ក្រុមបាល់ទាត់វិសាខាបាត់បង់៣ពិន្ទុលើទឹកដីខ្លួន ក្រោយចាញ់អាស៊ីអឺរ៉ុបក្នុងលទ្ធផល ៣-១ នាជំនួបក្របខណ្ឌមិត្តហ្វូនខេមបូឌានលីគ កាលពីថ្ងៃទី១៦ មិថុនា។ បរាជ័យលើកទី៤នេះ ធ្វើឲ្យវិសាខាមានគម្លាតកាន់តែឆ្ងាយពីក្រុមកំពូលតារាងព្រះខ័នរាជស្វាយរៀង។ សម្រាប់ជំនួបកាលពីថ្ងៃអាទិត្យនោះដែរ ក្រុមបឹងកេត អង្គរថាយហ្គឺរ និងសូលទីឡូអង្គរទទួលបាន៣ពិន្ទុរៀងៗខ្លួន ដើម្បីពង្រឹងទីតាំងដែលខ្លួនកំពុងឈរ។
នាជំនួបនៅកីឡដ្ឋានវិសាខា ក្រុមម្ចាស់ផ្ទះវិសាខាចាយពេលតែ៨នាទីប៉ុណ្ណោះ ក្នុងការរកគ្រាប់បាល់នាំមុខ ១-០ លើភ្ញៀវអាស៊ីអឺរ៉ុប ដែលរកបានដោយកីឡាករ អ៊ិន សូដាវីដ។ ប៉ុន្តែភាពសប្បាយរីករាយរបស់អ្នកគាំទ្រក្រុមម្ចាស់ផ្ទះត្រូវបានរសាត់ទៅវិញនៅ២នាទីបន្ទាប់ ក្រោយកីឡាករ Coulibali Abdel Kader រកគ្រាប់បាល់តាមស្មើ ១-១ ឲ្យក្រុមភ្ញៀវ។ ក្រុមទាំងពីរបានរក្សាលទ្ធផលនេះរហូតចប់តង់ទី១។
ក្តីសង្ឃឹមសម្រាប់ភ្ញៀវអាស៊ីអឺរ៉ុបបានកើតឡើងជាថ្មី បន្ទាប់ពីខ្សែប្រយុទ្ធ Ajayi Opeyeni Korede សម្រេចគ្រាប់បាល់នាំមុខ ២-១ នៅនាទីទី៧៥ មុនរូបគេបន្ថែមមួយទៀត ដើម្បីនាំជ័យជម្នះ ៣-១ ឲ្យអាស៊ីអឺរ៉ុបលើម្ចាស់ផ្ទះវិសាខា។ ជ័យជម្នះនេះមិនអាចជួយឲ្យក្រុមនេះរំកិលចំណាត់ថ្នាក់ឡើយ ដោយបន្តឈរលេខរៀងទី៨មាន១៦ពិន្ទុ ជាមួយកំណត់ត្រាឈ្នះ៥ ស្មើ១ និងចាញ់៥។
វាជាបរាជ័យលើកទី៤សម្រាប់វិសាខា ហើយបរាជ័យនេះមិនបានធ្វើឲ្យវិសាខាធ្លាក់ចំណាត់ថ្នាក់នោះទេ ដោយបន្តឈរលេខរៀងទី៥រក្សា១៩ពិន្ទុ។ ប៉ុន្តែវាធ្វើឲ្យមានគម្លាតកាន់តែឆ្ងាយសម្រាប់ក្រុមនេះ ជាមួយក្រុមកំពូលតារាងព្រះខ័នរាជស្វាយរៀងរហូត១០ពិន្ទុ។ ព្រះខ័នរាជស្វាយរៀងបន្តគ្រងកំពូលតារាងប្រចាំសប្តាហ៍ទី១១មាន២៩ពិន្ទុជាមួយកំណត់ត្រាមិនស្គាល់ចាញ់ គឺឈ្នះ៩ និងស្មើ២។
នៅកីឡដ្ឋានអគ្គិសនីកម្ពុជា ក្រុមបឹងកេតបានប្រើពេល១៤នាទីដើម្បីសម្រេចគ្រាប់បាល់នាំមុខ ១-០ លើអគ្គស្នងការដ្ឋាននគរបាលជាតិ តាមរយៈការទាត់បាល់ពិន័យ១១ម៉ែត្ររបស់ខ្សែប្រយុទ្ធ Purcino Luiz Eduardo។ ប៉ុន្តែនៅនាទីទី៣១ ខ្សែប្រយុទ្ធអាហ្វ្រិកខាងត្បូង Booysen Shane ទាត់បាល់ពិន័យ១១ម៉ែត្របានសម្រេច ដើម្បីតាមស្មើ ១-១ ឲ្យអគ្គស្នងការដ្ឋាននគរបាលជាតិ។
ភាពសប្បាយរីករាយក៏បានកើតឡើងម្តងទៀតសម្រាប់បឹងកេត បន្ទាប់ពីកីឡាករជប៉ុន Mizuno Hikaru សម្រេចគ្រាប់ទី២នៅនាទីទី៧៦។ ទោះបីមានការវាយសម្រុកគ្នាទៅវិញទៅមក តែក្រុមទាំងពីរបានរក្សាលទ្ធផលនេះរហូតចប់ការប្រកួត។ ជ័យជម្នះនេះជួយឲ្យបឹងកេតទទួលបាន៣បន្ថែម ដើម្បីពង្រឹងទីតាំងលេខ៤ដោយមាន២៣ពិន្ទុ ដែលមានគម្លាតពីកំពូលតារាង៦ពិន្ទុ។
ចំណែកការប្រកួតនៅកីឡដ្ឋានខេត្តសៀមរាប ម្ចាស់ផ្ទះអង្គរថាយហ្គឺរបានយកឈ្នះភ្ញៀវគីរីវង់សុខសែនជ័យក្នុងលទ្ធផល ២-០ ដើម្បីបាន៣ពិន្ទុពង្រឹងទីតាំងលេខ៣ ដោយមាន២៤ពិន្ទុ។ កីឡាករ Ramos Alexis Damian និង OkereKe Timothy Chiemerie ជាអ្នកសម្រេចគ្រាប់ឲ្យក្រុមម្ចាស់ផ្ទះ។ ក្រុមអង្គរថាយហ្គឺរបានបញ្ជាក់ថា ពួកគេនឹងយកថវិកាទាំងអស់ ដែលបានមកពីការលក់សំបុត្រក្នុងការប្រកួតនេះ យកទៅបរិច្ចាគជូនមន្ទីរពេទ្យកុមារអង្គរ។
ដោយឡែកការប្រកួតនៅកីឡដ្ឋានស្តាតចាស់ ដែលកំពង់ចាមយកធ្វើជាទឹកដី ក្រុមសូលទីឡូអង្គរទទួលបានជោគជ័យដ៏ធំធេងក្នុងលទ្ធផល ៦-០ លើក្រុមកំពង់ចាម។ ជ័យជម្នះនេះជួយឲ្យក្រុមមានមូលដ្ឋាននៅខេត្តសៀមរាបមួយនេះ បន្តឈរលេខរៀងទី៩ដោយមាន១៥ពិន្ទុ។ គ្រាប់បាល់របស់សូលទីឡូអង្គររកបានដោយកីឡាករ លី មស្លីម ពីរគ្រាប់ និងរួមចំណែកម្នាក់១គ្រាប់ពី Kento Fujihara កែវ សុខផល ស៊ុក វឌ្ឍនា និង Fumiya Kogure៕