ក្រោមកិច្ចសហប្រតិបត្ដិការមេគង្គ-គង្គា រដ្ឋាភិបាលឥណ្ឌា បានផ្ដល់ជំនួយឥតសំណងជិត៩០ម៉ឺនដុល្លារ ដល់រដ្ឋាភិបាលកម្ពុជា សម្រាប់អនុវត្តន៍លើវិស័យនានា ដែលមានរយៈពេល២ឆ្នាំ។ នេះបើយោងតាមពិធីចុះហត្ថលេខាលើអនុស្សរណៈយោគយល់គ្នាស្តីពីជំនួយឥតសំណងរបស់សាធារណរដ្ឋឥណ្ឌា សម្រាប់ការអនុវត្តគម្រោងឆាប់ទទួលបានផលនៅកម្ពុជា នាព្រឹកថ្ងៃទី១៩ ខែមិថុនា ឆ្នាំ២០១៩។
រដ្ឋលេខាធិការក្រសួងការបរទេសកម្ពុជា លោក លុយ ដាវីត បានឲ្យដឹងថា រដ្ឋាភិបាលឥណ្ឌាបានផ្តល់ជំនួយគាំទ្រផ្នែកហិរញ្ញវត្ថុដល់ប្រទេសកម្ពុជា «ក្រោមកិច្ចសហប្រតិបត្ដិការមេគង្គ-គង្គា» លើគម្រោងចំនួន១៨ សម្រាប់ឆ្នាំ២០១៩-២០២០ ដែលមានថវិកាសរុបចំនួន ៨៩៥,១៤៥ដុល្លារ។
លោកបាននិយាយថា៖«ចាប់តាំងពីឆ្នាំ២០១៥ មក កម្ពុជាទទួលបានគម្រោងសរុបចំនួន៣៤ ដែលមានវិសាលភាពគ្របដណ្តប់ លើសកម្មភាពកិច្ចសហប្រតិបត្តិការ ក្នុងវិស័យ សុខាភិបាល, កសិកម្ម, អប់រំ, បរិស្ថាន, ការអភិវឌ្ឍជំនាញ, ការផ្តល់សិទ្ធិអំណាចដល់ស្ត្រី, ការអភិវឌ្ឍជនបទ, ធនធានទឹក និងបច្ចេកទេសព័ត៌មានវិទ្យា»។
រដ្ឋលេខាធិការរូបនេះបន្តថា កម្ពុជាប្តេជ្ញា ក្នុងការពង្រឹងកិច្ចសហប្រតិបត្តិការអនុតំបន់នេះ ដោយផ្អែកលើសកម្មភាព អនុវត្តជាក់ស្តែង ដែលនឹងផ្តល់អត្ថប្រយោជន៍ដល់កម្ពុជា និងតំបន់មេគង្គ។
អ្នកស្រី Manika Jain ឯកអគ្គរដ្ឋទូតនៃសាធារណរដ្ឋឥណ្ឌា បានឲ្យដឹងថាគម្រោងទាំង១៨ ដែលត្រូវចុះហត្ថលេខានៅព្រឹកនេះ រួមមាន គម្រោង៦ នឹងងផ្តល់ទៅឲ្យក្រសួងសុខភិបាល គម្រោង៤ សម្រាប់ក្រសួងអភិវឌ្ឍន៍ជនបទ គម្រោង២ សម្រាប់ក្រសួងធនធានទឹក និងឧតុនិយម គម្រោង២ សម្រាប់ក្រសួងប្រៃសណីយ៍និងទូរគមនាគមន៍ គម្រោង២ សម្រាប់ក្រសួងកិច្ចការនារី គម្រោង១ សម្រាប់ក្រសួងវប្បធម៌និងវិចិត្រសិល្បៈ និងគម្រោង១ចុងក្រោយសម្រាប់ក្រសួងបរិស្ថាន។
អ្នកស្រីបាននិយាយថា៖«រដ្ឋាភិបាលឥណ្ឌានឹងបន្តកិច្ចសហប្រតិបត្តិការ និងគាំទ្រជាមួយរដ្ឋាភិបាលកម្ពុជាបន្តទៀត ក្នុងក្របខ័ណ្ឌកិច្ចសហប្រតិបត្ដិការមេគង្គ-គង្គា»។
គួររម្លឹកថា គិតចាប់ពីឆ្នាំ២០១៥ មក រដ្ឋាភិបាលឥណ្ឌាបានផ្តល់ជំនួយដល់រដ្ឋាភិបាលកម្ពុជា ក្រោមកិច្ចសហប្រតិបត្ដិការមេគង្គ-គង្គា ចំនួន៣១ គម្រោង ដែលគិតជាទឹកប្រាក់សរុបចំនួន ១,៧ លានដុល្លារ៕