ជាតិ
សង្គមជាតិ
សេចក្តីព្រាងច្បាប់ស្តីពី «ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ» ត្រូវបានអនុម័ត លោក វេង សាខុន ថ្លែងកាលពីថ្ងៃទី១២ ខែមិថុនា ឆ្នាំ២0១៩ ក្នុងពិធីប្រគល់វិញ្ញាបនបត្រលើវគ្គបណ្តុះបណ្តាលស្តីពីការគ្រប់គ្រងនិងភាពជាអ្នកដឹកនាំ និងប្រកាសចូលកាន់តំណែងមន្ត្រីរាជការក្រសួងកសិកម្ម
× រដ្ឋសភាបានអនុម័តលើសេចក្តីព្រាងច្បាប់ស្តីពី «ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ» នៅក្នុងកិច្ចប្រជុំពេញអង្គ កាលពីថ្ងៃ១៧ ខែមិថុនា ឆ្នាំ២០១៩។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា សេចក្តីព្រាងច្បាប់នេះមាន២២មាត្រា ដែលគ្របដណ្តប់ដោយខ្លឹមសារសំខាន់ៗ ចំនួន៥ចំណុច មានដូចជា ទី១ ប្រវត្តិនៃអង្គការបណ្តាញអន្តរជាតិឫស្សី និងផ្តៅ ទី២ គោលនយោបាយ និងផែនការយុទ្ធសាស្ត្រ ទី៣ លក្ខន្តិកនៃការចូលជាសមាជិក ទី៤ ការត្រៀមលក្ខណ:គ្រប់គ្រាន់មុនចូលជាសមាជិក និងទី៥ អត្ថប្រយោជន៍នៃការចូលជាសមាជិក។
រដ្ឋមន្ត្រីរូបនេះ បានបន្តថា ច្បាប់នេះនឹងជួយលើកកម្ពស់ជីវភាពប្រជាពលរដ្ឋ ប្រជាសហគមន៍ ដោយកែប្រែទម្លាប់ និងជំរុញលើកទឹកចិត្តប្រជាពលរដ្ឋពីការប្រើប្រាស់ឈើមកប្រើប្រាស់ឫស្សី និងផ្តៅវិញ តាមរយៈការអភិវឌ្ឍផលិតកម្ម ការអភិរក្ស និងការកែច្នៃឫស្សី និងផ្តៅ តាមគោលការណ៍អភិវឌ្ឍឫស្សី និងផ្តៅប្រកបដោយចីរភាព និងនិរន្តរភាព។
លោក ថ្លែងក្នុងកិច្ចប្រជុំរបស់រដ្ឋសភាថា៖«យើងសង្ឃឹម និងជឿជាក់ថាកម្ពុជានឹងទទួលបានកិច្ចសហប្រតិបត្តិការអន្តរជាតិមួយដ៏ល្អក្នុងការពង្រឹងសមត្ថភាពការពារ និងអភិវឌ្ឍធនធានឫស្សី និងផ្តៅប្រកប ដោយនិរន្តរភាព ដើម្បីផល ប្រយោជន៍សង្គម សេដ្ឋកិច្ច និងភាតរបរិស្ថានបៃតង រួមទាំងការអភិរក្សជីវៈចម្រុះនិងមរតកវប្បធម៌ជាតិផងដែរ»។
លោក សុវណ្ណ ពិសិដ្ឋ ប្រធានសមាគមផ្ដៅឫស្សីកម្ពុជា បានលើកឡើងថា កម្ពុជាពិតជាមានសក្ដានុពលផ្នែកនេះប្រាកដមែន ដោយឫស្សី និងផ្ដៅ ដែលជាវត្ថុធាតុដើម សម្រាប់កែច្នៃទៅជាគ្រឿងសង្ហារិមផ្សេងៗ មាននៅតាមបណ្ដាខេត្តទូទាំងប្រទេស តែការយកមកកែច្នៃនៅតិចតួចនៅឡើយ។ លោក ពិសិដ្ឋ បន្តថា ផលិតផលធ្វើពីផ្ដៅ ឫស្សី កាន់តែពេញនិយម ពិសេសការប្រើប្រាស់ក្នុងគេហដ្ឋាន ហាងកាហ្វេ ភោជនីយដ្ឋាន សណ្ឋាគារ និងរមណីយដ្ឋានជាដើម។
គួររម្លឹកថា កាលពីខែ ឧសភា ឆ្នាំ២០១៩ លោក វេង សាខុន បានជួបលោកស្រី Jiang Zehui សហប្រធានក្រុមប្រឹក្សាភិបាលនៃអង្គការអន្តរជាតិឫស្សីនិងផ្តៅហៅកាត់ថាអ៊ីនបា (INBAR: International Network for Bamboo and Rattan) ដើម្បីពិភាក្សាពីកិច្ចសហប្រតិបត្តិការ និងការចូលរួមជាសមាជិកនៃអង្គការមួយនេះ។ អង្គការបណ្ដាញអន្តរជាតិសម្រាប់ឫស្សីនិងផ្ដៅ ហៅកាត់ថាអ៊ីនបា បង្កើតឡើងឆ្នាំ១៩៩៧ ដោយសន្ធិសញ្ញាតម្កល់ទុកនៅអង្គការសហប្រជាជាតិ៕
Tag:
ក្រសួងកសិកម្ម
សេចក្តីព្រាងច្បាប់ វិស័យផ្ដៅ-ឫស្សី
រដ្ឋសភា
© រក្សាសិទ្ធិដោយ thmeythmey.com