អន្តរជាតិ
ប្រធានាធិបតីចិន ស៊ី ជិនភីង ជួបជាមួយសមភាគីអាមេរិក ដូណាល់ ត្រាំ នៅក្រៅកិច្ចប្រជុំប្រទេស G20 នៅអាហ្សង់ទីនក្នុងឆ្នាំ២០១៨ ។
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ និងប្រធានាធិបតីចិន ស៊ី ជិនភីង បានសន្យាជួបគ្នាទឹកដីជប៉ុនអំឡុងកិច្ចប្រជុំប្រទេសសេដ្ឋកិច្ចលូតលាស់ខ្លាំងទាំង២០ (G20) នៅសប្ដាហ៍នេះ។ គម្រោងជួបគ្នានេះ ត្រូវបានព្រមព្រៀងនាការសន្ទនាតាមទូរសព្ទរបស់មេដឹកនាំទាំងពីរនៅថ្ងៃទី១៨ ខែមិថុនា។ ការខ្វែងគំនិតគ្នាលើវិស័យពាណិជ្ជកម្ម គឺជាប្រធានបទសំខាន់នៃជំនួបនេះ ហើយគេរំពឹងថា នឹងមានភាពជឿនលឿនថ្មីទៀតក្នុងការចរចាឈានទៅបញ្ចប់ជម្លោះរវាងអំណាចទាំងពីរ។
ប្រធានាធិបតីអាមេរិក និងចិន បានជជែកគ្នាតាមទូរសព្ទជាមួយគ្នានៅថ្ងៃទី១៨ ខែមិថុនា ដែលផ្ដោតលើគម្រោងជួបគ្នានៅទីក្រុងអូសាកា ទឹកដីជប៉ុន ជាទីដែលមេដឹកនាំទាំងពីរនឹងចូលរួមជំនួបប្រចាំឆ្នាំនៃប្រទេសមានសេដ្ឋកិច្ចរីកចម្រើនទាំង២០ លើពិភពលោក (G20) ។ បើតាមទូរទស្សន៍រដ្ឋចិន CCTV លោក ដូណាល់ ត្រាំ បានស្នើសុំជជែកតាមទូរសព្ទជាមួយលោក ស៊ី ជិនភីង ហើយលោក ស៊ី ក៏បានឯកភាពតាមសំណើ។
លោក ត្រាំ បានសរសេរតាមរយៈ Twitter របស់ខ្លួនថា លោកមានកិច្ចសន្ទនាល្អជាមួយលោក ស៊ី ហើយនឹងជួបគ្នានៅសប្ដាហ៍ក្រោយអូសាកា។ លោកបន្តថា មន្ត្រីប្រទេសទាំងពីរ នឹងធ្វើការជាមួយគ្នាដើម្បីរៀបចំជំនួបនេះ។ ដោយឡែកនៅក្នុងសេចក្ដីប្រកាសរបស់សេតវិមានវិញ លោក ត្រាំ និងលោកស៊ី ក៏បានជជែកពីសារសំខាន់ក្នុងការបង្កើតបរិយាកាសរកស៊ីដែលស្មើភាពសម្រាប់ប្រទេសទាំងពីរតាមរយៈទំនាក់ទំនងសេដ្ឋកិច្ចមានទៅមានមក។
ដោយឡែកបើតាមទូរទស្សន៍រដ្ឋចិន ប្រធានាធិបតីចិន បានប្រាប់សមភាគីអាមេរិកថា ទំនាក់ទំនងប្រទេសទាំងពីរជួបបញ្ហាខ្លះ ដែលជារឿងភាគីនីមួយៗមិនចង់បាន។ លោក ស៊ី បន្តថា បចិន និងអាមេរិកនឹងទទួលបានផលប្រយោជន៍ដូចគ្នាតាមរយៈកិច្ចសហប្រតិបត្តិការល្អ ប៉ុន្តែនឹងខាតបង់ដដែល បើប្រឈមមុខដាក់គ្នានោះ។
ទីក្រុងប៉េកាំង និងទីក្រុងវ៉ាស៊ីនតោន កំពុងជាប់ដៃក្នុងសង្គ្រាមពាណិជ្ជកម្មដែលចាប់ផ្ដើមតាំងពីពាក់កណ្ដាលឆ្នាំ២០១៨ មក។ ការចរចា១១ដងរវាងមន្ត្រីជាន់ខ្ពស់ ដែលបានផ្អាកច្រើនខែមកនេះ ហៀបនឹងសម្រេចបានកិច្ចព្រមព្រៀងសម្រាប់មេដឹកនាំចុះហត្ថលេខាទៅហើយ ប៉ុន្តែចុងក្រោយបែរជាគ្មានលទ្ធផលទៅវិញ។ អាមេរិក និងចិនចោទគ្នាទៅវិញទៅមកពីការដើរថយនៃការចរចានេះ។ ចិនអះអាងថា អាមេរិកដាក់លក្ខខណ្ឌច្រើនពេក ទើបខ្លួនមិនអាចធ្វើតាមបាន។
អ្វីជាក្ដីរំពឹងនោះ ជំនួបនៅអូសាកានៅសប្ដាហ៍ក្រោយ អាចបញ្ឆេះម៉ាស៊ីនចរចាឡើងវិញដើម្បីឈានទៅបញ្ចប់ជម្លោះរបស់មហាអំណាចសេដ្ឋកិច្ចទាំងពីរ។ ក្នុងកិច្ចសន្ទនាតាមទូរសព្ទដដែល លោក ស៊ី ប្រាប់លោក ត្រាំ ទៀតថា មន្ត្រីចរចាប្រទេសទាំងពីរ គួរបន្តទំនាក់ទំនងគ្នាដើម្បីដោះស្រាយភាពមិនដូចគ្នា ដែលជាបញ្ហាស្នូលនៃទំនាក់ទំនងទ្វេភាគី ហើយដំណោះស្រាយ ត្រូវធ្វើឡើងតាមការជជែកគ្នាដោយគោលការណ៍ស្មើភាព។
ខណៈព័ត៌មាននៃគម្រោងជួបគ្នារវាងលោក ស៊ី និងលោក ត្រាំ ជារឿងវិជ្ជមាន មន្ត្រីផ្នែកសេដ្ឋកិច្ចនៅសេតវិមាន បែរជាព្រមានពីការខកចិត្តទៅវិញ។ លោក Larry Kudlow ទីប្រឹក្សាសេដ្ឋកិច្ចរបស់លោក ត្រាំ និយាយថា មិនមានការធានាណាមួយថា ជំនួបនៅអូសាកា អាចមានលទ្ធផលវិជ្ជមានឡើយ ដ្បិតជំហររបស់អាមេរិកនៅតែដដែល គឺចិនត្រូវតែកែទម្រង់រចនាសម្ព័ន្ធសេដ្ឋកិច្ចរបស់ខ្លួនដើម្បីការធ្វើពាណិជ្ជកម្មស្មើភាព។ យ៉ាងណា លោក Kudlow ចាត់ទុកជំនួបនេះជារឿងល្អ៕
Tag:
ចិន
អាមេរិក
ដូណាល់ ត្រាំ
ស៊ី ជិនភីង
ជប៉ុន
© រក្សាសិទ្ធិដោយ thmeythmey.com
