គណបក្សអភិរក្សកំពុងកាន់អំណាចនៅអង់គ្លេស រកឃើញបេក្ខជនពីរនាក់ដែលត្រូវតទល់គ្នាដើម្បីស្នងតំណែងបន្តពីលោកស្រី ថេរ៉េសា ម៉េយ៍ ។ នៅជុំចុងក្រោយ អតីតរដ្ឋមន្ត្រីការបរទេស បូរីស ចនសុន ត្រូវប្រជែងជាមួយរដ្ឋមន្ត្រីការបរទេសបច្ចុប្បន្ន ជេរេមី ហាន់ ( Jeremy Hunt) ។ បេក្ខជនទាំងពីរ ទទួលសំឡេងគាំទ្រលំដាប់ទីមួយ និងទីពីរក្នុងការបោះឆ្នោតជម្រុះថ្ងៃទី២០ ខែមិថុនា។ លទ្ធផលចុងក្រោយ នឹងត្រូវប្រកាសនៅខែកក្កដា។
ពីដប់នាក់ មកត្រឹមពីរនាក់។ ឆ្លងកាត់ការបោះឆ្នោតជម្រុះប្រាំជុំរួចមក បេក្ខជនពីរនាក់ចុងក្រោយដែលត្រូវស្នងតំណែងបន្តពីលោកស្រី ថេរ៉េសា ម៉េយ៍ ហើយ។ មន្ត្រីការទូតអង់គ្លេសពីរនាក់ នឹងត្រូវតទល់គ្នាដើម្បីសម្រេចថា នរណានឹងក្លាយជាប្រធានបក្សអភិរក្សថ្មី ហើយក្លាយជានាយករដ្ឋមន្ត្រីអង់គ្លេសជំនួសលោកស្រី ម៉េយ៍ ។
ក្នុងការបោះឆ្នោតជម្រុះជុំទីប្រាំថ្ងៃទី២០ ខែមិថុនា អតីតរដ្ឋមន្ត្រីការបរទេស បូរីស ចនសុន ដែលតែងទទួលសំឡេងនាំមុខគេក្នុងការបោះឆ្នោតបួនជុំកន្លងមក បន្តឈរលេខរៀងទីមួយដដែល ដោយទទួលសំឡេងគាំទ្រចំនួន១៦០ ពីអង្គបោះឆ្នោតសរុប៣១៣ ។ រដ្ឋមន្ត្រីការបរទេសសព្វថ្ងៃ ជេរេមី ហាន់ នៅលំដាប់ទីពីរ ជាមួយនឹងសំឡេងគាំទ្រ៧៧ ។ ដូចនេះ លោក ចនសុន និងលោក ហាន់ ត្រូវប្រជែងគ្នានៅវគ្គចុងក្រោយដែលមានសមាជិកបក្សទូទាំងប្រទេសជាង១៦ម៉ឺននាក់ ជាអង្គបោះឆ្នោត។
លោក ចនសុន ដែលជាអតីតអភិបាលក្រុងឡុងដ៍ ពេញចិត្តលទ្ធផលបោះឆ្នោតនេះជាខ្លាំង ព្រោះលោកទទួលបានការគាំទ្រពីសហការីក្នុងសំឡេងច្រើនជាងពាក់កណ្ដាលនៃសំឡេងសរុប។ បើតាមទីភ្នាក់ងារព័ត៌មាន AFP លោក ចនសុន លើកឡើងថា លោកនឹងធ្វើដំណើរទៅទូទាំងប្រទេសដើម្បីបង្ហាញគោលនយោបាយរបស់លោកទៅកាន់ប្រជាជន បង្រួបបង្រួមប្រទេស និងបង្កើតអនាគតភ្លឺស្វាងឲ្យប្រជាជនផងដែរ។
ចាប់ពីថ្ងៃទី២២ ខែមិថុនាទៅ បេក្ខជនទាំងពីរ នឹងចាប់ផ្ដើមឃោសនារកការគាំទ្រពីសមាជិកមូលដ្ឋានទូទាំងប្រទេស។ លទ្ធផលនៃការបោះឆ្នោតជ្រើសរើសមេដឹកនាំបក្សអភិរក្ស នឹងត្រូវប្រកាសនៅអំឡុងសប្ដាហ៍នៃថ្ងៃទី២២ ខែកក្កដាខាងមុខ។
គោលជំហរបេក្ខជនលើការចាកចេញពីសហភាពអឺរ៉ុប
ទាំងលោក ចនសុន ទាំងលោក ហាន់ សុទ្ធតែប្រកាន់ជំហរហអូសដៃអង់គ្លេសពីសហភាពអឺរ៉ុបដូចគ្នា ប៉ុន្តែលោក ចនសុន ហាក់មានជំហរដាច់ខាតជាង។ តាមកាលបរិច្ឆេទថ្មី អង់គ្លេសត្រូវចាកចេញពីសហភាពអឺរ៉ុបនៅថ្ងៃទី៣១ ខែតុលា ដែលនេះធ្វើឲ្យអនាគតនាយករដ្ឋមន្ត្រីរបស់អង់គ្លេស មានពេលមិនច្រើនឡើយសម្រាប់ការស្វែងរកការគាំទ្រពីសភាដើម្បីសម្រេចឲ្យបានកិច្ចព្រមព្រៀងមួយនោះ។
សម្រាប់លោក ចនសុន អង់គ្លេស នឹងចាកចេញពីអឺរ៉ុបនៅថ្ងៃទី៣១ ខែតុលាជាដាច់ខាត មិនសំខាន់ថា មានឬមិនមានកិច្ចព្រមព្រៀងឡើយ។ ឯលោក ហាន់ វិញ សន្យានាំអង់គ្លេសចេញអឺរ៉ុបឲ្យបានលឿនតាមតែអាចធ្វើបាន ហើយលោកក៏បើកផ្លូវការដល់ការពន្យារពេលលែងលះម្ដងទៀតដែរ បើសិនជារយៈពេលនេះអាចរកបានកិច្ចព្រមព្រៀងមួយសមរម្យនោះ។ មានចំណុចដូចគ្នារវាងបេក្ខជនទាំងពីរ គឺអង់គ្លេសអាចចេញពីអឺរ៉ុបទាំងគ្មានកិច្ចព្រមព្រៀង។
មិនថាលោក ចនសុន ឬលោក ហាន់ ឡើយ អ្នកណាដែលស្នងតំណែងបន្តលោកស្រី ម៉េយ៍ ត្រូវតែស្វែរកការឯកភាពក្នុងសភាជាមុនសិន ទើបអាចនាំអង់គ្លេសចេញពីអឺរ៉ុបបានស្រួល។ បច្ចុប្បន្ន បក្សអភិរក្ស មានការបែកបាក់ខ្លាំងរវាងអ្នកគាំទ្រឲ្យចាកចេញដោយមានកិច្ចព្រមព្រៀង និងអ្នកដែលចង់ចាកចេញដាច់ខាត៕