Platini ត្រូវបានសមត្ថកិច្ចដោះលែងវិញ ក្រោយសង្ស័យពុករលួយក្នុងការផ្តល់សិទ្ធិឲ្យកាតាធ្វើម្ចាស់ផ្ទះ World Cup ២០២២

កីឡាអន្តរជាតិ

អន្តរជាតិ

Platini ត្រូវបានសមត្ថកិច្ចដោះលែងវិញ ក្រោយសង្ស័យពុករលួយក្នុងការផ្តល់សិទ្ធិឲ្យកាតាធ្វើម្ចាស់ផ្ទះ World Cup ២០២២

19, Jun 2019 , 2:44 pm

រូបភាព

ដោយ: ទេព ពិទូរ្យ

លោក Michel Platini អតីតប្រធានសហព័ន្ធកីឡាបាល់ទាត់ទ្វីបអឺរ៉ុប (UEFA) ត្រូវបានចាប់ខ្លួនក្នុងបទចោទប្រព្រឹត្តអំពើពុករលួយជុំវិញការផ្តល់សិទ្ធិឲ្យកាតាធ្វើម្ចាស់ផ្ទះ World Cup ឆ្នាំ២០២២។

លោក Platini ដែលសព្វថ្ងៃមានវ័យ៦៣ឆ្នាំ ត្រូវបានសហព័ន្ធកីឡាបាល់ទាត់អន្តរជាតិ (FIFA) ដកតំណែងប្រធាន UEFA និងពិន័យលោកមិនឲ្យមានសកម្មភាពកីឡារយៈពេល៤ឆ្នាំ ពោលគឺចាប់តាំងពីឆ្នាំ២០១៥មក ក្រោមបទចោទរំលោភក្រមសីលធម៌ ជុំវិញការទទួលប្រាក់សំណូក២លានហ្វ្រង់ស្វ៊ីស (២លានដុល្លារអាមេរិក)។

យ៉ាងណាក៏ដោយ អតីតប្រធានក្រុមកីឡាបាល់ទាត់ជម្រើសជាតិបារាំង និងក្រុម Juventus ដែលធ្លាប់ឈ្នះពានរង្វាន់ Ballon d'Or ម្តងនោះ តែងតែបដិសេធរាល់ការចោទប្រកាន់មកលើលោក។ ក្រៅពីបទចោទខាងលើ ឥឡូវនេះ Platini ត្រូវបានតុលាការបន្ថែមបទចោទមួយទៀត ជុំវិញការផ្តល់សិទ្ធិឲ្យកាតាធ្វើម្ចាស់ផ្ទះព្រឹត្តិការណ៍កីឡាបាល់ទាត់ពិភពលោកឆ្នាំ២០២២ ដោយឈ្នះការដេញថ្លៃពីគូប្រជែងអាមេរិក អូស្ត្រាលី កូរ៉េខាងត្បូង និងជប៉ុនកាលពីឆ្នាំ២០១០។

បុរសជនជាតិបារាំងរូបនេះ ត្រូវបានចាប់ខ្លួនក្នុងទីក្រុងប៉ារីស នាថ្ងៃទី១៨ ខែមិថុនា ជុំវិញការចោទប្រកាន់អំពើពុករលួយដោយទទួលសំណូក។ បើតាមទីភ្នាក់ងារព័ត៌មាន AFP លោក Platini ត្រូវដោះលែងវិញនៅយប់ថ្ងៃដដែល បន្ទាប់ពីសាកសួរចម្លើយហើយ។ តែយ៉ាងណាសមត្ថកិច្ចនៅតែបន្តស៊ើបអង្កេតលើករណីនេះ។

អត្ថបទទាក់ទង

Platini ដែលកំពុងជាប់បម្រាម FIFA ពន្លះ Infantino ថាជាអ្នកដឹកនាំមិនស្របច្បាប់

ក្រុមមន្ត្រីពាក់ព័ន្ធបានស៊ើបអង្កេតលើករណីប្រព្រឹត្តអំពើពុករលួយ ដែលជាប់ទាក់ទងនឹងការផ្តល់សិទ្ធិប្រកួត World Cup ឆ្នាំ២០១៨ នៅរុស្ស៊ី និងឆ្នាំ២០២២ នៅកាតា អស់រយៈពេល ២ឆ្នាំមកហើយ។ លោក Sepp Blatter ដែលជាអតីតប្រធាន FIFA ក៏ជាប់ពាក់ព័ន្ធក្នុងរឿងក្តីនេះដែរ មុនពេលលោកចុះចេញពីតំណែងក្នុងឆ្នាំ ២០១៥។

FIFA ចោទ Blatter ថាបានផ្តល់ប្រាក់ ២លានហ្វ្រង់ស្វ៊ីស ( ២លានដុល្លារអាមេរិក ) ទៅឲ្យ Platini។ ប៉ុន្តែបុរសសញ្ជាតិស្វ៊ីសវ័យ៨៣ឆ្នាំ ដែលគ្រប់គ្រងក្បាលម៉ាស៊ីនកីឡាបាល់ទាត់ពិភពលោករយៈពេល ១៧ឆ្នាំរូបនេះ តែងតែបដិសេធ៕