អន្តរជាតិ
ថៃ ជាប់ឆ្នោតជាសមាជិកក្រុមប្រឹក្សាសង្គមនិងសេដ្ឋកិច្ច UN សម្រាប់ឆ្នាំ២០២០-២២ ប្រភពរូប៖ UN
× ថៃ ត្រូវបានជ្រើសរើសទៅជាសមាជិកមួយនៃក្រុមប្រឹក្សាសង្គម និងសេដ្ឋកិច្ចរបស់អង្គការសហប្រជាជាតិ (Ecosoc) សម្រាប់អាណត្តិឆ្នាំ ២០២០ ដល់ ឆ្នាំ ២០២២ ប្រចាំការនៅស្នាក់ការកណ្តាលអង្គការសហប្រជាជាតិក្នុងទីក្រុងញូវយ៉ក សហរដ្ឋអាមេរិក។
ថៃ ស្ថិតក្នុងចំណោមប្រទេស៤ផ្សេងទៀត មកពីតំបន់អាស៊ីប៉ាស៊ីហ្វិក ដែលត្រូវជ្រើសរើសចូល Ecosoc កាលពីថ្ងៃទី ១៤ ខែមិថុនា។ ប្រទេស៣ទៀតនោះ គឺមានដូចជា ចិន បង់ក្លាដេស និងកូរ៉េខាងត្បូង។ នេះបើតាមសេចក្តីថ្លែងការណ៍របស់ក្រសួងការបរទេសថៃនៅថ្ងៃសៅរ៍ ទី១៥ ខែមិថុនា។
ថៃ ទទួលបានការបោះឆ្នោតគាំទ្រ ១៨៦ សំឡេង ដែលមានសំឡេងខ្ពស់ជាងគេក្នុងចំណោមបេក្ខភាពក្នុងតំបន់អាស៊ីប៉ាស៊ីហ្វិក ។ រដ្ឋមន្ត្រីការបរទេសថៃ លោក Don Pramudwinai ក៏មានវត្តមាននៅក្នុងការបោះឆ្នោតនោះផងដែរ។
តាមការចុះផ្សាយរបស់កាសែតថៃ បាងកកប៉ុស្តិ៍ ក្រសួងការបរទេសថៃ បញ្ជាក់បែបនេះថា៖ «ការឈរឈ្មោះរបស់យើងក្នុង Ecosoc ឆ្លុះបញ្ចាំងពីការតាំងចិត្តយ៉ាងមុតមាំនៃរដ្ឋាភិបាល ដើម្បីឆ្ពោះទៅរករបៀបវារៈការអភិវឌ្ឍប្រកបដោយចីរភាព ទាំងក្នុងស្រុក និងអន្តរជាតិ»។
ថៃ ខកខានពុំបានចូលបម្រើក្នុង Ecosoc អស់រយៈពេល ១២ឆ្នាំហើយ ដោយអាណត្តិចុងក្រោយរបស់ខ្លួន គឺនៅចន្លោះឆ្នាំ ២០០៥ ដល់ ២០០៧ ។ ក្រុមប្រឹក្សាសង្គម និងសេដ្ឋកិច្ចរបស់ UN គឺជាស្ថាប័នស្នូលមួយក្នុងចំណោមស្ថាប័នទាំង ៦ របស់ UN ។ Ecosoc មានតួនាទីពិនិត្យមើលលើគោលនយោបាយ និងផ្តល់យោបល់លើបញ្ហាសង្គម សេដ្ឋកិច្ច និងបរិស្ថាន ដើម្បីសម្រេចបាននូវគោលដៅ អភិវឌ្ឍន៍ប្រកបដោយចីរភាពរបស់ UN ។
ការជាប់ជាសមាជិកមួយក្នុងចំណោមសមាជិកទាំង៥៤របស់ស្ថាប័នកំពូលនេះ ផ្តល់កាលានុវត្តភាពដ៏ធំធេងសម្រាប់ប្រទេសថៃ ។ ឱកាសនោះគឺថា ថៃ អាចធ្វើការជាមួយបណ្តាប្រទេសផ្សេងទៀត ក្នុងគោលដៅលើកកម្ពស់ Ecosoc ប្រកបដោយបរិយាប័ន្ន ដើម្បីពន្លឿនរបៀបវារៈឆ្នាំ ២០៣០ សម្រាប់ការអភិវឌ្ឍប្រកបដោយចីរភាព ដែលគ្មានទុកប្រទេសណាមួយចោល។ ក្រសួងការបរទេសថៃ ជឿជាក់បែបនេះ។
ម្យ៉ាងវិញទៀត ក្រសួងដដែល ក៏បានបញ្ជាក់ឲ្យដឹងទៀតថា តាមរយៈ Ecosoc ថៃ អាចចូលរួមបង្កើតគោលនយោបាយអភិវឌ្ឍន៍ និងក៏អាចចែករំលែកការអនុវត្តដែលល្អបំផុតរបស់ខ្លួនលើការអភិវឌ្ឍប្រកបដោយចីរភាពផងដែរ៕
© រក្សាសិទ្ធិដោយ thmeythmey.com