អន្តរជាតិ
លោក គីម ប្រាប់លោក ស៊ី៖ កូរ៉េខាងជើង ធ្វើរឿងច្រើនដើម្បីសន្តិភាពតំបន់ តែគ្មានបានផលមកវិញ ប្រធានាធិបតីចិន ស៊ី ជិនភីង ចាប់ដៃមេដឹកនាំកូរ៉េខាងជើង គីម ជុងអ៊ុន មុនជំនួបនៅព្យុងយ៉ាង។ រូបភាព Xinhua
× មេដឹកនាំកូរ៉េខាងជើង គីម ជុងអ៊ុន បានស្វាគមន៍ប្រធានាធិបតីចិន ស៊ី ជិនភីង យ៉ាងរាក់ទាក់បំផុតក្នុងដំណើរទស្សនកិច្ចផ្លូវរដ្ឋពីរថ្ងៃ ដែលចាប់ផ្ដើមតាំងពីថ្ងៃទី២០ និងបញ្ចប់វិញនៅថ្ងៃទី២១ ខែមិថុនានេះ។ ទំនាក់ទំនងទ្វេភាគី និងបញ្ហានៅឧបទ្វីបកូរ៉េ ជារបៀបវារៈសំខាន់ដែលត្រូវបានជជែកក្នុងជំនួបនៅព្យុងយ៉ាង។ លោក គីម ប្រាប់លោក ស៊ី ថា កូរ៉េខាងជើង បានធ្វើរឿងជាច្រើនដើម្បីសន្តិភាពតំបន់ តែគ្មានបានផលមកវិញឡើយ។
ក្រោយការទទួលស្វាគមន៍យ៉ាងអធិកអធមទាំងនៅព្រលានយន្តហោះ និងតាមដងផ្លូវក្នុងរដ្ឋធានីព្យុងយ៉ាង ប្រធានាធិបតីចិន ស៊ី ជិនភីង និងមេដឹកនាំកូរ៉េខាងជើង គីម ជុងអ៊ុន ក៏បើកជំនួបចរចាផ្លូវការ ដែលនេះជាជំនួបលើកទី៥ហើយរវាងមេដឹកនាំទាំងពីរ។ លោក ស៊ី និងភរិយា ទៅដល់កូរ៉េខាងជើងនៅថ្ងៃទី២០ ខែមិថុនា ក្នុងនាមជាប្រធានាធិបតីចិនដំបូងដែលធ្វើទស្សនកិច្ចផ្លូវរដ្ឋនៅប្រទេសជិតខាងមួយនេះក្នុងរយៈពេល១៤ឆ្នាំចុងក្រោយ។
ដំណើរទស្សនកិច្ចរបស់លោក ស៊ី ធ្វើឡើងស្របពេលដែលដំណើរការរំសាយនុយក្លេអ៊ែរកូរ៉េខាងជើងដែលកំពុងចរចាជាមួយអាមេរិក ជាប់គាំង។ កូរ៉េខាងជើង បានទម្លាក់រុញកំហុសឲ្យអាមេរិកចំពោះការរាំងស្ទះការចរចា ពិសេសជំនួបបរាជ័យនៅវៀតណាម។
នាជំនួបនៅព្យុងយ៉ាង លោក គីម បានប្រាប់លោក ស៊ី ថា នាឆ្នាំកន្លងទៅ កូរ៉េខាងជើងបានចាត់វិធានការជាច្រើនដើម្បីបញ្ចៀសភាពតានតឹង និងគ្រប់គ្រងស្ថានការណ៍នៅឧបទ្វីបកូរ៉េ តែមិនបានទទួលមកវិញនូវការឆ្លើយតបវិជ្ជមានឡើយពីភាគីពាក់ព័ន្ធឡើយ។ ប្រមុខដឹកនាំកូរ៉េខាងជើងថា សកម្មភាពនេះ មិនមែនជាអ្វីដែលកូរ៉េខាងជើងចង់ឃើញឡើយ។ ទោះមិននិយាយចំឈ្មោះ ភាគីដែលលោក គីម និយាយសំដៅ គឺអាមេរិកតែម្ដង។
«កូរ៉េខាងជើងមានឆន្ទៈរក្សាការអត់ធ្មត់របស់ខ្លួន និងសង្ឃឹមថា ភាគីម្ខាងទៀត នឹងធ្វើការជាមួយកូរ៉េខាងជើងដើម្បីរកដំណោះស្រាយដែលផ្ដល់ប្រយោជន៍ទាំងសងខាង ហើយបង្កើតលទ្ធផលតាមការចរចា។» នេះជាការបញ្ជាក់របស់លោក គីម ចំពោះមុខលោក ស៊ី ។ ការប្រកាសរក្សាភាពអត់ធ្មត់បែបនេះ ទំនងជាអាចរក្សាបរិយាកាសល្អប្រសើរសម្រាប់ការចរចាជាមួយអាមេរិក ទោះជាបច្ចុប្បន្នមិនមានសញ្ញាថា ភាគីទាំងពីរ អាចជួបគ្នាជាថ្មីក្ដី។
ចិនគាំទ្រការរកដោះស្រាយផ្លូវនយោបាយសម្រាប់បញ្ហានៅឧបទ្វីបកូរ៉េ។ នេះជាការធានារបស់លោក ស៊ី ទៅកាន់លោក គីម ។ បើតាមទីភ្នាក់ងារព័ត៌មាន Xinhua ប្រធានាធិបតីចិន ក៏បានសរសើរកូរ៉េខាងជើងដែលប្រឹងប្រែងការពារសន្តិភាព និងស្ថិរភាពនៅឧបទ្វីបកូរ៉េ ក៏ដូចជាចង់រំសាយនុយក្លេអ៊ែរផងដែរ។ លោកក៏ប្រាប់លោក គីម ទៀតថា ចិននឹងផ្ដល់ជំនួយតាមសមត្ថភាពរបស់ខ្លួនដល់កូរ៉េខាងជើងដើម្បីការពារប្រយោជន៍របស់ខ្លួន និងស្ថិរភាពយូរអង្វែងនៅក្នុងតំបន់។
ជាមួយនឹងដំណើរទស្សនកិច្ចលើកដំបូងក្នុងនាមជាប្រធានាធិបតីចិន លោក ស៊ី កំពុងផ្ដល់សារជាសាធារណៈមួយទៅកាន់អន្តរជាតិ។ នោះ គឺការដោះស្រាយបញ្ហានៅឧបទ្វីបកូរ៉េ មិនអាចខ្វះវត្តមានចិនបានឡើយ ទោះជាមានរឿងអ្វីក៏ដោយចុះ។ អាមេរិក ទំនងជាអ្នកយល់ច្បាស់ពីសារនេះជាងគេ។ លើសពីនោះ ការកាន់សន្លឹកបៀកូរ៉េខាងជើងនេះ ក៏ជាជំនួយដ៏ធំមួយសម្រាប់ចិនតទល់ជាមួយអាមេរិកក្នុងសង្គ្រាមពាណិជ្ជកម្មផងដែរ៕
Tag:
កូរ៉េខាងជើង
ចិន
ស៊ី ជិនភីង
គីម ជុងអ៊ុន
© រក្សាសិទ្ធិដោយ thmeythmey.com