កីឡាអន្តរជាតិ
អន្តរជាតិ
Mourinho នឹងវិលទៅដឹកនាំវិញ ប៉ុន្តែជាក្រុមជម្រើសជាតិ មិនមែនក្លិប
× លោក Jose Mourinho អតីតអ្នកចាត់ការទូទៅ Manchester United បង្ហើបថាលោកនឹងវិលត្រឡប់ទៅកាន់តំណែងជាគ្រូបង្វឹកវិញប៉ុន្តែជាក្រុមជម្រើសជាតិ មិនមែនក្លិបឡើយ។
លោក Mourinho ត្រូវបានក្រុមបិសាចក្រហមបញ្ចប់ពីតំណែងជាអ្នកចាត់ការកាលពីខែធ្នូកន្លងទៅ បន្ទាប់ពីដឹកនាំក្រុមមិនបានល្អ។ ក្រោយការចាកចេញពី Old Trafford គ្រូសញ្ជាតិព័រទុយហ្គាល់រូបនេះត្រូវបានផ្សាភ្ជាប់ទៅនឹងការទាក់ទងជាមួយក្លិបដ៏ទៃជាច្រើនសម្រាប់តំណែងថ្មី។ ប៉ុន្តែយ៉ាងណាក៏ដោយបុរសរហស្សនាម Special One បាននិយាយថាលោកអាចទៅដឹកនាំក្រុមជម្រើសជាតិជាលើកដំបូងក្នុងអាជីពរបស់លោក។
«ខ្ញុំចង់មានការប្រកួតប្រជែងថ្មី។ ខ្ញុំកំពុងគិតអំពីការប្រកួត World Cup និងពានរង្វាន់អឺរ៉ុប(European)។ ក្នុងរយៈពេលចុងក្រោយ ខ្ញុំមានបំណងចង់សាកល្បងបែបផ្សេង និងប្លែកសម្រាប់អាជីពមួយនេះ។ ហើយពេលនេះខ្ញុំយល់ថាខ្លួនឯងកំពុងចាប់អារម្មណ៍ក្រុមជម្រើសជាតិ ជាជាងជាមួយក្លិប។ Mourinho បានបញ្ជាក់ប្រាប់ Eleven Sports ដូច្នេះ ព្រមទាំងសួរជាសំណួរទៅខ្លួនឯងទៀតថា តើព័រទុហ្គាល់ជាក្រុមដែលសមនឹងលោកដឹកនាំឬក៏អត់?។
អតីតអ្នកចាត់ការទូទៅ Chelsea, Real Madrid, Inter Milan និង Porto វ័យ៥៦ឆ្នាំរូបនេះ បានទទួលខុសត្រូវដឹកនាំក្រុមបិសាចក្រហមរយៈពេល២ឆ្នាំកន្លះ ដោយក្នុងនោះលោកបានជួយម្ចាស់ជើងឯកលីគកំពូលអង់គ្លេស២០សម័យឈ្នះពាន Europa League EFL Cup និង Community Shield ផង។
Mourinho ក៏មានកំណត់ត្រាក្នុងក្របខណ្ឌកំពូលអឺរ៉ុបផងដែរ ក្នុងនោះលោកបានជួយ Porto និង Inter Mila លើកពាន Champions League៕
Tag:
បាល់ទាត់
Jose Mourinho
Manchester United
© រក្សាសិទ្ធិដោយ thmeythmey.com