អចលនទ្រព្យ
អត្ថបទពាណិជ្ជកម្ម
×![]()
ដោយ: ថ្មីៗ
វិនិយោគិនបរទេស បានសម្រុកមកបណ្តាក់ទុនវិនិយោគនៅក្នុងប្រទេសកម្ពុជា និងបានចាប់យកតំបន់សំខាន់ៗដូចជា៖ ក្រុងព្រះសីហនុ និងសៀមរាប ក្រុងប៉ោយប៉ែតជាដើម ដែលបានជំរុញសកម្មភាពសេដ្ឋកិច្ច និងការអភិវឌ្ឍវិស័យអចលនទ្រព្យឲ្យរីកចម្រើនឡើង។
ចំណែកក្រុងបាវិតវិញ បន្ទាប់ពីរដ្ឋាភិបាលបានដាក់ផែនការអភិវឌ្ឍន៍ក្រុង សម្រាប់ឆ្នាំ ២០១៥ ដល់២០២៥ រួចមក បច្ចុប្បន្នក្រុងនេះ ក៏ទទួលបានការចាប់អារម្មណ៍គួរឲ្យកត់សម្គាល់ពីសំណាក់វិនិយោគិនបរទេសផងដែរ។ រយៈពេលប៉ុន្មានឆ្នាំចុងក្រោយនេះ យើងបានសង្កេតឃើញនូវសញ្ញាណសំខាន់ៗមួយចំនួន នៃកំណើនការវិនិយោគនៅក្រុងបាវិត ហើយអ្នកជំនាញរំពឹងថា ក្រុងបាវិតនឹងក្លាយជាតំបន់មានសក្តានុពលពិសេស មួយផ្សេងទៀតរបស់កម្ពុជា។
ទីតាំងភូមិសាស្ត្រ
ជាមួយនឹងក្រឡាផ្ទៃ ២០៦,៦៩ គីឡូម៉ែត្រការ៉េក្រុងបាវិត ស្ថិតនៅចន្លោះទីក្រុងភ្នំពេញ និងក្រុងហូជីមិញ ដែលសុទ្ធតែជាទីក្រុងសេដ្ឋកិច្ចដ៏សំខាន់។ ដូច្នេះ ក្រុងបាវិតត្រូវបានគេចាត់ទុកជាច្រកទ្វារដ៏សំខាន់ ក្នុងការភ្ជាប់ទីក្រុងភ្នំពេញ និងក្រុងហូជីមិញនៃប្រទេសវៀតណាម។
តាមការលើកឡើងរបស់លោកសោម កែវ ម៉ាលីដា អនុប្រធានសមាគមអ្នកជំនាញអចលនទ្រព្យកម្ពុជា ក្រុងបាវិត មានតំបន់សេដ្ឋកិច្ចពិសេសជិត១០ ជាមួយនឹងរោងចក្រផ្សេងៗជាច្រើន។ លោកថែមទាំងបន្ថែមទៀតថា ក្រុងបាវិត ជាតំបន់សំខាន់ស្របនឹងគម្រោងផ្តួចផ្តើមផ្លូវមួយខ្សែក្រវាត់មួយរបស់ចិន និងជាច្រកផ្លូវទឹកយ៉ាងសំខាន់ ទៅកំពង់ផែវៀតណាម។
ទោះយ៉ាងណាក៏ដោយ លោកមើលឃើញថា ប្រទេសកម្ពុជានៅតែជួបបញ្ហាប្រឈមមួយចំនួន ទាក់ទងនឹងការធ្វើដំណើរ ដែលតម្រូវឲ្យមានការពង្រឹងហេដ្ឋារចនាសម្ព័ន្ធ ឲ្យកាន់តែល្អជាងមុន ដើម្បីគាំទ្រដល់កំណើននៃសកម្មភាពពាណិជ្ជកម្មនៅក្រុងបាវិត។
ហេតុដូចនេះហើយ ក្រោមការសហការជាមួយ JICA រាជរដ្ឋាភិបាលកម្ពុជាបានប្រកាសសិក្សាគម្រោងសាងសង់ស្ពាន ដែលតភ្ជាប់ទីក្រុងភ្នំពេញ ទៅក្រុងបាវិត។ ការសិក្សាគម្រោងសាងសង់ផ្លូវល្បឿនលឿននេះ ត្រូវបានប៉ាន់ស្មានថា ចំណាយអស់ទឹកប្រាក់ចំនួន ៣,៨០០ លានដុល្លារអាមេរិក ដែលត្រូវសង់ស្ពានដែលមានចម្ងាយ ១០គីឡូម៉ែត្រ នៅតំបន់ល្វាឯម ដើម្បីសម្រួលដល់ការដឹកជញ្ជូនទំនិញផ្សេងៗ។
