អន្តរជាតិ
មុនជំនួបនៅបាងកក លោក មហាធៀ ស្នើអាស៊ានជួយក្រុមរ៉ូហ៊ីងយ៉ា
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី២១ ខែមិថុនា ប្រកាសជួយក្រុមជនភាគតិចរ៉ូហ៊ីងយ៉ាដែលស្វែងរកសិទ្ធិជ្រកកោននៅម៉ាឡេស៊ី។ លោក មហាធៀ ដែលរិះគន់រដ្ឋាភិបាលមីយ៉ាន់ម៉ាមិនសំចៃមាត់លើករណីជនភាគតិចមួយនេះ ក៏ស្នើឲ្យអាស៊ានជួយដោះស្រាយបញ្ហារ៉ាំរ៉ៃ និងបញ្ឈប់ការធ្វើទុក្ខបុកម្នេញលើពួកគេផង។ លោក មហាធៀ ស្នើបែបនេះ មុនកិច្ចប្រជុំអាស៊ាននៅថៃដែលចាប់ផ្ដើមនៅថ្ងៃទី២២ ខែមិថុនា។
វិបត្តិជនភៀសខ្លួនរ៉ូហ៊ីងយ៉ា នៅតែជាបញ្ហាក្ដៅក្នុងតំបន់ដដែល ខណៈមិនទាន់មានដំណោះស្រាយអ្វីនៅឡើយទេ។ ជនភាគតិចរ៉ូហ៊ីងយ៉ារាប់ម៉ឺននាក់ បានភៀសខ្លួនពីអំពើហិង្សា និងការរំលោភបំពានពីសំណាក់យោធាមីយ៉ាន់ម៉ា ទៅកាន់បង់ក្លាដែស ជាទីដែលពួកគេត្រូវប្រឈមមុខការខ្វះខាតគ្រប់សព្វបែបយ៉ាង។ ជីវភាពរស់នៅដ៏យ៉ាប់យ៉ឺន បានបង្ខំឲ្យជនភាគតិចមួយនេះ បន្តភៀសខ្លួនតាមផ្លូវសមុទ្រទៅកាន់ថៃ ម៉ាឡេស៊ី និងឥណ្ឌូណេស៊ីជាដើម។
ទោះមានការភ័យថា ពួកគេត្រូវលក់ដូរក្ដី ជនភៀសខ្លួនមួយក្រុមនេះ នៅតែប្រថុយធ្វើដំណើរទៅរកស្ថានភាពល្អប្រសើរជាងមុន។ ម៉ាឡេស៊ី ដែលជាគោលដៅសំខាន់របស់ជនភៀសខ្លួនរ៉ូហ៊ីងយ៉ា នឹងបន្តជួយពួកគេតាមលទ្ធភាព។ នេះបើតាមការលើកឡើងរបស់នាយករដ្ឋមន្ត្រីម៉ាឡេស៊ី មហាធៀ មហាម៉ាត់ ពីទីក្រុងបាងកកនៅថ្ងៃទី២១ ខែមិថុនា មុនមួយថ្ងៃការចាប់ផ្ដើមជំនួបប្រចាំឆ្នាំមេដឹកនាំអាស៊ានដែលថៃជាម្ចាស់ផ្ទះ។
ថ្លែងទៅកាន់អ្នកសារព័ត៌មានក្រៅវេទិកាជំនួញមួយ លោក មហាធៀ និយាយថា ជនជាតិរ៉ូហ៊ីងយ៉ាទាំងនោះ ជាជនភៀសខ្លួន ហើយបើមានអ្វីដែលជួយបាន ម៉ាឡេស៊ីនឹងជួយ។ មេដឹកនាំម៉ាឡេស៊ីវ័យ៩៣ឆ្នាំរូបនេះ ក៏សង្ឃឹមថា អាស៊ានអាចជួយទប់ស្កាត់ការរំលោភសិទ្ធិមនុស្ស និងការធ្វើបាបលើជនភាគតិចមូស្លីមមួយនេះផងដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ក៏ព្រោះរឿងជនជាតិរ៉ូហ៊ីងយ៉ានេះ លោក មហាធៀ កាលពីឆ្នាំមុន បានប្រើពាក្យធ្ងន់ៗរិះគន់រដ្ឋាភិបាលោកស្រី អ៊ុងសាន ស៊ូជី ដែលមិនបានជួយការពារសិទ្ធិរបស់ពួកគេសោះ ហើយបើកដៃឲ្យយោធាប្រព្រឹត្តអំពើហិង្សាលើសហគមន៍រ៉ូហ៊ីងយ៉ានៅរដ្ឋ Rakhine ថែមទៀត។ វាជារឿងកម្រដែលមេដឹកនាំអាស៊ានរិះគន់គ្នាឯងដោយចំហបែបនេះ ប៉ុន្តែវិបត្តិមួយនេះពិតជាឈានដល់ដំណាក់កាលមួយដែលមិនមែនជារឿងរវាងមីយ៉ាន់ម៉ា និងបង់ក្លាដែសទៀតឡើយ។
តាមពិតទៅ ក្រុងណៃពិដោ និងក្រុងដាក្កាមានកិច្ចព្រមព្រៀងធ្វើមាតុភូមិនិវត្តន៍ជនភៀសខ្លួនរ៉ូហ៊ីងយា់ជាង៧សែននាក់ដែលកំពុងរស់នៅជំរំភៀសខ្លួនក្បែរព្រំដែន។ ប៉ុន្តែកិច្ចព្រមព្រៀងនេះ ជាប់គាំងដ្បិតជនជាតិរ៉ូហ៊ីងយ៉ាច្រើនលើសលប់ មិនមានបំណងត្រឡប់ទៅមីយ៉ាន់ម៉ាវិញឡើយ។ របាយការណ៍របស់គណៈកម្មការអាស៊ានបង្ហាញថា ការបញ្ជូនជនភៀសខ្លួនទៅកន្លែងដើមនេះ អាចចំណាយពេលពីរឆ្នាំឯណោះ៕
Tag:
ម៉ាឡេស៊ី
អាស៊ាន
រ៉ូហ៊ីងយ៉ា
មីយ៉ាន់ម៉ា
មហាធៀ មហាម៉ាត់
© រក្សាសិទ្ធិដោយ thmeythmey.com