អន្តរជាតិ
រដ្ឋមន្ត្រីហិរញ្ញវត្ថុសិង្ហបុរី៖ អ្នកដឹកនាំ 4G នឹងធ្វើការជាមួយនឹងប្រជាជនដើម្បីបង្កើត និងអនុវត្តគោលនយោបាយជាតិ
× រដ្ឋាភិបាលសិង្ហបុរី បានបង្ហាញពីផែនការ និងចក្ខុវិស័យនៃរបៀបរបបថ្មីនៃការដឹកនាំរបស់រដ្ឋាភិបាលក្នុងការអនុវត្តគោលនយោបាយ។ ផែនការនោះ គឺរដ្ឋាភិបាល នឹងចាប់ដៃគូធ្វើការជាមួយនឹងប្រជាជនតែម្តងក្នុងការអនុវត្តគោលនយោបាយ និងគ្រប់គ្រងរដ្ឋ ខណៈបច្ចុប្បន្ន រដ្ឋាភិបាល ផ្តោតសំខាន់តែការងារដើម្បីតែសុខមាលភាពប្រជាជន។
តាមរយៈវេទិកាស្តីពី«ការកសាងអនាគតសិង្ហបុរីទាំងអស់គ្នា» នៅថ្ងៃ១៥ មិថុនា លោកឧបនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុសិង្ហបុរី Heng Swee Keat បានទទួលស្គាល់ពីការអភិវឌ្ឍ និងផ្លាស់ប្តូរសង្គមរបស់សិង្ហបុរី តាមរយៈមេដឹកនាំតាមជំនាន់ជាបន្តបន្ទាប់។ លោកអះអាងថា មេដឹកនាំសិង្ហបុរី គ្រប់ជំនាន់ តែងតែទទួលបានការទុកចិត្ត និងគាំទ្រពីប្រជាជនជានិច្ច។ នេះបើយោងតាមការចុះផ្សាយរបស់ Channel News Asia។
លោកឧបនាយករដ្ឋមន្ត្រី បានកត់សម្គាល់ថា គិតចាប់តាំងជំនាន់បិតាស្ថាបនិកសិង្ហបុរី លោក Lee Kuan Yew មេដឹកនាំសិង្ហបុរី បានកសាងសង្គមសិង្ហបុរីឲ្យកាន់តែចាស់ទុំ រឹងមាំ និងបរិយាប័ន្ន ហើយអ្វីដែលមេដឹកនាំចង់បានមកវិញពីប្រជាជនគឺ ការជឿជាក់ និងទំនុកចិត្តពីប្រជាជន។
ទន្ទឹមនឹងនេះ លោកឧបនាយករដ្ឋមន្ត្រី និងជាថ្នាក់ដឹកនាំប្រទេសក្នុងជំនាន់ទីបួន (4G) ក៏បានលើកពីបញ្ហាប្រឈមនៃការបែងចែកនៅក្នុងសង្គមរបស់សិង្ហបុរី ដែលរួមមានដូចការខ្វែងគំនិតគ្នានៃលើទស្សនៈសង្គម និងតម្រូវការចាំបាច់ ដែលតម្រូវឲ្យមេដឹកនាំថ្មី ត្រូវមានគោលនយោបាយឆ្លើយតប។
ជាដំណោះស្រាយ លោកឧបនាយករដ្ឋមន្ត្រី បានបង្ហើបពីផែនការនៃការផ្លាស់ប្តូរអភិបាលកិច្ចដឹកនាំថ្មី របស់ក្រុមអ្នកដឹកនាំជំនាន់ទីបួន គឺការដឹកនាំសម្រាប់ប្រជាជន មកជាការដឹកនាំជាមួយនឹងប្រជាជន។ លោកថ្លែងថា ទន្ទឹមនឹងការបម្រើការងារសម្រាប់ប្រជាជន និងប្រទេស រដ្ឋាភិបាល នឹងធ្វើការជាមួយនឹងប្រជាជនទាំងបង្កើត និងអនុវត្តគោលនយោបាយ តាមរយៈការទទួលយកទស្សនៈរបស់ប្រជាជនមកបញ្ចូលនៅក្នុងគោលនយោបាយតែម្តង។
លោកទទួលស្គាល់ថា ជារឿងមិនអាចគេចផុតបាននោះទេបញ្ហានៃការយល់ឃើញផ្សេងគ្នានៃទស្សនៈនៅពេលរដ្ឋាភិបាលចាប់ផ្តើមធ្វើការជាមួយនឹងប្រជាជនលើការអភិវឌ្ឍប្រទេស ក៏ប៉ុន្តែ រដ្ឋាភិបាល នឹងព្យាយាមរកចំណុចរួមគ្នា ក្នុងគោលដៅតែមួយគឺការអភិវឌ្ឍប្រទេស។
តាមគម្រោង ក្រុមអ្នកដឹកនាំជំនាន់ទីបួន នឹងចាប់ផ្តើមអនុវត្តអភិបាលកិច្ចថ្មីនេះ លើមូលបទបួន រួមមាន ធ្វើបែបណាឲ្យសិង្ហបុរីនៅតែរឹងមាំ, ធ្វើបែបណាឲ្យសិង្ហបុរី ជារដ្ឋនៃក្តីរំពឹង, ធ្វើបែបណាដើម្បីកសាងសង្គមជាមួយនឹងឱកាសសម្រាប់គ្រប់គ្នា និងធ្វើបែបណាកសាងសិង្ហបុរីជាសហគមន៍ដែលមានការយកទុកចិត្តទុកដាក់គ្នា ផ្តល់កិត្តិយសឲ្យគ្នា និងសាមគ្គីភាព៕
© រក្សាសិទ្ធិដោយ thmeythmey.com