អ្នកស្រី សែម ភា ប្រាប់ពីរបៀបធ្វើជីទឹកធម្មជាតិ

ជាតិ

វីដេអូ

២៥ខេត្ត/រាជធានី

អ្នកស្រី សែម ភា ប្រាប់ពីរបៀបធ្វើជីទឹកធម្មជាតិ

16, Jun 2019 , 7:29 pm

រូបភាព

ដោយ: ប៉ូ សាគុន

កណ្ដាល៖ អ្នកស្រី សែម ភា គឺជាកសិករមួយរូបដែលផ្លាស់ប្ដូរពីការដាំបន្លែដោយបាញ់ថ្នាំគីមីពុល ទៅដាំបន្លែបែបធម្មជាតិវិញ។ ដោយសារទទួលបានចំណេះពីឪពុកផង និងរៀនពីគ្រូកសិកម្មខ្លះផង អ្នកស្រី ភា បានយកចំណេះទាំងនោះមកបញ្ចូលគ្នា ដើម្បីធ្វើជីទឹកធម្មជាតិងាយៗ សម្រាប់បាញ់បន្លែ។

ស្ត្រីកសិកររូបនេះអះអាងថា ជីទឹកនេះជាប្រភេទជីបំប៉ន ហើយវាក៏អាចកម្ចាត់សត្វល្អិតបំផ្លាញបន្លែបានខ្លះផងដែរ។

គ្រឿងផ្សំក្នុងការធ្វើជីទឹកធម្មជាតិរួមមាន៖

- ផ្លែល្ពៅ

- ម្នាស់

- ចេកទំ

- ក្បាលត្រី

- ខ្យង

- ទឹកមូត្រ

- ពាង១(ធំឬតូចអាស្រ័យចំនួនគ្រឿងផ្សំ)។

យកគ្រឿងផ្សំខាងលើកាត់ជាបំណែក រួចដាក់ចូលក្នុងពាងតែមួយ រួចចាក់ទឹកឱ្យលិច។ ត្រូវគ្របពាងឱ្យជិត និងដាក់នៅក្នុងម្លប់ ឬនៅក្រោមដើមឈើ។ ជាពិសេសត្រូវឧស្សាហ៍កូរគ្រឿងផ្សំទាំងនោះចូលគ្នារួច ត្រូវត្រាំរយៈពេលមួយខែ ឬត្រាំឱ្យគ្រឿងផ្សំទាំងនោះរលួយ។ ក្រោយត្រាំគ្រឿងផ្សំទាំងនោះបាន១ខែ ត្រូវច្រោះយកតែទឹកប៉ុណ្ណោះ។ កាកដែលនៅសល់ ហើយនៅមានជាតិ ត្រូវចាក់ទឹកចូលបន្ថែម ដើម្បីធ្វើជីទឹកបន្ត តែបើត្រាំអស់ជាតិហើយ ត្រូវបោះចោល។

ដំណាក់កាលបន្ទាប់ យកជីទឹកដែលបានច្រោះរួច២០លីត្រ ទៅលាយជាមួយថ្នាំជក់(ថ្នាំខ្លាំង) កន្លះគីឡូក្រាម និងលាយជាមួយខ្ទឹមស១គីឡូក្រាម ដែលបុកហ្មត់រួចហើយ។ ត្រូវត្រាំគ្រឿងផ្សំទាំង៣មុខនេះ រយៈពេល១០ថ្ងៃ។ បន្ទាប់ពីត្រាំហើយ ត្រូវច្រោះជីទឹកនេះម្ដងទៀត ដោយមិនឱ្យសល់កាកទាល់តែសោះ។ បន្ទាប់មកអាចយកទៅប្រើប្រាស់បាន។

វិធីប្រើនោះ គឺត្រូវយកជីទឹកកន្លះលីត្រ លាយជាមួយទឹកធម្មតា២០លីត្រ រួចយកទៅបាញ់បន្លែ។ ជីទឹកនេះអាចបាញ់បន្លែស្លឹក ដូចជាស្ពៃគ្រប់ប្រភេទ ដំណាំជីគ្រប់ប្រភេទ និងត្រប់ ជាដើម។ ចំពោះបន្លែស្លឹកដូចជាស្ពៃ ត្រូវបាញ់តែ២លើកប៉ុណ្ណោះ។ លើកទីមួយបាញ់ពេលស្ពៃមានអាយុ១៥ថ្ងៃ។ លើកទី២បាញ់ពេលស្ពៃមានអាយុប្រហែល២០ថ្ងៃ ឬ២៥ថ្ងៃ។

អ្នកស្រី សែម ភា បញ្ជាក់ថា ជីទឹកនេះមិនអាចបាញ់បន្លែស្ពៃ នៅអាយុតិចជាង១៥ថ្ងៃបានឡើយ។ «បើយើងបាញ់ពេលស្ពៃមានអាយុតិចពេក ឬដើមនៅតូចពេក វាធ្វើឱ្យស្លឹកវាស្លោកមិនល្អទៅវិញទេ»។ នេះជាការបញ្ជាក់បន្ថែមរបស់អ្នកស្រី ភា។

សូមបញ្ជាក់ថា នេះគ្រាន់តែជាវិធីសាស្ត្រធ្វើជីទឹកធម្មជាតិ តាមបទពិសោធរបស់អ្នកស្រី សែម ភា តែប៉ុណ្ណោះ៕