ប្រណាំងស៊ីក្លូឆ្នាំ២០១៩៖ ជ័យលាភីលេខ១, លេខ២ បានទៅអ្នកព្រៃវែង លេខ៣ស្វាយរៀង

ជាតិ

ប្រណាំងស៊ីក្លូឆ្នាំ២០១៩៖ ជ័យលាភីលេខ១, លេខ២ បានទៅអ្នកព្រៃវែង លេខ៣ស្វាយរៀង

23, Jun 2019 , 8:19 pm

រូបភាព

ដោយ: ប៉ូ សាគុន

ភ្នំពេញ៖ ព្រឹត្តិការណ៍ប្រណាំងស៊ីក្លូលើកទី៣ឆ្នាំ២០១៩ ដែលមានបេក្ខជនប្រកួតប្រជែងចំនួន ១៣០រូបចូលរួម បានរកឃើញជ័យលាភីពីលេខ១ដល់លេខ៣ហើយ។ អ្នកទទួលជ័យលាភីលេខមួយ១និងលេខ២មកពីខេត្តព្រៃវែង និងជ័យលាភីលេខ៣មកពីស្វាយរៀង។

ព្រឹត្តិការណ៍ប្រណាំងស៊ីក្លូនៅព្រឹកថ្ងៃទី២៣ខែមិថុនាឆ្នាំ២០១៩នេះ ដែលបានធ្វើឡើងនៅសង្កាត់ជ្រោយចង្វារ តាមបណ្ដោយមាត់ទន្លេជិតសណ្ឋាគារសុខាត្រើយខាងកើត ដែលមានបេក្ខជនចូលរួមប្រកួតចំនួន១៣០នាក់ បានរកឃើញជ័យលាភី៣រូបហើយ។ ជ័យលាភីលេខ១ បានទៅលើលោក រន់ ចក់ មកពីខេត្តព្រៃវែង ដែលពាក់ស្លាកលេខ ១១៧។ ចំណែកជ័យលាភីលេខ២បានទៅលើលោក អ៊ឹម ជឿន មកពីខេត្តព្រៃវែង ដែលពាក់ស្លាក់លេខ ៤៤។ និងជ័យលាភីលេខ៣ បានទៅលើលោក នូ សារឿន មកពីខេត្តស្វាយរៀង ដែលពាក់ស្លាកលេខ១២០។

ក្នុងនោះជ័យលាភីលេខ១ ទទួលបានមេដាយ១ និងប្រាក់រង្វាន់ចំនួន ៤០០,០០០រៀល ជ័យលាភីលេខ២ ទទួលបានមេដាយ១ និងប្រាក់រង្វាន់ចំនួន ៣២០,០០០ រៀល និងជ័យលាភីលេខ៣ ទទួលបានមេដាយ១ និងប្រាក់រង្វាន់ចំនួន ២៤០,០០០រៀល។

ព្រឹត្តិការណ៍ប្រណាំងស៊ីក្លូនេះ មានការចូលរួមជាអធិបតីពី លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា និងលោក ខួង ស្រេង អភិបាលនៃគណៈអភិបាលរាជធានីភ្នំពេញ ជាអធិបតី។

សូមបញ្ជាក់ថានៅល្ងាចថ្ងៃទី២៣ខែមិថុនានេះ ក៏មានកម្មវិធីជិះស៊ីក្លូ និងធាក់ស៊ីក្លូកម្សាន្ត សម្រាប់ប្រជាពលរដ្ឋទូទៅ ព្រមទាំងមានការសម្ដែងសិល្បៈជាច្រើនផងដែរ។

នេះជាលើកទី៣ហើយសម្រាប់ការរៀបចំព្រឹត្តិការណ៍ប្រណាំងស៊ីក្លូនៅរាជធានីភ្នំពេញ ដែលលើកទី១ធ្វើឡើងនៅឆ្នាំ១៩៩៣ ដោយមានស៊ីក្លូចូលរួមចំនួន១០០ស៊ីក្លូ។ លើកទី២នៅឆ្នាំ១៩៩៥ មានស៊ីក្លូចូលរួមប្រកួតចំនួន ៣០០ ស៊ីក្លូ និងលើកទី៣ ធ្វើនៅឆ្នាំ២០១៩នេះ មានស៊ីក្លូចូលរួមចំនួន ១៣០ស៊ីក្លូ។

ព្រឹត្តិការណ៍ប្រណាំងស៊ីក្លូដែលធ្វើនៅឆ្នាំ២០១៩នេះ រៀបចំឡើងដោយទីភ្នាក់ងារទេសចរណ៍ កម្ពុជា រួមសហការណ៍ជាមួយសមាគមអភិរក្សស៊ីក្លូ និងមុខររបរក្រៅប្រព័ន្ធ ដោយមានការចូលរួមឧបត្ថម្ភគាំទ្រពីក្រុមហ៊ុនទេសចរណ៍ PTM ៕