សាលារាជធានី បន្តអនុវត្តតាមពង្រាងប្លង់មេនៃប្រព័ន្ធដឹកជញ្ជូន ដើម្បីដោះស្រាយការកកស្ទះចរាចរណ៍

ជាតិ

សង្គមជាតិ

សាលារាជធានី បន្តអនុវត្តតាមពង្រាងប្លង់មេនៃប្រព័ន្ធដឹកជញ្ជូន ដើម្បីដោះស្រាយការកកស្ទះចរាចរណ៍

22, Jun 2019 , 3:59 pm

រូបភាព

លោក នួន ផារ័ត្ន អភិបាលរងរាជធានីភ្នំពេញ ឡើងបង្ហាញ ពីផែនការមេនៃប្រព័ន្ធដឹកជញ្ជូនរាជធានីភ្នំពេញ ក្នុងសិក្សាសាលាពិគ្រោះយោបល់ កាលពីថ្ងៃទី២១មិថុនា ឆ្នាំ២០១៩

ដោយ: អ៊ូ សុខមាន (OU Sokmean)

ភ្នំពេញ៖ ថ្វីដ្បិតប្លង់មេ(Master Plan)នៃប្រព័ន្ធដឹកជញ្ជូននៅភ្នំពេញ មិនទាន់ត្រូវបានអនុម័ត ប៉ុន្តែរដ្ឋបាលរាជធានី និងភាគីពាក់ព័ន្ធកំពុងតែអនុវត្តតាមពង្រាងនៃប្លង់មេនេះ ពីមួយដំណាក់កាលៗ ដើម្បីដោះស្រាយបញ្ហាកកស្ទះចរាចរណ៍ នៅរាជធានីភ្នំពេញ។ តាមរយៈពង្រាងប្លង់មេនេះ អាជ្ញាធរបានកែលម្អផ្លូវប្រសព្វនៃចំណតរថយន្ត កែលម្អប្រព័ន្ធភ្លើងសញ្ញាចរាចរណ៍ បង្កើតផ្លូវក្រវាត់ក្រុង ពង្រីកបណ្ដាញផ្លូវធំៗជាដើម។

បើតាម លោក ស៊ុយ សេរិទ្ធ អភិបាលរងរាជធានីភ្នំពេញ ការធ្វើចរាចរណ៍នៅក្នុងរាជធានីបច្ចុប្បន្ន មានការប្រែប្រួលខ្លាំង ដោយសារការប្រមូលផ្តុំរបស់ប្រជាពលរដ្ឋមករស់នៅភ្នំពេញកាន់តែច្រើន។ លោកបានបញ្ជាក់ក្នុងសិក្ខាសាលាពិគ្រោះយោបល់ស្តីពី«ផែនការមេដឹកជញ្ជូនក្នុងរាជធានីភ្នំពេញ» កាលពីថ្ងៃទី២១មិថុនា ថា ការកើនឡើងនៃអ្នករស់នៅភ្នំពេញច្រើន បានធ្វើឱ្យមានការកើនឡើងនូវចំនួនម៉ូតូច្រើន រថយន្តច្រើន ប៉ុន្តែផ្លូវសម្រាប់ធ្វើចរាចរណ៍សាធារណៈ គឺនៅដដែល នេះគឺជាបញ្ហា។ ដោយឡែកបញ្ហាផ្សេងៗនៃកកស្ទុះចរាចរណ៍នៅភ្នំពេញទៀតនោះ គឺការធ្វើចរាចរណ៍របស់ប្រជាពលរដ្ឋ នៅតែមិនគោរពច្បាប់ចរាចរណ៍៍ ហើយថែមទាំយ៉ាប់យ៉ឺនជាងមុនទៅទៀត និងការកើនឡើងច្រើននៃវិស័យដឹកជញ្ជូនរបស់ឯកជន ដូចជាTaxi Pass App និងសេវាដឹកជញ្ជូនផ្សេងៗ។ ទាំងនោះជាបញ្ហ ដែលរដ្ឋបាលរាជធានី កំពុងគិត និងធ្វើគម្រោងសាងសងផ្លូវនានា តាមប្លង់មេ ដើម្បីសម្រួលការធ្វើចរាចរណ៍នៅភ្នំពេញ។

