អន្តរជាតិ
ករណីពន្លិចទូកនេសាទហ្វីលីពីន៖ រដ្ឋាភិបាលចិន អះអាងថា ចិនមិនដែលប្រព្រឹត្តអំពើ«បុក ហើយរត់» ឡើយ រូបភាព៖ New York Times
× រដ្ឋាភិបាលចិន បានបដិសេធចំពោះការចោទប្រកាន់ពីសំណាក់ភាគីហ្វីលីពីនលើករណី នៃការលិចទូកនេសាទរបស់ពលរដ្ឋហ្វីលីពីន ដែលបង្កដោយទូកនេសាទរបស់ពលរដ្ឋចិននៅក្នុងដែនសមុទ្រចិនខាងត្បូង។ រដ្ឋាភិបាលចិន បានអះអាងថា ភាគីចិន មិនមានចេតនាបង្កឲ្យមានបញ្ហាកើតឡើងនោះទេ។
តាមរយៈសេចក្តីថ្លែងការណ៍នៅថ្ងៃ១៤ មិថុនា ស្ថានទូតចិនប្រចាំរដ្ឋធានីម៉ានីល បានទទួលស្គាល់ថា ពិតជាមានករណីនៃប៉ះទង្គិចគ្នាដែលបង្កដោយទូកនេសាទរបស់ពលរដ្ឋចិនទៅលើទូកនេសាទពលរដ្ឋហ្វីលីពីនមែន ក៏ប៉ុន្តែហេតុការណ៍នេះ ត្រូវបានស្ថានទូតអះអាងថា ជារឿងអចេតនានោះទេ។ នេះបើយោងតាមការចុះផ្សាយរបស់ភ្នាក់ងារព័ត៌មាន Reuters។
តាមប្រភពព័ត៌មានដដែល ស្ថានទូតចិន បានឲ្យដឹងថាផងដែរ ក្រោយហេតុការណ៍នៃការលិចទូកនេះហើយ ក្រុមទូកនេសាទចិន ក៏បានព្យាយាមចង់ទៅសង្គ្រោះទូកនេសាទហ្វីលីពីនដែរ ក៏ប៉ុន្តែសម្រេចចិត្តគេចខ្លួនវិញ បន្ទាប់ពីបានឃើញមានទូកនេសាទហ្វីលីពីនប្រហែលជាប្រាំពីរ ឬប្រាំបីគ្រឿង សំដៅទៅកន្លែងកើតហេតុនោះ។ ស្ថានទូត គូសបញ្ជាក់ថា «វា មិនមានករណីបុកហើយរត់នោះទេ»។
សេចក្តីថ្លែងការណ៍របស់រដ្ឋាភិបាលចិន ធ្វើឡើងក្រោយមានការផ្ទុះប្រតិកម្មខ្លាំងពីភាគីហ្វីលីពីន ដោយបានចោទប្រកាន់ថា សកម្មភាពនេះ ជាការប្រមាថមួយដ៏ធ្ងន់ធ្ងរមកលើពលរដ្ឋខ្លួន ហើយភាគីហ្វីលីពីន ក៏បានធ្វើបណ្តឹងការទូតទៅកាន់ភាគីចិនផងដែរ។
គួររម្លឹកថាកាលពីយប់ថ្ងៃអាទិត្យសប្តាហ៍មុន ទូកនេសាទរបស់ហ្វីលីពីន ដែលមានផ្ទុកអ្នកនេសាទចំនួន២២នាក់ បានលិច ក្រោយពីទូកនេសាទរបស់ពលរដ្ឋចិន បានបុកនៅក្នុងដែនសមុទ្រចិនខាងត្បូង។ ក្រុមទូកនេសាទរបស់វៀតណាម ក៏បានជួយសង្គ្រោះអ្នកនេសាទហ្វីលីពីនភ្លាមៗតែម្តង ខណៈទូកនេសាទចិន បានគេចខ្លួនបាត់។
នេះ គឺជាការប៉ះទង្គិចគ្នាចុងក្រោយ និងតានតឹងមួយរវាងភាគីចិន និងភាគីហ្វីលីពីន នៅក្នុងដែនជម្លោះសមុទ្រចិនខាងត្បូង ខណៈដែលរដ្ឋាភិបាលទាំងពីរ កំពុងតែត្រូវរូវគ្នាលើកិច្ចសហប្រតិបត្តិការទ្វេភាគី និងការចរចារកដំណោះស្រាយអាចទទួលបានទាំងសងខាងលើការគ្រប់គ្រងក្នុងសមុទ្រចិនខាងត្បូង ឬហ្វីលីពីនហៅថាសមុទ្រខាងលិច។
សមុទ្រចិនខាងត្បូង គឺជាដែនអធិបតេយ្យមួយ ដែលកំពុងតែមានភាគីច្រើនដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន បានទាមទារគ្រប់គ្រងលើតំបន់ត្រួតស៊ីគ្នាដោយមានអំណេះអំណាងរៀងៗខ្លួន។ បច្ចុប្បន្នអាស៊ាន ជាមួយនឹងចិន កំពុងតែចរចាគ្នាក្នុងការបង្កើតក្រមប្រតិបត្តិមួយដើម្បីគ្រប់គ្រងសកម្មភាពផ្សេងៗនៅក្នុងសមុទ្រចិនខាងត្បូង ក្នុងគោលដៅបញ្ជៀសការប្រឈមមុខ ឬឧប្បទ្ទវហេតុនានាដោយមិនអាចរំពឹងទុកបាន៕
© រក្សាសិទ្ធិដោយ thmeythmey.com