កីឡាអន្តរជាតិ
អន្តរជាតិ
Mata បន្តនៅជាមួយ Man Utd ២ឆ្នាំទៀត ស្របពេល Walker បន្ថែម២ឆ្នាំលើកិច្ចសន្យាចាស់ឲ្យ Man City
× ខ្សែបម្រើ Juan Mata បានយល់ព្រមបន្តកិច្ចសន្យារយៈពេល២ឆ្នាំទៀតជាមួយ Manchester United ពោលគឺរហូតដល់ឆ្នាំ២០២១។ ចំណែកខ្សែការពារស្លាបស្តាំ Kyle Walker ក៏ព្រមបន្ថែមរយៈពេល២ឆ្នាំលើកិច្ចសន្យាចាស់ជាមួយ Manchester City រហូតដល់ឆ្នាំ២០២៤ផងដែរ។
Mata ដែលបានផ្ទេរពី Chelsea ទៅកាន់ទឹកដី Old Trafford ក្នុងតម្លៃ៣៧.១លានផោន (៤៧លានដុល្លារអាមេរិក) កាលពីខែមករា ឆ្នាំ២០១៤ នឹងត្រូវបញ្ចប់កិច្ចសន្យារបស់ខ្លួននៅថ្ងៃទី៣០ ខែមិថុនានេះ។
ប៉ុន្តែក្រោយមានការចរចាគ្នារវាងក្លិបជាមួយសមីខ្លួនរួចមក ខ្សែបម្រើសញ្ជាតិអេស្ប៉ាញ វ័យ៣១ឆ្នាំរូបនេះ បានយល់ព្រមបន្តស្នាក់នៅជាមួយក្រុមបិសាចក្រហមរហូតដល់ឆ្នាំ២០២១ ព្រមទាំងផ្តល់លក្ខខណ្ឌពន្យារ១ឆ្នាំពីលើថែមទៀត។ រយៈពេល៥រដូវកាលកន្លងមក Mata អាចរកគ្រាប់បាល់ស៊ុតបញ្ចូលទីសរុបចំនួន ៤៥គ្រាប់ ក្នុងការបង្ហាញខ្លួន១៧៨ប្រកួត។
«ខ្ញុំបានរួមរស់ជាមួយ Manchester United អស់រយៈពេល៥ឆ្នាំមកហើយ ហើយខ្ញុំពិតជាមានមោទកភាពណាស់ដែលអាចហៅ Old Trafford ថាជាផ្ទះរបស់ខ្ញុំ។ ខ្ញុំសប្បាយចិត្តក្នុងការបន្តជាមួយក្រុមដ៏អស្ចារ្យ នឹងក្លាយជាផ្នែកមួយដើម្បីប្រជែងពាននៅរដូវកាលបន្តបន្ទាប់»។ នេះជាការអះអាងរបស Mata។
ដោយឡែកអ្នកចាត់ការទូទៅ Man Utd លោក Ole Gunnar Solskjaer បានបង្ហាញអារម្មណ៍សប្យាយរីករាយយ៉ាងខ្លាំងដោយសរសើរ Mata ជាកីឡាករដ៏ជំនាញ និងមានភាពវ័យឆ្លាតបំផុតដែលលោកធ្លាប់ធ្វើការជាមួយ។
ស្របពេលជាមួយគ្នានេះដែរ Kyle Walker ខ្សែការពារសម្រើសជាតិអង់គ្លេសវ័យ២៩ឆ្នាំក៏បានបន្តកិច្ចសន្យាឲ្យ Man City ក្រុមម្ចាស់ជើងឯក Premier League ចំនួន២ឆ្នាំទៀត បើទោះកិច្ចសន្យារបស់រូបគេត្រូវបញ្ចប់នៅឆ្នាំ២០២២ក្តី។
Walker ដែលផ្ទេរពី Tottenham Hotspure ក្នុងតម្លៃ៥៣លានផោន (៦៧លានដុល្លារអាមេរិក) ក្នុងឆ្នាំ២០១៧ បានបង្ហាញខ្លួន៨៩ប្រកួតឲ្យក្រុមមេឃខៀវសម្រាប់រយៈពេល២រដូវកាលនេះ។
ខ្សែការពារដែលមានល្បឿនលឿនរូបនេះបានជួយក្រុមរបស់លោក Pep Guardiola ឈ្នះពាន៣ក្នុងមួយរដូវកាល រួមមាន FA Cup, EFL Cup និង Premier League នារដូវកាល ២០១៨-១៩៕
Tag:
បាល់ទាត់
Juan Mata
Kyle Walker
© រក្សាសិទ្ធិដោយ thmeythmey.com