លោក ស៊ុយ សេរិទ្ធ អភិបាលរងរាជធានីភ្នពេញ

ជាមួយគ្នានេះ លោក នួន ផារ័ត្ន ជាអភិបាលរងរាជធានីភ្នំពេញ បានលើកឡើងថា ការអភិវឌ្ឍក្រុងមួយឱ្យ ជោគជ័យទៅបាន ទាល់តែភាគីពាក់ព័ន្ធទាំងអស់រួមគ្នា អនុវត្តប្លង់គោល(ប្លង់មេ)។ បើតាមអភិបាលរងរូបនេះ ប្លង់មេនៃប្រព័ន្ធដឹកជញ្ជូនរាជធានីភ្នំពេញដែលសម្រាប់អនុវត្តដល់ឆ្នាំ២០៣៥ គឺត្រូវបានរៀបចំរួចរាល់ហើយតាំងឆ្នាំ២០១៤ មកម្លេះ គ្រាន់តែមិនទាន់ត្រូវបានអនុម័ត ប៉ុន្តែរដ្ឋបាលរាជធានីភ្នំពេញកំពុងតែអនុវត្តតាមប្លង់មេទាំងនេះហើយ។ លោក នួន ផារ័ត្ន អះអាងថា ប្លង់មេប្រព័ន្ធដឹកជញ្ជូន ដែលគាំទ្របច្ចេកទេស និងថវិកា ពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការកម្ពុជា-ជប៉ុន(JICA)នេះ កំពុងត្រូវបានធ្វើបច្ចុប្បន្នភាព ដើម្បីឈានដល់ការអនុម័ត។

លោក នួន ផារ័ត្ន អភិបាលរងសាលាក្រុងភ្នំពេញ ក្នុងសិក្ខាសាលាពិគ្រោះយោបល់ ស្តីពីផែនការមេដឹកជញ្ជូន ក្នុងរាជធានីភ្នំពេញ កាលពីថ្ងៃទី២១ មិថុនា ឆ្នាំ២០១៩។ រូបបានទំព័រហ្វេសប៊ុក របស់ លោក នួន ផារ័ត្ន។

សិក្ខាសាលាដែលមានការចូលរួមពីអាជ្ញាធរមូលដ្ឋាន រដ្ឋបាលខ័ណ្ឌ ទាំង១៤ និងសង្កាត់ទាំង១០៥ អ្នកជំនាញ និងដៃគូអភិវឌ្ឍន៍នេះ ត្រូវបានធ្វើឡើងដើម្បីបង្ហាញប្លង់មេ ដែលកំពុងអនុវត្ត និងពិភាក្សាបន្ត ដើម្បីធ្វើជាទុនដល់អាជ្ញាធរមូលដ្ឋានក្នុងរាជធានីភ្នំពេញ ក្នុងការអនុវត្តផែនការនានា តាមគំរូប្លង់មេដែលបានរៀបចំរួមនេះ។ នេះបើតាមលោក នួន ផារ័ត្ន ។

