អន្តរជាតិ
បក្សប្រឆាំងរិះគន់លោក ប្រាយុទ្ធ ដែលបន្តដឹកនាំគណៈរដ្ឋមន្ត្រីរបបយោធា ទាំងខ្លួនជានាយករដ្ឋមន្ត្រីថ្មី រូបភាព The Nation
× មកទល់ពេលនេះ ថៃ នៅមិនទាន់គណៈរដ្ឋមន្ត្រីថ្មីដែលកើតចេញពីការបោះឆ្នោតថ្ងៃទី២៤ ខែមីនានៅឡើយទេ។ លោក ប្រាយុទ្ធ ចន្ទអូចា ដែលត្រូវបានសភាជ្រើសតាំងជានាយករដ្ឋមន្ត្រីនោះ បន្តដឹកនាំគណៈរដ្ឋមន្ត្រីចាស់ដែលសល់ពីរបបយោធាដដែល។ បក្សអនាគតឈានមុខដែលជាបក្សប្រឆាំងក្នុងសភាថ្មី បានចោទសួរពីធម្មនុញ្ញភាពនៃដំណើរការនេះ ប៉ុន្តែប្រធានរដ្ឋសភានៃសម្ព័ន្ធភាពកាន់អំណាច ថា វាជារឿងស្របតាមច្បាប់។
មិនទាន់បង្កើតគណៈរដ្ឋមន្ត្រីថ្មីបាន អាចដឹកនាំគណៈរដ្ឋមន្ត្រីចាស់សិន? ប្រធានបទនេះ ក្លាយជាអាវុធសម្រាប់ក្រុមប្រឆាំងប្រើក្នុងការរិះគន់លោក ប្រាយុទ្ធ ចន្ទអូចា នាយករដ្ឋមន្ត្រីទី២៩ របស់រាជាណាចក្រថៃ។ លោក ប្រាយុទ្ធ ដែលត្រូវបានសភាថ្មីកើតចេញពីការបោះឆ្នោតថ្ងៃទី២៤ ខែមីនា គាំទ្រឲ្យធ្វើនាយករដ្ឋមន្ត្រីនោះ បានបន្តដឹកនាំកិច្ចប្រជុំគណៈរដ្ឋមន្ត្រីចាស់ដែលលោកបង្កើតអំឡុងពេលរបបយោធាគ្រប់គ្រងប្រទេស។
សមាជិកសភាបក្សអនាគតឈានមុខ Piyabutr Saengkanokkul នៅថ្ងៃទី១៩ ខែមិថុនា និយាយថា កិច្ចប្រជុំគណៈរដ្ឋមន្ត្រីប្រចាំសប្ដាហ៍ដែលធ្វើនៅថ្ងៃទី១៨ ខែមិថុនា អាចខុសច្បាប់រដ្ឋធម្មនុញ្ញប្រទេស។ អ្នកនយោបាយវ័យក្មេងរូបនេះ អះអាងថា លោក ប្រាយុទ្ធ ត្រូវបានមហាក្សត្រតែងតាំងជានាយករដ្ឋមន្ត្រីទៅហើយ តែបន្តដឹកនាំគណៈរដ្ឋមន្ត្រីចាស់ទៀត ដែលការណ៍នេះអាចនាំឲ្យមានការយល់ច្រឡំ។កាសែតថៃ The Nation ផ្សាយថា លោក Piyabutr ស្នើឲ្យលោក ប្រាយុទ្ធ ចេញមុខបកស្រាយ។
នៅឯសភាសមាជិកបក្សអនាគតឈានមុខ ក៏បានស្នើមានការជជែកលើបញ្ហានេះដែរ។ បក្សទើបបង្កើតថ្មីតែទទួលបានការគាំទ្រគួរឲ្យកត់សម្គាល់នោះ អះអាងថា ព្រះរាជក្រឹត្យរបស់មហាក្សត្រ មហា វជិរាលង្ករណ៍ បានបញ្ចប់អាណត្តិនាយករដ្ឋមន្ត្រីនៃរបបយោធារបស់លោក ប្រាយុទ្ធ ទៅហើយ ដូចនេះគណៈរដ្ឋមន្ត្រីចាស់ ក៏ត្រូវអស់សុភពភាពដូចគ្នា។ ចន្លោះពេលនេះ លេខាធិការអចិន្ត្រៃយ៍តាមក្រសួងនីមួយៗ ជាអ្នកចាត់ចែងការងាររហូតមានរដ្ឋមន្ត្រីថ្មី។
យ៉ាងណាមិញ ប្រធានសភាថៃ Chuan Leekpai បានទាត់ចោលសំណើរបស់បក្សអនាគតឈានមុខដែលចង់ឲ្យមានការជជែកពីលក្ខណៈសម្បតិ្តរបស់រដ្ឋាភិបាលលោក ប្រាយុទ្ធ ។ ប្រធានសភាមកពីប្រជាធិបតេយ្យដែលនៅក្រោមសម្ព័ន្ធភាពកាន់អំណាចនេះ លើកយកមាត្រា២៦៤ នៃរដ្ឋធម្មនុញ្ញដែលអនុញ្ញាតឲ្យគណៈរដ្ឋមន្ត្រីសល់ពីរបបយោធាអាចធ្វើការរបស់ខ្លួនរហូតសមាសភាពគណៈរដ្ឋមន្ត្រីថ្មីចូលកាន់តំណែង។
ជុំវិញសមាសភាពគណៈរដ្ឋមន្ត្រីថ្មី លោក Wissanu Krea-ngam ឧបនាយករដ្ឋមន្ត្រីរដ្ឋាភិបាលមុននិយាយថា បញ្ជីឈ្មោះបេក្ខភាពដែលត្រូវដឹកនាំក្រសួង បានទៅដល់ដៃលោក ប្រាយុទ្ធ ហើយ។ បញ្ជីនេះ ជាការរួមបញ្ចូលគ្នារបស់គណបក្សក្នុងសម្ព័ន្ធភាពកាន់អំណាចដឹកនាំដោយបក្សកម្លាំងប្រជារាស្ត្រ។ ថ្លែងប្រាប់អ្នកសារព័ត៌មាននៅថ្ងៃទី១៨ ខែមិថុនា លោក ប្រាយុទ្ធ អះអាងថា លោកនឹងរៀបចំបញញ្ជីឈ្មោះឲ្យរួចរាល់នៅត្រឹមដំណាច់ខែមិថុនានេះ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com