កីឡាជាតិ
ជាតិ
អង្គរថាយហ្គឺរនឹងយកថវិកាពីការលក់សំបុត្រក្នុងជំនួបជាមួយគិរីវង់ ទៅបរិច្ចាគជូនពេទ្យកុមារអង្គរ
× ក្លិបបាល់ទាត់អង្គរថាយហ្គឺរបានបញ្ជាក់ថា ពួកគេយកថវិកាបានពីការលក់សំបុត្រក្នុងជំនួបជាមួយក្រុមគីរីវង់សុខសែនជ័យនៅថ្ងៃនេះ ទៅបរិច្ចាគជូនមន្ទីរពេទ្យកុមារអង្គរនៅខេត្តសៀមរាប។ សំបុត្រចូលរួមទស្សនាមានពីរប្រភេទ គឺតម្លៃ៥ពាន់រៀលសម្រាប់ជនជាតិកម្ពុជា និងតម្លៃ៥ដុល្លារសម្រាប់ជនបរទេស។
ទស្សនិកជន ដែលចូលរួមទស្សនាការប្រកួតរវាងក្រុមអង្គរថាយហ្គឺរជាមួយគីរីសុខសែនជ័យ ក្នុងក្របខណ្ឌមិត្តហ្វូនខេមបូឌានលីគនៅកីឡដ្ឋានខេត្តសៀមរាបថ្ងៃនេះ មិនត្រឹមតែជួយលើកទឹកចិត្តកីឡាករ និងរួមចំណែកក្នុងការអភិវឌ្ឍកីឡាបាល់ទាត់ប៉ុណ្ណោះទេ តែថែមទាំងបានចូលរួមជាមួយសកម្មភាពមនុស្សធម៌ទៀតផង ព្រោះក្លិបអង្គរថាយហ្គឺរនឹងយកថវិការបានពីការលក់សំបុត្រទាំងអស់ បរិច្ចាគជូនមន្ទីរពេទ្យកុមរាអង្គរ។
«ការប្រកួតដើម្បីកុមារកម្ពុជា! សម្រាប់ការប្រកួតរវាងក្លិបអង្គរថាយហ្គឺរជាមួយគិរីវង់សុខសែនជ័យ សំបុត្រ ដែលលក់បានទាំងអស់ នឹងត្រូវបរិច្ចាគជូនមន្ទីរពេទ្យកុមារអង្គរ»។ នេះជាសារជូនដំណឹង ដែលក្លិបបាល់ទាត់អង្គរថាយហ្គឺរសរសេរលើទំព័រហ្វេសប៊ុកនៅថ្ងៃទី១៦ ខែមិថុនា ឆ្នាំ២០១៩។ នេះជាសកម្មភាពលះបង់ដ៏គួរឲ្យគោរព និងយកគំរូតាមសម្រាប់ក្លិបដទៃៗទៀត។
ការប្រកួតរវាងក្រុមទាំងពីរនឹងធ្វើឡើងនៅម៉ោង៣:៣០នាទីរសៀលនៅកីឡដ្ឋានខេត្តសៀមរាប។ ក្រៅពីជំនួបនេះ ក៏មានការប្រកួតចំនួន៣គូទៀតផងដែរ ក្នុងនោះក្រុមបាតតារាងកំពង់ចាមប្រើប្រាស់កីឡដ្ឋានស្តាតចាស់ស្វាគមន៍ភ្ញៀងវសូលទីឡូអង្គរនៅម៉ោង៣:៣០នាទី ខណៈអគ្គស្នងការដ្ឋាននគរបាលជាតិប៉ះបឹងកេតនៅកីឡដ្ឋានអគ្គិសនីកម្ពុជា ក្រោយវិសាខាបើកទ្វារកីឡដ្ឋានខ្លួនទទួលភ្ញៀវអាស៊ីអឺរ៉ុបនៅម៉ោង៦ល្ងាច៕
Tag:
MCL2019
បាល់ទាត់
អង្គរថាយហ្គឺរ
មន្ទីរពេទ្យកុមារអង្គរ
© រក្សាសិទ្ធិដោយ thmeythmey.com