ដោយមើលឃើញអំពីទីតាំងភូមិសាស្ត្រល្អ និងគម្រោងហេដ្ឋារចនាសម្ព័ន្ធថ្មីៗ បច្ចុប្បន្នអ្នកវិនិយោគទុន ចាប់ផ្តើមក្រឡេកមើលសក្តានុពលនៃក្រុងមួយនេះ។
គម្រោងសាងសង់ទីក្រុងរណបក្រុងបាវិត
ក្រៅពីការវិនិយោគលើកាស៊ីណូ រោងចក្រ និងសណ្ឋាគារ ក្រុមហ៊ុនយក្ស Empire World បានប្រកាសចាប់ផ្តើមគម្រោងទីក្រុងរណប កាលពីដើមឆ្នាំ២០១៩នេះ។ ទីក្រុងរណបនេះត្រូវប្រើប្រាស់ដីចំនួន ១,០០០ ហិកតា ជាទំហំមួយធំលើសពីគម្រោងផ្សេងទៀត។
គម្រោងទីក្រុងរណបនេះ គឺជាគម្រោងប្រមូលផ្តុំតំបន់កម្សាន្តផ្សេងៗដូចជា៖ កាស៊ីណូ សណ្ឋាគារកម្រិតផ្កាយប្រាំ អាផាតមិន មណ្ឌលបច្ចេកវិទ្យា និងតំបន់ផ្សេងៗជាច្រើនទៀត ហើយគេរំពឹងថា គម្រោងនេះនឹងប្រមូលផ្តុំមនុស្ស មកពីគ្រប់ទិសទីផងដែរ។
ក្រៅពីគម្រោងនេះ គេនៅឃើញមានគម្រោងទីក្រុងរណបហេង ហេង ដែលធ្វើនៅលើដី ៧ ហិកតាផ្សេងទៀត។ ជាមួយនឹងគម្រោងអភិវឌ្ឍន៍ទាំងពីរនេះ ស្ថានភាពអចលនទ្រព្យនៅក្រុងបាវិតបានការប្រែប្រួល បើទោះបីជាក្នុងពេលបច្ចុប្បន្ន ការប្រែប្រួលមិនសូវមានការល្បីសុះសាយយ៉ាងណាក្តី។
យើងសង្កេតឃើញថា តម្លៃដីកាលពីឆ្នាំ២០១៤ មានទំហំប្រមាណ ១០០ដុល្លារ ទៅ ៤០០ ដុល្លា ក្នុងមួយម៉ែត្រការ៉េ អាស្រ័យទៅតាមស្ថានភាពដែលនៅជុំវិញតំបន់នោះ។ លោក សោម កែវម៉ាលីដា បានលើកឡើងថា ដីដែលចេញពីផ្លូវជាតិទៅកាលពីឆ្នាំ២០១៨ មានតម្លៃចន្លោះ ៤ ទៅ៧ដុល្លារ ក្នុងមួយម៉ែត្រការ៉េ ប៉ុន្តែបច្ចុប្បន្នតម្លៃនេះ បានកើនដល់ ២៥ ទៅ ៤០ ដុល្លារ ក្នុងមួយម៉ែត្រការ៉េ។
ការលើកឡើងនេះ ស្របទៅនឹងគម្រោងទីក្រុងរណបពីរដែលកំពុងដំណើរការសាងសង់ ក្នុងឆ្នាំ២០១៩នេះ។ គេនៅតែមានសុទិដ្ឋិនិយមចំពោះក្រុងបាវិត ក្នុងការទាក់ទាញការចាប់អារម្មណ៍ របស់អ្នកវិនិយោគទុន ដើម្បីបន្តការអភិវឌ្ឍតំបន់នោះ៕
(ប្រភព៖https://www.realestate.com.kh/km/news/bavet-sets-to-be-a-potential-investment-destination/)
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