លោក នួន ផារ័ត្ន បាននិយាយដូច្នេះថា៖«យើងមានផែនការមេដឹកជញ្ជូន ផែនការមេគ្រប់គ្រងនិងអភិវឌ្ឍប្រព័ន្ធលូ។ យើងត្រូវដឹងថា ប្លង់មេនេះ ទាក់ទងនឹងសង្កាត់យើងយ៉ាងម៉េច និងខណ្ឌយើងយ៉ាងម៉េច។ លោកបន្តថា៖«កំណត់ផ្លូវធំៗ ត្រូវមានប្រពន្ធ័គ្រប់គ្រងត្រឹមត្រូវ ដោយមានបំពាក់ឧបករណ៍ទំនើប មានវិញ្ញាណសម្រាប់បញ្ជាចរាចរណ៍។ ការគ្រប់គ្រងចរាចរណ៍ គឺគិតទាំងការគ្រប់គ្រងចំណត និងការរៀបចំចរាចរណ៍ឯកទិស។ មួយទៀតយើងត្រូវគ្រប់គ្រងប្រព័ន្ធដឹកជញ្ជូនទំនិញ ដោយកំណត់ឲ្យច្បាស់ផ្លូវណាឡានដឹកទំនិញចូល ដឹកទំនិញចេញ»។

បើតាម លោក នួន ផារ័ត្ន ប្លង់មេនៃប្រព័ន្ធដឹកជញ្ជូនក្នុងរាជធានីភ្នំពេញនេះ មានលក្ខណៈបច្ចេកទេសដែលត្រូវអនុវត្តលើ៤ចំណុចសំខាន់។ ទីមួយ ជាទីក្រុងមួយដែលត្រូវអភិវឌ្ឍប្រព័ន្ធដឹកជញ្ជូនសាធារណៈ។ ទីពីរ កាលណានិយាយពីការអភិវឌ្ឍផ្លូវ គឺត្រូវគិតទៅដល់ការអភិវឌ្ឍផ្លូវមេបែបណា ផ្លូវកាត់ទទឹង និងបណ្តាយបែបណា ដែលមាននៅក្នុងប្លង់មេ។ ទីបី ប្រព័ន្ធគ្រប់គ្រងចរាចរណ៍ ដោយប្រើភ្លើងសញ្ញាចរាចរណ៍ដោយស្វ័យប្រវត្តិ មានន័យថា ប្រសិនបើផ្លូវណាមួយមានការចរាចរណ៍ខ្លាំង ភ្លើងស្តុបនោះ នឹងលោតសញ្ញាពណ៌ខៀវយូរជាងពណ៌ក្រហម និងស្គាល់ពេលណា ត្រូវលោតពណ៌ខៀវ និងក្រហម ជាដើម និងទីបួន គឺការដឹកជញ្ជូនទំនិញនៅភ្នំពេញ ត្រូវកំណត់ការដឹកទំនិញនេះ ពីទិសណាទៅទិសណាឱ្យច្បាស់លាស់ ដោយមិនឱ្យចូលទីក្រុង។

ជាមួយគ្នានេះ ការសិក្សា និងការធ្វើបទបង្ហាញរបស់លោក ម៉ាសាតុ កូតូ អ្នកជំនាញការទីភ្នាក់ងារ JICA បានបង្ហាញថា ចិញ្ចើមផ្លូវ និងផ្លូវថ្មើរជើង ត្រូវបានប្រើ ដើម្បីចតឡានឬលក់ដូរ ហើយល្បឿនធ្វើដំណើរថយចុះខ្លាំង (កកស្ទះ) ខណៈតម្រូវការក្នុងការធ្វើដំណើរកើនឡើងលឿនជាងកំណើនមនុស្ស។

