អន្តរជាតិ
អតីតប្រធានាធិបតីស៊ូដង់ អូម៉ា អាល់-បាសៀ ត្រូវបាននាំចូលទៅសាកសួរនៅការិយាល័យរដ្ឋអាជ្ញា។ រូបភាព AFP
×![]()
ដោយ: តន ចាន់រិទ្ធារ៉ា
អតីតមេដឹកនាំផ្ដាច់ការស៊ូដង់ អូម៉ា អាល់-បាសៀ (Omar al-Bashir) នៅថ្ងៃទី១៦ ខែមិថុនា បានបង្ហាញមុខជាសាធារណៈលើកដំបូងបំផុតចាប់តាំងពីត្រូវបានយោធាទម្លាក់ពីអំណាចក្នុងខែមេសាកន្លងទៅ។ ទីតាំងដែលបង្ហាញមុខលើកនេះ គឺការិយាល័យរដ្ឋអាជ្ញាជុំវិញការចោទប្រកាន់ករណីពុករលួយ។ របបយោធាស៊ូដង់ដែលកំពុងដឹកនាំប្រទេសនាពេលបច្ចុប្បន្ន បានរឹបអូសលុយសុទ្ធជាងមួយរយលានដុល្លារពីផ្ទះលោក អាល់-បាសៀ ។
ក្រោមកិច្ចការពារយ៉ាងប្រុងប្រយ័ត្នបំផុត អតីតប្រធានាធិបតីស៊ូដង់ដែលត្រូវទម្លាក់ពីតំណែង អូម៉ា អាល់-បាសៀ (Omar al-Bashir) ត្រូវបានបញ្ជូនពីពន្ធនាគារល្បីអសោចន៍ Kober ទៅកាន់ការិយាល័យរដ្ឋអាជ្ញាដើម្បីប្រឈមមុខការចោទប្រកាន់ពីបទពុករលួយ។ នេះជាលើកដំបូងដែលគេឃើញវត្តមានលោក អាល់-បាសៀ ជាសាធារណៈ បន្ទាប់ពីត្រូវបានយោធាបណ្ដេញចេញពីអំណាចនៅថ្ងៃទី១១ ខែមេសាកន្លងទៅ។
រដ្ឋអាជ្ញាស៊ូដង់ Alaeddin Dafallah បានប្រាប់អ្នកសារព័ត៌មានថា មេដឹកនាំកាន់អំណាច៣០ឆ្នាំរូបនេះត្រូវបានជូនដំណឹងពីការចោទប្រកាន់លើករណីដូចជាការកាប់លុយបរទេសខុសច្បាប់,អំពើពុករលួយ និងការទទួលសំណូកខុសច្បាប់។ នេះបើតាមការផ្សាយរបស់ទីភ្នាក់ងារព័ត៌មាន AFP ។
មិនយូរប៉ុន្មានក្រោយដណ្ដើមអំណាច ក្រុមយោធាបានចូលនិវេសនដ្ឋានលោក អាល់-បាសៀ ក្នុងរដ្ឋធានីខាទុំ និងរឹបអូសលុយជាច្រើនលានដុល្លារ។ ប្រមុខក្រុមប្រឹក្សាយោធាស៊ូដង់កំពុងដឹកនាំប្រទេស ឧត្តមសេនីយ៍ Abdel Fattah al-Burhan និយាយថា ប៉ូលិស និងកងទ័ពរកឃើញលុយសុទ្ធចំនួន៣៥ម៉ឺនដុល្លារ, លុយអឺរ៉ុប៧លានអឺរ៉ូ (៧,៨លានដុល្លារ) និងលុយស៊ូដង់ប្រាំពាន់លានផោន (១០៥លានដុល្លារ)ក្នុងផ្ទះលោក អាល់-បាសៀ ។
កាលពីខែកុម្ភៈកន្លងទៅ លោក អាល់-បាសៀ ដែលនៅកាន់អំណាចពេញដៃនៅឡើយនោះ បានចេញក្រឹត្យមួយដែលកំណត់ថា ការកាប់លុយបរទេសច្រើនជាងប្រាំពាន់លានដុល្លារ ជារឿងខុសច្បាប់។ នេះជាផ្នែកមួយនៃវិធានការទប់ស្កាត់របស់រដ្ឋាភិបាលលោក អាល់-បាសៀ ដែលដឹកនាំប្រទេសក្រោមច្បាប់អាសន្ន សំដៅបោសសម្អាតការធ្វើបាតុកម្មតវ៉ាប្រឆាំងនឹងការដឹកនាំរបស់លោក។ បាតុករជាច្រើនបានបាត់បង់ជីវិត មុនពេលយោធាទម្លាក់មេដឹកនាំរូបនេះចេញពីតំណែង។
សូមបញ្ជាក់ថា ស៊ូដង់ ជាប្រទេសមានអត្រាពុករលួយខ្លាំងមួយលើពិភពលោកក្រោមការដឹកនាំរបស់លោក អាល់-បាសៀ ។ ក្នុងចំណាត់ប្រចាំឆ្នាំ២០១៨ របស់អង្គការតម្លាភាពពិភពលោក ស៊ូដង់ឈរលេខ១៧២ក្នុងចំណោម១៨០ប្រទេស។ បញ្ហាពុករលួយនេះហើយ ជាឬសគល់មួយដែលនាំឲ្យមានការងើបតវ៉ាពីសំណាក់ប្រជាជនស៊ូដង់ ដែលចុងក្រោយអំណាចលោក អាល់-បាសៀ ក៏ដួលរលំដោយសារយោធាតែម្ដង។
របបលោក អាល់-បាសៀ ដួលរលំមែន តែវិបត្តិនយោបាយមិនទាន់បញ្ចប់នៅឡើយទេ។ ក្រុមបាតុករដែលទាមទារឲ្យលោក អាល់-បាសៀ ចុះចេញនោះ នៅតែប្រមូលផ្ដុំគ្នាក្នុងទីក្រុងខាទុំ ដើម្បីស្នើឲ្យក្រុមយោធាប្រគល់អំណាចឲ្យស៊ីវិលវិញម្ដង។ ក្រុមយោធា បានបដិសេធចែករំលែកអំណាចទៅឲ្យតំណាងស៊ីវិល ខណៈការចរចាជាច្រើនលើកមិនបានទទួលបានលទ្ធផលឡើយ។ ចុងក្រោយនេះ យោធាក៏បានបង្ក្រាបការតវ៉ាដែលធ្វើឲ្យមនុស្សស្លាប់ជាច្រើននាក់៕
Tag:
អាហ្វ្រិក
ស៊ូដង់
អូម៉ា អាល់-បាសៀ
© រក្សាសិទ្ធិដោយ thmeythmey.com
