អន្តរជាតិ
ប្រមុខមន្ទីរបញ្ចកោណ ផាទ្រីកសាណាហាន់ (ឆ្វេង) អំឡុងជំនួបជាមួយប្រធានាធិបតី ដូណាល់ ត្រាំ (កណ្ដាល) និងនាយសេនាធិការចម្រុះកងទ័ពអាមេរិក ចូសេហ្វ ដាន់ហ្វត (ស្ដាំ)។ រូបភាព AFP
×![]()
ដោយ: តន ចាន់រិទ្ធារ៉ា
ក្រសួងការពារជាតិអាមេរិក នៅថ្ងៃទី១៧ ខែមិថុនា បានបើកភ្លើងខៀវដល់ការបញ្ជូនកងទ័ពចំនួនមួយពាន់នាក់ទៅកាន់មជ្ឈិមបូព៌ា ខណៈដែលភាពតានតឹងជាមួយអ៊ីរ៉ង់កើនឡើងខ្លាំង។ យ៉ាងណាមិញ កងទ័ពដែលត្រូវពង្រាយនេះ មិនមែនមានគោលដៅប្រយុទ្ធឡើយ។ នេះបើតាមការប្រកាសរបស់មន្ទីរបញ្ចកោណ។ ប៉ុន្តែការវាយប្រហារលើកប៉ាល់ពីរគ្រឿងនៅឈូងសមុទ្រអូម៉ង់នាពេលថ្មីៗនេះ ធ្វើឲ្យអាមេរិកប្រុងជើងការកាន់តែខ្លាំងថែមទៀត។
ស្របពេលស្ថានការណ៍នៅតំបន់ឈូងសមុទ្រពែរ្ស និងមជ្ឈិមបូព៌ាឡើងកម្ដៅខ្លាំង អាមេរិកក៏មានគម្រោងបញ្ជូនទ័ពទៅបន្ថែមទៀតដើម្បីការពារប្រយោជន៍អាមេរិកនៅទីនោះ។ នៅថ្ងៃទី១៧ ខែមិថុនា មន្ទីរបញ្ចកោណ បានយល់ព្រមពង្រាយទ័ពចំនួនមួយពាន់នាក់នៅមជ្ឈិមបូព៌ា។
រដ្ឋមន្ត្រីស្តីទីក្រសួងកាពារជាតិអាមេរិក ផាទ្រីក សាណាហាន់ និយាយក្នុងសេចក្ដីប្រកាសរបស់មន្ទីរបញ្ចិកោណ ថា កម្លាំងទ័ពថ្មីនេះដែលត្រូវពង្រាយនៅមជ្ឈិមបូព៌ា មានគោលដៅការពារផលប្រយោជន៍ពីការគំរាមទាំងផ្លូវគោក ផ្លូវទឹក និងផ្លូវអាកាស។ ប៉ុន្តែលោក សាណាហាន់ មិននិយាយថា ការគំរាមកំហែងនោះបង្កដោយប្រទេសណា ឬនិយាយចំឈ្មោះអ៊ីរ៉ង់ឡើយ តែបានលើកយកការវាយប្រហារចុងក្រោយនៅឈូងសមុទ្រអូម៉ង់។
ទីក្រុងវ៉ាស៊ីនតោន បានទម្លាក់កំហុសលើទីក្រុងតេហេរ៉ង់លើការវាយប្រហារលើកប៉ាល់ពីរគ្រឿងដែលជាកម្មសិទ្ធិរបស់ជប៉ុន និងន័រវ៉េស។ កងទ័ពជើងទឹកអាមេរិក បានបញ្ចេញវីដេអូចំនួនពីរបន្តបន្ទាប់ដែលបង្ហាញពីសកម្មភាពអ៊ីរ៉ង់ ហើយក៏យកជាភស្តុតាងចង្អុលមុខអ៊ីរ៉ង់តែម្ដង។ ប៉ុន្តែអ៊ីរ៉ង់បានបដិសេធការចោទប្រកាន់នេះ ហើយចាត់ទុកជាការចោទដោយគ្មានមូលដ្ឋាន ខណៈប្រទេសខ្លះទៀត អំពាវនាវឲ្យមានការស៊ើបអង្កេតឯករាជ្យ។
វត្តមានទ័ពមួយពាន់នាក់នេះ នឹងចូលរួមជាមួយកងទ័ពចំនួន១៥០០នាក់ដែលត្រូវបានពង្រាយកាលពីខែឧសភាកន្លងទៅ ក្រោយការវាយប្រហារលើកប៉ាល់ដឹកប្រេងនៅតំបន់ឈូងសមុទ្រ។ កាលនោះ អ៊ីរ៉ង់ដដែល ជាគោលដៅទម្លាក់កំហុសរបស់អាមេរិក និងគូកនរបស់ខ្លួន។ ដោយសារស្ថានការណ៍តានតឹងនោះ អាមេរិក ក៏បានបង្កើនវត្តមានយោធា និងសព្វាវុធសំខាន់ៗជាច្រើនទៅកៀកអ៊ីរ៉ង់ដូចជានាវាដឹកយន្តហោះ និងយន្តហោះទម្លាក់គ្រាប់បែកជាដើម។
ទីភ្នាក់ងារព័ត៌មាន Reuters បានស្រង់សម្ដីមន្ត្រីការពារជាតិអាមរិកថា កងទ័ពដែលត្រូវបញ្ជូនទៅកាន់មជ្ឈិមបូព៌ានេះ មានទាំងអង្គភាពប្រមូលព័ត៌មាន តាមដាន និងឈ្លាបការណ៍តាមអាកាសដែលមានសមត្ថភាពតាមចាប់សកម្មភាពគំរាមកំហែង និងរូបភាពគូសត្រូវផងដែរ។
ទោះជាយ៉ាងណា អាមេរិកថា ខ្លួនមិនគ្មានបំណងធ្វើសង្គ្រាមឡើយ។ ក្នុងសេចក្ដីខាងលើ មន្ទីរបញ្ចកោណលើកឡើងថា សហរដ្ឋអាមេរិក មិនចង់មានជម្លោះជាមួយអ៊ីរ៉ង់ឡើយ ឯការពង្រាយទ័ពលើកនេះ មានគោលដៅធានាសុវត្ថិភាពយោធាអាមេរិកដែលធ្វើការនៅទូទាំងតំបន់ និងដើម្បីការពារផលប្រយោជន៍អាមេរិកប៉ុណ្ណោះ៕
Tag:
អាមេរិក
អ៊ីរ៉ង់
មជ្ឈិមបូព៌ា
ផាទ្រីក សាណាហាន់
© រក្សាសិទ្ធិដោយ thmeythmey.com