លោកបាននិយាយថាភ្នំពេញត្រូវដូរយុទ្ធសាស្ត្រគ្រប់គ្រង ដោយបង្កើនការប្រើប្រាស់មធ្យោបាយដឹកជញ្ជូនសាធារណៈចម្រុះ រួមមានទាំងឡានក្រុង រថភ្លើង ដើម្បីភ្ជាប់គ្នាពីតំបន់មួយទៅតំបន់មួយ ដែលកសាងបានជាប្រព័ន្ធរួម ប្រទាក់ក្រឡាគ្នាទៅគ្រប់តំបន់ រួមទាំងទីតាំងសំខាន់ៗ ដូចជា ព្រលានយន្តហោះ តំបន់សេដ្ឋកិច្ចពិសេស និងតំបន់ផ្សេងៗទៀត។ ជាមួយគ្នានេះ បង្កើតហេដ្ឋារចនាសម្ព័ន្ធដឹកជញ្ជូនសម្រាលបន្ទុកចរាចរណ៍ក្នុងក្រុង និងការបង្កើតផ្លូវក្រវ៉ាត់ក្រុងដើម្បីសម្រួលការធ្វើដំណើរទៅខេត្តក្រុងជិតខាង ស្របគ្នានឹងការកាត់ន្ថយចំនួនឡាន ម៉ូតូ ឯកជន។ ការកែលម្អការគ្រប់គ្រងចរាចរណ៍ ត្រូវធ្វើ ដោយបំពាក់ទាំងហេដ្ឋារចនាសម្ព័ន្ធរូបវន្ត រួមមានការបំពាក់ភ្លើងចរាចរណ៍ បង្កើតផ្លូវឯកទិស (ចំពោះផ្លូវដែលមានចម្ងាយប្រមាណ ៣០០ ម៉ែត្រ) រៀបចំចំណត ឲ្យបានត្រឹមត្រូវជាដើម។

លោក ជូ គឹមទ្រី អនុប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានគូសបញ្ជាក់ថា ថ្វីបើផែនការមេនេះ មិនទាន់បានអនុម័តផ្លូវការ តែរដ្ឋបាលភ្នំពេញបានផ្តើមអនុវត្តជាបណ្តើរៗ នាពេលកន្លងមក ដូចជាបានបំពាក់ស្តុបឆ្លាតវៃ សង់ស្ពានអាកាស សង់ផ្លូវក្រវ៉ាត់ក្រុងទី៣ ដំណាក់កាលទីមួយ ប្រវែង១២គីឡូម៉ែត្រ(ផ្លូវឈ្នះ ឈ្នះ)។ លោកប្រាប់ថា ក្រៅពីនោះមានការពង្រីកបណ្ដាញផ្លូវជាតិ ដូចជាផ្លូវ ៦A ផ្លូវជាតិលេខ១ ផ្លូវជាតិលេខ៥ ផ្លូវម៉ុងឫទ្ធី មហាវិថីសម្តេចហ៊ុនសែន ស្របតាមផែនការមេ។ ផ្លូវឯកទិស ជំហានដំបូង នឹងត្រូវបង្កើតបន្ថែម៥ ទៀត នៅខណ្ឌ័ដូនពេញ ស្របនឹងផ្លូវស៊ីសុវត្ថិ។ ចំណតក្រោមដី ៩ទីតាំង ត្រូវបានសង់រួច ហើយចំណតក្រោមដីថ្មី ១៥ ទៀត ក្រោមសួនសាធារណៈនឹងត្រូវសាងសង់។ ផ្លូវថ្មើរជើងបានផ្តើមធ្វើនៅផ្លូវនរោត្តម និងផ្លូវសហព័ន្ធរុស្ស៊ី។ ផ្លូវដទៃទៀតនឹងរៀបចំជាបណ្តើរៗ ឲ្យស្របតាមផែនការមេ។

គួរបញ្ជាក់ថា ផែនការមេលម្អប្រព័ន្ធលូ និងប្រព័ន្ធរំដោះទឹកសម្អុយ និងផែនការមេដឹកជញ្ជូនក្នុងរាជធានីភ្នំពេញ ត្រូវបានបង្កើតឡើង និងអនុវត្តរួមគ្នារវាងភាគីកម្ពុជា ពិសេសក្រសួងសាធារណការ និងដឹកជញ្ជូន សាលារាជធានី និងទីភ្នាក់ងារសហប្រតិបត្តិការកម្ពុជា-ជប៉ុន ក្រោមទំហំទឹកប្រាក់៥០០លានដុលា្លរ។ នេះបើតាម លោក នួន ផារ័ត្ន ៕