បឹងកេងកង និងកំបូល មានអធិការខណ្ឌហើយ បន្ទាប់ពីអភិបាលខណ្ឌ និងក្រុមប្រឹក្សាខណ្ឌ

ជាតិ

សង្គមជាតិ

បឹងកេងកង និងកំបូល មានអធិការខណ្ឌហើយ បន្ទាប់ពីអភិបាលខណ្ឌ និងក្រុមប្រឹក្សាខណ្ឌ

16, Jun 2019 , 8:59 pm

រូបភាព

លោក ហង្ស មុនី (ឆ្វេងដៃ) និង ស៊ឹម ពិសិដ្ឋ

ដោយ: ភួង វ៉ាន់ថា

អធិការនគរបាលខណ្ឌថ្មីពីររូប ត្រូវបានប្រកាសឱ្យចូលកាន់តំណែងជាផ្លូវការ កាលពីព្រឹកថ្ងៃទី១៤ ខែមិថុនា ឆ្នាំ២០១៩នេះ ក្រោមអធិបតីភាពរបស់ឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ។ អធិការខណ្ឌថ្មីទាំងពីររូបនោះ គឺលោកវរសេនីយ៍ទោ ហង្ស មុនី ជាអធិការ នៃអធិការដ្ឋាននគរបាលខណ្ឌកំបូល និងលោកវរសេនីយ៍ទោ ស៊ឹម ពិសិដ្ឋ ជាអធិការ នៃអធិការដ្ឋាននគរបាលខណ្ឌបឹងកេងកង។

អត្ថបទទាក់ទង

សម្តេច ហ៊ុន សែន តែងតាំងអភិបាលថ្មីនៅចំការមន និងអភិបាលខណ្ឌដំបូងនៅបឹងកេងកង និងកំបូល

ផ្លូវការ៖ ខណ្ឌកំបូល យក៦សង្កាត់ពីខណ្ឌពោធិ៍សែនជ័យ និង១សង្កាត់ពីខណ្ឌដង្កោ

ផ្លូវការ៖ ខណ្ឌបឹងកេងកងយកសង្កាត់៧ពីចំការមន

ថ្លែងក្នុងពិធីខាងលើនេះ លោក ស ថេត បានណែនាំ និងជំរុញឱ្យមន្ដ្រីនគរបាលនគរបាលទាំងអស់ ហើយជាពិសេសអធិការនគរបាលខណ្ឌថ្មីទាំងពីររូប ត្រូវខិតខំបំពេញការងារតាមបទបញ្ជាថ្នាក់លើ។

ក្នុងពិធីនេះ ក៏មានការប្រកាសតែងតាំងនិងប្រគល់ភារកិច្ចថ្មី ព្រមទាំងបំពាក់ឋានន្តរស័ក្ដិជូនដល់មន្រី្តនគរបាលជាច្រើននាក់ផ្សេងទៀតផងដែរ រួមមាន ថ្នាក់វរសេនីយ៍ឯក ថ្នាក់វរសេនីយ៍ទោ ថ្នាក់វរសេនីយ៍ត្រី ថ្នាក់អនុសេនីយ៍ឯក និង ថ្នាក់អនុសេនីយ៍ទោ ជាដើម ។

លោក ហង្ស មុនី ធ្លាប់ជាអធិការរងនៃ អធិការដ្ឋាននគរបាលខណ្ឌសែនសុខ។ លោក ស៊ឹម ពិសិដ្ឋ ធ្លាប់ជាអធិការរង នៃអធិការដ្ឋាននគរបាលខណ្ឌទួលគោក។ បើតាមលោក ស ថេត អធិការទាំងពីរនេះ បានបំពេញការងារជាង៣០ឆ្នាំហើយ។

សូមបញ្ជាក់ថា កាលពីអំឡុងខែមករា ឆ្នាំ២០១៩ ប្រមុខរដ្ឋាភិបាល បានសម្រេចបង្កើត ខណ្ឌបឹងកេងកង ដោយមានលោក ធឹម សំអាន ជាអភិបាល និង ខណ្ឌកំបូល ដោយមានលោក ឃឹម ស៊ុនសូដា ជាអភិបាល។

យោងតាមលទ្ធផលនៃការបោះឆ្នោតក្រុមប្រឹក្សាក្រុង ស្រុក ខណ្ឌ លោក គឹម ឈុនអ៊ូ ជាប់ជាប្រធានក្រុមប្រឹក្សាខណ្ឌបឹងកេងកង ដោយមានសមាជិក១៦នាក់ រីឯលោក នៅ សារឿន ជាប់ជាប្រធានក្រុមប្រឹក្សាខណ្ឌកំបូល ដោយមានសមាជិក១៦នាក់ផងដែរ។ មន្ត្រីទាំងអស់សុទ្ធតែជាកូតាគណបក្សប្រជាជនកម្ពុជា៕