលំនាំនេះ កាកសំណល់ប្លាស្ទិកទាំងអស់ នឹងត្រូវបានច្នៃឱ្យក្លាយទៅជាផលិតផលសម្រេច និងពាក់កណ្តាលសម្រេច ក្រោមរូបភាពជាសម្ភារប្រើប្រាស់ផ្សេងៗ។
បើតាម World Economic Forum រដ្ឋាភិបាលក្រុងឌីលី បានលើកឡើងថា ទីម័រខាងកើត បានចុះហត្ថលេខាលើអនុសារណៈយោគយល់គ្នាជាមួយក្រុមហ៊ុន Mura Technology របស់អូស្ត្រាលី ក្នុងការកសាងរោងចក្រមិនគិតប្រាក់កម្រៃមួយឈ្មោះ RESPECT ដែលនឹងដំណើរការកែច្នៃសំណល់ប្លាស្ទិកនៅចុងឆ្នាំ២០២០។
លោក Thomas Maschmeyer សហស្ថាបនិកនៃបច្ចេកវិទ្យាកែច្នៃសំណល់ឡើងវិញដែលនឹងត្រូវបំពាក់នៅក្នុងរោងចក្រថ្មី បានលើកឡើងថា ទីម័រខាងកើតគឺជាកោះដ៏តូចមួយដែលអាចបង្កើតគោលការណ៍ “គ្មានសម្រាម” ឱ្យមានប្រសិទ្ធភាពនៅទូទាំងប្រទេសបាន។
លោកបានបញ្ជាក់ថា៖ ចំពោះសំណល់ប្លាស្ទិក ប្រសិនបើយើងបំបែកធាតុវាមិនបានល្អ វានឹងបង្កឱ្យមានគ្រោះថ្នាក់យ៉ាងធ្ងន់ធ្ងរ។ ផ្ទុយទៅវិញ បើយើងទុកដាក់និងបំបែកធាតុវាបានល្អ នោះជារឿងដ៏អស្ចារ្យបំផុត»។
បន្ថែមពីលើផលប៉ះពាល់ទៅលើសុខភាពមនុស្សនិងសត្វព្រៃ ក្រុមអ្នកជំនាញផ្នែកអាជីវកម្មនៅតំបន់អាស៊ីប៉ាស៊ីហ្វិក បានលើកឡើងថាសម្ភារប្លាស្ទិកធ្វើឲ្យខាតបង់ថវិកា ១,៣ ពាន់លានដុល្លាអាមេរិក ក្នុងមួយឆ្នាំៗ ទៅក្នុងសេដ្ឋកិច្ចពិភពលោក ជាពិសេសនៅក្នុងវិស័យធំៗទាំងបីមានទេសចរណ៍ នេសាទ និងឧស្សាហកម្មផ្លូវទឹក។
គួរបញ្ជាក់ថា ប្រសិនបើរោងចក្រ RESPECT ទទួលបានជោគជ័យ ប្រទេសទីម័រខាងកើតនឹងក្លាយទៅជាគម្រូដ៏ល្អសម្រាប់បណ្តាប្រទេសកំពុងអភិវឌ្ឍឯទៀតនៅលើពិភពលោកដែលរងគ្រោះដោយសារសំណល់ប្លាស្ទិក។ ជាមួយគ្នានេះ គេសង្កេតឃើញបច្ចេកវិទ្យាដដែលបំពាក់នៅទីម័រខាងកើតត្រូវបានគេគ្រោងថានឹងដំឡើងនៅក្នុងបណ្តារោងចក្រកែច្នៃនៅកាណាដា អូស្ត្រាលី និងអង់គ្លេសផងដែរ៕
ដោយ៖ យ៉ន សុខន
.
Tag:
សម្រាម
ប្លាស្ទិក
ទីម័រខាងកើត
© រក្សាសិទ្ធិដោយ thmeythmey.com