អន្តរជាតិ
ហុងកុង ប្រកាសព្យួរសំណើច្បាប់ធ្វើបត្យាប័នដ៏ចម្រូងចម្រាស ក្រោយបាតុកម្មផ្ទួនៗ
ប្រមុខរដ្ឋាភិបាលហុងកុង Carrie Lam ក្នុងសន្និសីទសារព័ត៌មានថ្ងៃទី១៥ ខែមិថុនា។ រូបភាព AFP
×![]()
ដោយ: តន ចាន់រិទ្ធារ៉ា
រដ្ឋាភិបាលហុងកុង នៅថ្ងៃទី១៥ ខែមិថុនា បានប្រកាសផ្អាកសំណើច្បាប់ដែលបើកផ្លូវដល់ការធ្វើបត្យាប័នជាមួយចិនដោយគ្មានការកំណត់។ ប្រមុខរដ្ឋាភិបាលហុងកុង Carrie Lam បានប្រកាសផ្អាកការជជែកលើសំណើច្បាប់នេះ ក្រោយពលរដ្ឋហុងកុងក្មេងចាស់ធ្វើបាតុកម្មប្រឆាំងផ្ទួនៗ។ ប៉ុន្តែលោកស្រី Lam អះអាងថា ការសម្រេចចិត្តនេះមិនពាក់ព័ន្ធការធ្វើបាតុកម្មឡើយ តែវាជាការស្ដារភាពស្ងប់ស្ងាត់ក្នុងទីក្រុងឡើងវិញប៉ុណ្ណោះ។
បាតុកម្មផ្ទួនៗរបស់ពលរដ្ឋហុងកុងដែលមានអ្នករបួសជិតមួយរយនាក់នោះ ទទួលបានផលហើយ។ នៅថ្ងៃទី១៥ ខែមិថុនានេះ ប្រធានប្រតិបត្តិតំបន់ស្វយ័តហុងកុង Carrie Lam បានធ្វើសន្និសីទព័ត៌មានមួយ ដោយប្រកាសផ្អាកសំណើច្បាប់ធ្វើបត្យាប័នជាមួយប្រទេសនានារាប់ទាំងចិនផង។
«រដ្ឋាភិបាល បានសម្រេចចិត្តព្យួរសេចក្ដីស្នើវិសោធនកម្មច្បាប់ ចាប់ផ្ដើមទំនាក់ទំនងជាមួយគ្រប់ភាគីក្នុងសង្គម បន្តធ្វើការ និងស្ដាប់មតិនានាពីមជ្ឈដ្ឋានទាំងឡាយ។» នេះជាការលើកឡើងរបស់លោកស្រី Lam ចំពោះមុខអ្នកសារព័ត៌មានជាច្រើន។ លោកស្រីបន្តថា រដ្ឋាភិបាល ក៏គ្មានបំណងកំណត់ពេលវេលាដើម្បីជជែកពីសេចក្ដីស្នើច្បាប់នេះហើយ និងសន្យាពិភាក្សាជាមួយសមាជិកសភាហុងកុងបន្ថែមទៀត មុននឹងសម្រេចចិត្តជំហានបន្ទាប់។
សេចក្ដីស្នើច្បាប់ដ៏ចម្រូងចម្រាសដែលបើកផ្លូវឲ្យមានបញ្ជូនជនសង្ស័យទៅកាត់ក្ដីនៅចិនដីគោក ធ្វើឲ្យទីក្រុងហិរញ្ញវត្ថុមួយនេះរង្គើយ៉ាងខ្លាំង។ បាតុកម្មទ្រង់ទ្រាយធំចំនួនពីរ បានរៀបចំឡើងដោយមានមនុស្សចូលរួមរាប់ម៉ឺននាក់ ដែលនេះព្រឹត្តការណ៍ដ៏ញាប់ញ័រក្នុងនយោបាយហុងកុង ជាទឹកដីចិនតែមួយគត់ដែលការប្រមូលត្រូវបានអនុញ្ញាត។ អ្នករៀបចំ មានគម្រោងប្រមូលផ្ដុំម្ដងទៀតនៅថ្ងៃទី១៦ ខែមិថុនាស្អែកនេះ។
យ៉ាងណាមិញ លោកស្រី Lam អះអាងថា ការសម្រេចចិត្តរបស់រដ្ឋាភិបាលមិនមែនដោយសារការធ្វើបាតុកម្មឡើយ។ បើតាមកាសែតហុងកុង South China Morning Post មេដឹកនាំរូបនេះបញ្ជាក់ថា គ្មានការទាក់ទងគ្នារវាងការផ្អាកនេះ និងគម្រោងធ្វើបាតុកម្មឡើយ ប៉ុន្តែលោកស្រីចង់រក្សាស្ថិរភាពប៉ុណ្ណោះ។ តបនឹងសំណួរថា ហេតុអ្វីត្រូវការពេលយូរដើម្បីសម្រេចចិត្តផ្អាក លោកស្រី Lam ឆ្លើយថា រដ្ឋាភិបាលមិនអាចសម្រេចចិត្តភ្លាមៗ រាល់ពេលមានមតិប្រឆាំងឡើយ។
ជុំវិញទំនាក់ទំនងជាមួយប៉េកាំងលើបញ្ហានេះ លោកស្រី Lam ពន្យល់ថា លោកស្រីត្រូវទទួលខុសត្រូវចំពោះមុខប៉េកាំងផង និងហុងកុងផង ហើយសកម្មភាពគ្រប់យ៉ាងត្រូវតែស្របច្បាប់។ លោកស្រីឆ្លើយនឹងសំណួររបស់អ្នកកាសែតថា៖ «ទោះបីជាចៅហ្វាយនាយរបស់អ្នក ដែលបើកប្រាក់ខែឲ្យអ្នក ប្រាប់ឲ្យអ្នកធ្វើការខុសច្បាប់ អ្នកក៏មិនត្រូវធ្វើតាមដែរ៕»
Tag:
ហុងកុង
ចិន
Carrie Lam
© រក្សាសិទ្ធិដោយ thmeythmey.com
