ជាតិ
រលំអគារ៖ ទូតចិនបង្ហាញអារម្មណ៍ក្តុកក្តួល និងគាំទ្រចំណាត់ការអាជ្ញាធរលើអ្នកពាក់ព័ន្ធ
× ស្ថានទូតចិនប្រចាំកម្ពុជា នាល្ងាចថ្ងៃទី២៣ ខែមិថុនា នេះ បានបង្ហាញនូវអារម្មណ៍ក្ដុកក្ដួលអំពីឧបទ្ទេវហេតុបាក់រលំអគារក្នុងខេត្តព្រះសីហនុ នាពេលទៀបភ្លឺថ្ងៃទី២២ ខែមិថុនា។ អគារនោះ សាងសង់ដោយជនជាតិចិន។
«ស្ថានទូតចិនប្រចាំកម្ពុជា មានអារម្មណ៍ក្ដុកក្ដួលសោកស្ដាយជាពន់ពេក និងសូមបួងសួងឲ្យវិញ្ញាណក្ខន្ធជនរងគ្រោះដែលបាត់បង់ជិវិតបានទៅកាន់សុគតិភព សូមចូលរួមរំលែកទុក្ខជាមួយក្រុមគ្រួសារនៃសពផង។ ជាមួយគ្នានេះដែរ សូមជូនពរឲ្យជនរងគ្រោះដែលកំពុងទទួលការព្យាបាលបានជាសះស្បើយក្នុងពេលឆាប់ៗ»។ នេះសាររបស់ស្ថានទូតចិនជាភាសាខ្មែរ អមដោយភាសាអង់គ្លេស និងភាសាចិន។
ទូតចិនបានអះអាងថា ខ្លួនបានទំនាក់ទំនងផ្ទាល់ជាមួយសភាពាណិជ្ជកម្មចិននៅកម្ពុជា និងសហគ្រាសចិននៅខេត្តព្រះសីហនុជាបន្ទាន់ ដើម្បីរៀបចំកម្លាំងជំនួយ និងសម្ភារ ចាត់ចែងគ្រឿងចក្រអេស្កាទ័រខ្នាតធំជាដើម ចូលរួមក្នុងសកម្មភាពសង្គ្រោះឲ្យបានទាន់ពេល។
បច្ចុប្បន្ន ជនជាតិចិនដែលពាក់ព័ន្ធនឹងឧបទ្ទេវហេតុលើកនេះ ត្រូវកម្លាំងសមត្ថកិច្ចកម្ពុជាឃាត់ខ្លួនបានហើយ ភាគីចិនគាំទ្រស្ថាប័នពាក់ព័ន្ធរបស់កម្ពុជាបើកការស៊ើបអង្កេតតាមផ្លូវច្បាប់ និងគាំទ្រទាំងស្រុងចំពោះភាគីកម្ពុជាដើម្បីចាត់វិធានការណ៍តាមផ្លូវច្បាប់ទៅលើជនល្មើសទាំងឡាយដែលពាក់ព័ន្ធក្នុងឧបទ្ទេវហេតុលើកនេះ៕
© រក្សាសិទ្ធិដោយ thmeythmey.com