មនុស្សដែលធ្វើដំណើរកម្សាន្តទៅកាន់ទីកន្លែងធម្មជាតិ យ៉ាងហោចណាស់២ម៉ោងក្នុងមួយសប្តាហ៍ ទំនងជាមានសុខភាពល្អ និងសុខាមាលភាពផ្លូវចិត្ត។ ការសិក្សាជាច្រើនក្នុងចក្រភពអង់គ្លេស អះអាងបែបនេះ។
អ្នកស្រាវជ្រាវ បានរកឃើញថា វាមិនសំខាន់ថា អ្នកចូលរួមប្រើប្រាស់ពេលវេលារបស់ពួកគេនៅក្រៅផ្ទះទេ ទោះជារយៈពេលវែង ឬខ្លីក្តី ប៉ុន្តែអ្វីដែលចាត់ទុកជាសប្តាហ៍ដ៏សំខាន់នោះ គឺថា ពួកគេ បានចូលទៅកម្សាន្តក្នុងធម្មជាតិដល់ ៥ម៉ោង។ នេះ មានន័យថា ពេលវេលាកាន់តែយូរ កាន់តែផ្តល់អត្ថប្រយោជន៍ច្រើន។
អ្នកដឹកនាំការស្រាវជ្រាវខាងលើ លោក Mathew White មកពីមជ្ឈមណ្ឌលអឺរ៉ុបសម្រាប់សុខភាពមនុស្ស និងបរិស្ថាន នៅសាកលវិទ្យាវេជ្ជសាស្ត្រ Exeter ក្នុងចក្រភពអង់គ្លេស គូសបញ្ជាក់ថា វេជ្ជបណ្ឌិត និងអ្នកជំងឺ ដែលចំណាយពេលច្រើនក្នុងបរិស្ថានធម្មជាតិ ប្រហែលមានសុខភាពល្អ ជាងមនុស្សធម្មតា។ ប៉ុន្តែ គេ នៅតែចោទជាសំណួរថា «តើរយៈពេលប៉ុន្មានទើបគ្រប់គ្រាន់?»។
យោងតាមការចុះផ្សាយរបស់ទីភ្នាក់ងារព័ត៌មាន Reuters លោក White គោលដៅនៃការស្រាវជ្រាវរបស់ គឺដើម្បីឆ្លើយតបទៅនឹងសំណួរដ៏សាមាញ្ញមួយនេះ។ លោក White និងអ្នកស្រាវជ្រាវផ្សេងទៀត បានវិភាគលើមនុស្ស ១៩ ៨០០នាក់ ក្នុងចន្លោះឆ្នាំ ២០១៤ ដល់ ឆ្នាំ២០១៦ និងការស្ទង់មតិរបស់រដ្ឋាភិបាលអង់គ្លេស លើ «ការចូលរួមជាមួយបរិស្ថានធម្មជាតិ» ក្នុងគំរូតំណាងជនជាតិនៃប្រជាពលរដ្ឋអង់គ្លេស។
អ្នកចូលរួម ត្រូវបានគេចោទសួរពាក់ព័ន្ធនឹង ការទាក់ទងរបស់ពួកគេជាមួយធម្មជាតិ អំឡុងពេលសប្តាហ៍មុន ដែលស្ថិតក្នុងទីតាំង រួមមាន ឧទ្យាន តំបន់ធម្មជាតិ ឆ្នេរសមុទ្រ ដីកសិដ្ឋាន ព្រៃភ្នំ និងទន្លេ ជាដើម។ យ៉ាងណាមិញ គេ មិនរាប់បញ្ចូល ការដើរតាមផ្លូវទិញអីវ៉ាន់ ឬចំណាយពេលក្នុងសួនច្បារផ្ទាល់ខ្លួនឡើយ។
ជាមួយគ្នានេះ អ្នកចូលរួមទាំងនោះ ក៏ត្រូវបានគេចោទសួរទាក់ទិននឹង សុខភាព និងសុខមាលភាពរបស់ពួកគេ ជាមួយសំណួរថា «តើសុខភាពអ្នកជាទូទៅមានលក្ខណៈដូចម្តេច?» និង «ជារួម តើអ្នកពេញចិត្តនឹងជីវិតបច្ចុប្បន្នរបស់អ្នកកម្រិតណា?»
ក្រោយប្រមូលទិន្នន័យរួចរាល់ ក្រុមអ្នកស្រាវជ្រាវរបស់លោក White បានរកឃើញថា មនុស្ស ដែលចំណាយពេល ២ម៉ោងក្នុងធម្មជាតិ អំឡុងពេលសប្តាហ៍ចុងក្រោយរបស់ពួកគេ មានលទ្ធភាពប្រមាណ ២៣ភាគរយ ដែលបង្ហាញពីសុខមាលភាពផ្លូវចិត្តខ្ពស់ និងប្រមាណ ៥៩ភាគរយ ដែលបង្ហាញពីសុខភាពល្អ បើធៀបនឹងមនុស្សដែលគ្មានការទាក់ទងជាមួយធម្មជាតិ។
យោងតាមក្រុមអ្នកស្រាវជ្រាវដដែល ឥទ្ធិពលវិជ្ជមានបែបនេះ កើនឡើង អាស្រ័យលើពេលវេលារបស់មនុស្សដែលចូលទៅកម្សាន្តក្នុងធម្មជាតិបន្ថែម ។ សម្រាប់តួលេខខ្ពស់បំផុតគឺ ៣ម៉ោងក្នុងមួយសប្តាហ៍សម្រាប់សុខភាព និង៥ម៉ោងក្នុងមួយសប្តាហ៍សម្រាប់សុខមាលភាព៕