កីឡាអន្តរជាតិ
អន្តរជាតិ
Torres ប្រកាសចូលនិវត្តន៍ពីអាជីពកីឡាករបាល់ទាត់ នៅត្រឹមអាយុ៣៥ឆ្នាំ
× Fernando Torres អតីតខ្សែប្រយុទ្ធឆ្នើម Liverpool និង Chelsea ប្រកាសចូលនិវត្តន៍ពីអាជីពកីឡាបាល់ទាត់នៅត្រឹមវ័យ៣៥ឆ្នាំ។ខ្សែប្រយុទ្ធសញ្ជាតិអេស្ប៉ាញរូបនេះ បានប្រើប្រាស់រយៈពេល១៨ឆ្នាំសម្រាប់អាជីពមួយនេះ តាំងពីលេងឲ្យ Atletico Madrid នៅឆ្នាំ ២០០១។ រហូតដល់បច្ចុប្បន្ន Torres កំពុងលេងឲ្យ Sagan Tosu ក្រុមក្នុងក្របខណ្ឌលីគកំពូលជប៉ុន (J1 League)។
Torres បង្ហាញខ្លួនឲ្យអេស្ប៉ាញចំនួន១១០ប្រកួត និងជាអ្នកស៊ុតគ្រាប់បាល់ជ័យឲ្យប្រទេសរបស់គេឈ្នះពាន Euro ឆ្នាំ២០០៨ និងជាកីឡាកររកគ្រាប់បាល់បានច្រើនជាងគេនៅ Euro ឆ្នាំ២០១២ ដែលអេស្ប៉ាញលើកពានដែរនោះ។
«បន្ទាប់ពីរយៈពេល១៨ឆ្នាំដ៏គួរឲ្យរំភើប នេះជាពេលវេលាដែលខ្ញុំត្រូវបញ្ចប់អាជីពជាកីឡាករបាល់ទាត់ហើយ»។ Torres និយាយបែបនេះនៅលើប្រព័ន្ធផ្សព្វផ្សាយសង្គម។ លោកបន្ថែមថា នឹងរៀបចំសន្និសីទសារព័ត៌មានមួយនៅទីក្រុងតូក្យូនៅថ្ងៃទី២៣ ខែមិថុនាខាងមុខដើម្បីពន្យល់លម្អិតពីការចូលនិវត្តន៍នេះ។
Torres បានផ្លាស់ពី AT-Madrid ទៅហង្សក្រហម Liverpool ក្នុងតម្លៃ ២០លានផោន (២៥លានដុល្លារអាមេរិក) នៅឆ្នាំ២០០៧ ដោយស៊ុតបញ្ចូលទីបាន៨១គ្រាប់ ក្នុង១៤២ប្រកួត។ ក្នុងឆ្នាំ២០១១ រូបគេបានផ្ទេរទៅចូលរួមជាមួយ Chelsea ក្នុងតម្លៃផ្ទេរខ្ពស់បំផុតជាកំណត់ត្រានៅអង់គ្លេសចំនួន ៥០ លានផោន (៦៣លានដុល្លារ)។
បើទោះបីមិនបានបង្ហាញទម្រង់លេងល្អឲ្យសមនឹងតម្លៃនៅ Stamford Bridge ក្តី ប៉ុន្តែ Torres បានជួយតោខៀវឈ្នះពាន Champions League នៅឆ្នាំ២០១២ រួមទាំងពានរង្វាន់ FA Cup និង Europa League ក្នុងឆ្នាំ២០១៣ផង។
ឆ្នាំ២០១៥ Torres បានត្រឡប់ទៅក្លិបចាស់របស់គេ AT-Madrid រហូតឆ្នាំ២០១៨ បានទៅចូលរួមក្លិបនៅជប៉ុន Sagan Tosu ដល់សព្វថ្ងៃ៕
Tag:
បាល់ទាត់
Fernando Torres
ចូលនិវត្តន៍
© រក្សាសិទ្ធិដោយ thmeythmey.com