ជាតិ
ក្រសួងទេសចរណ៍ម៉ាឡេស៊ី នាំអ្នកកាសែតនៃសារព័ត៌មានថ្មីៗ និងហ្រ្វេសញូ ទៅចូលរួមព្រឹត្តិការណ៍ MEGA FAM
×![]()
ដោយ: សារព័ត៌មានថ្មីៗ
ក្រសួងទេសចរណ៍ម៉ាឡេស៊ី តាមរយៈក្រុមប្រឹក្សាផ្សព្វផ្សាយទេសចរណ៍ម៉ាឡេស៊ីប្រចាំកម្ពុជា បានអញ្ជើញអ្នកសារព័ត៌មានកម្ពុជាពីរនាក់ ពីស្ថាប័នផ្សេងគ្នាដើម្បីទៅចូលរួមក្នុងព្រឹត្តិការណ៍ Malaysia Mega Familiarisation Tour Programme (MEGA FAM) ក្នុងពិធីបើកការប្រារព្ធពិធីបុណ្យ EID Al-FITR ឆ្នាំ២០១៩។ ព្រឹត្តិការណ៍នេះ នឹងប្រារព្ធធ្វើរយៈពេល៦ថ្ងៃ នៅទីក្រុងកូឡាឡាំពួរ ប្រទេសម៉ាឡេស៊ី។
អ្នកសារព័ត៌មានដែលនឹងត្រូវចូលរួមកម្មវិធីផ្សព្វផ្សាយគោលដៅទេសចរណ៍នៅប្រទេសម៉ាឡេស៊ីចាប់ពីថ្ងៃទី២០ដល់ទី២៥ មិថុនា ក្នុងនោះរួមមាន អ្នកនាង អ៊ីសា រ៉ហានី អ្នកយកព័ត៌មាននៃគេហទំព័រសារព័ត៌មានអនឡាញថ្មីៗ និងលោក ពិសិដ្ឋ មកពីអង្គភាពសារព័ត៌មានហ្វ្រេសញូ។ អ្នកសារព័ត៌មានទាំងពីរ នឹងត្រូវធ្វើទស្សនកិច្ចនៅតាមរមណីយដ្ឋាននិងគោលដៅទេសចរណ៍មួយចំនួនក្នុងទីក្រុងកូឡាឡាំពួរ ដូចជា អគារភ្លោះ Petronas, សារមន្ទីរ, Malaysia cartoon & Comic House ពិសេសគឺការចូលរួមបើកការប្រារព្ធពិធី EID Al-FITR ឆ្នាំ២០១៩ ដែលជាពិធីបុណ្យប្រចាំឆ្នាំដ៏ធំមួយសម្រាប់ប្រទេសម៉ាឡេស៊ី។ លោកនាយករដ្ឋមន្ត្រី មហាធៀ ក៏គ្រោងនឹងមានវត្តមានចូលរួមក្នុងពិធីបើកព្រឹត្តិការណ៍ដ៏ធំនេះដែរ។
MEGA FAM គឺយុទ្ធនាការទេសចរណ៍ម៉ាឡេស៊ី ទៅដល់ស្ថាប័នផ្សព្វផ្សាយទូទាំងពិភពលោក។ បង្កើតឡើងតាំងពីឆ្នាំ២០០០មក ព្រឹត្តិការណ៍នេះមានអ្នកចូលរួមជាង១០០០នាក់រួចមកហើយ ដែលពួកគេសុទ្ធសឹងជាអ្នកសារព័ត៌មាននិងអ្នកគ្រប់គ្រងក្រុមហ៊ុនបោះពុម្ពផ្សាយផ្សេងៗ។ ព្រឹត្តិការណ៍ក៏មានកិច្ចសហការចូលរួមពីក្រុមហ៊ុនអាកាសចរណ៍ក្នុងនិងក្រៅប្រទេស, បណ្ដាសណ្ឋាគារ និងស្ថាប័នរាជរដ្ឋាភិបាល។ ព្រឹត្តិការណ៍នេះ គឺដើម្បីបង្កើនការយល់ដឹង និងផ្សព្វផ្សាយគោលដៅទេសចរណ៍នានាក្នុងប្រទេសម៉ាឡេស៊ី៕
© រក្សាសិទ្ធិដោយ thmeythmey.com
