ជាតិ
មិនយូរមិនឆាប់ អ្នកក្រុង នឹងលែងឃើញទិដ្ឋភាពបឹងត្រកួន-កញ្ឆែត នេះទៀតហើយ!
×![]()
ភ្នំពេញ៖ នៅភាគខាងត្បូងរាជធានីភ្នំពេញ តាមបណ្តោយផ្លូវសម្តេចហ៊ុនសែន លោកអ្នក នឹងឃើញត្រកួន និងកញ្ឆែតដុះស្អេកស្កះក្នុងបឹងទំពុន។ បឹងទំពុន បានក្លាយជាបឹងមួយ ដែលផ្ដល់ចំណូលដល់កសិករ និងជាទីតាំងដាំត្រកួន-កញ្ឆែត រួមទាំងបន្លែបៃតងជាច្រើនប្រភេទ សម្រាប់ផ្គត់ផ្គង់ដល់អ្នករស់នៅរាជធានីភ្នំពេញ និងតាមបណ្ដាខេត្តនានា។ អ្នកដាំបន្លែនៅលើបឹងនេះ កំពុងព្រួយបារម្ភថា កម្ពុជានិងខ្វះខាតត្រកួន-កញ្ឆែត ដែលដាំនៅក្នុងស្រុក ដោយសារតែផ្ទៃបឹងត្រូវបានវិនិយោគ។
ពលរដ្ឋរាប់រយគ្រួសារបានពឹងអាស្រ័យផលលើរបរដាំត្រកួន និងកញ្ឆែតនៅបឹងទំពុន។ កសិករដែលដាំត្រកួន និងកញ្ឆែតនៅទីតាំងនេះ ខ្លះត្រូវងើបតាំងពីព្រឹកព្រលឹម ដើម្បីកាត់ត្រកួននិងកញ្ឆែត ជូនអតិថិជននៅតាមផ្សារនានាក្នុងរាជធានីភ្នំពេញ និងតាមបណ្តាខេត្តមួយចំនួន ដូចជា៖ កោះកុង ព្រះសីហនុ និងខេត្តមួយចំនួនទៀត។
ក្រុមអ្នកដាំបន្លែក្នុងតំបន់បឹងទំពុនមួយចំនួន បានបញ្ជាក់ថា៖ «បន្លែក្នុងបឹងទំពុននេះ មិនមានសារជាតិគីមីរហូតធ្វើឲ្យប៉ះពាល់សុខភាពរបស់អ្នកបរិភោគឡើយ សូម្បីតែពួកខ្ញុំក៏បរិភោគបន្លែនៅទីនេះដែរ។ បន្លែក្នុងបឹងទំពុននេះ នឹងមិនអាចដាំដុះទាន់ទីផ្សារបានឡើយ ប្រសិនបើគ្មានការថែទាំជាប្រចាំ ដោយបាញ់ថ្នាំកម្ចាត់សត្វល្អិតឲ្យបានទៀងទាត់នោះ»។ ក្នុង១ថ្ងៃ កសិករខ្លះអាចរកចំណូលពីត្រកួន និងកញ្ឆែត បានជាមធ្យម ៦ម៉ឺនរៀល ហើយបន្ទាប់ពីកាត់ចំណាយផ្សេងៗ ពួកគេនៅសល់ប្រាក់បន្តិចបន្តួចប៉ុណ្ណោះ។
បច្ចុប្បន្ន ពលរដ្ឋដែលប្រកបរបរនេះ កំពុងព្រួយបារម្ភថា កម្ពុជានិងខ្វះខាតត្រកួន កញ្ឆែត ដែលដាំនៅក្នុងស្រុក ដើម្បីលក់ក្នុងទីផ្សារ ដោយសារតែផ្ទៃបឹងត្រូវបានវិនិយោគពីរដ្ឋាភិបាល ហើយដីបឹងទាំងអស់ នឹងត្រូវអភិវឌ្ឍជាសំណង់។ តាមរយៈការអភិវឌ្ឍតំបន់បឹងទំពុន នឹងមិនមានបឹងសម្រាប់ឈប់ជួលឲ្យកសិករដាំបន្លែដូចបច្ចុប្បន្នទៀតឡើយ៕
សូមអញ្ជើញទស្សនារូបខាងក្រោម៖
Tag:
បឹងទំពន់ ត្រកូន កញ្ឆែត
© រក្សាសិទ្ធិដោយ thmeythmey.com
