អន្តរជាតិ
ថៃ៖ មីយ៉ាន់ម៉ាអាចនឹងចេញអត្តសញ្ញាណប័ណ្ណឲ្យជនភៀសខ្លួនរ៉ូហ៊ីងយ៉ាដែលស្ម័គ្រចិត្តទៅមីយ៉ាន់ម៉ាវិញ
× ប្រមុខការទូតថៃ លោក Don Pramudwinai បានឲ្យដឹងថា រដ្ឋាភិបាលមីយ៉ាន់ម៉ា អាចនឹងចេញលិខិតបញ្ជាក់អត្តសញ្ញាណជាតិមួយដល់ជនភៀសខ្លួនជនជាតិភាគតិចរ៉ូហ៊ីងយ៉ា ដែលកំពុងស្នាក់នៅបណ្តោះអាសន្នក្នុងជំរំប្រទេសបង់ក្លាដែស នៅពេលដែលពួកគេ ស្ម័គ្រចិត្តវិលត្រលប់ទៅមីយ៉ាន់ម៉ាវិញ។ នេះ គឺជាដំណឹងល្អសម្រាប់ជនភៀសខ្លួន ប្រសិនបើរដ្ឋាភិបាលមីយ៉ាន់ម៉ា ពិតជាអាចធ្វើបានមែននោះ។
បន្ទាប់ពីបញ្ចប់ជំនួបជាមួយនឹងរដ្ឋមន្ត្រីការបរទេសអាស៊ានអំឡុងកិច្ចប្រជុំកំពូលអាស៊ានលើកទី៣៤ លោករដ្ឋមន្ត្រីការបរទេសថៃ Don Pramudwinai នៅថ្ងៃទី២៣ មិថុនា បានប្រាប់អ្នកសារព័ត៌មានឲ្យដឹងថា រដ្ឋមន្ត្រីអាស៊ាន បានជជែកជាមួយគ្នាលើការធានាពីសុវត្ថិភាពការបញ្ជូនជនភៀសខ្លួនរ៉ូងហ៊ីងយ៉ាត្រលប់ទៅមីយ៉ាន់ម៉ា។ នេះបើយោងតាមការចុះផ្សាយរបស់សារព័ត៌មានថៃ The Nation។
តាមប្រភពព័ត៌មានដដែល លោករដ្ឋមន្ត្រី បានអះអាងថា ក្រៅពីជជែកលើការរៀបបញ្ជូនជនភៀសខ្លួន ប្រមុខការទូតរបស់ប្រទេសអាស៊ាន ក៏បានពិភាក្សាពីការទទួលស្គាល់ផ្លូវការលើជនភៀសខ្លួនរ៉ូហ៊ីងយ៉ា ដែលកំពុងរស់នៅក្នុងស្ថានភាពលំបាកក្នុងប្រទេសបង់ក្លាដែសផងដែរ។ តាមលោករដ្ឋមន្ត្រី ជំហានដំបូងរដ្ឋាភិបាលមីយ៉ាន់ម៉ា អាចនឹងផ្តល់អត្តសញ្ញាណប័ណ្ណមួយសម្រាប់ជនភៀសខ្លួន។
គួរជម្រាបថា គិតចាប់ពីវិបត្តិជនភៀសខ្លួនរ៉ូហ៊ីងយ៉ាបានផ្ទុះឡើងចុងក្រោយនៅចុងឆ្នាំ២០១៧មក រដ្ឋាភិបាលមីយ៉ាន់ម៉ា នៅមិនទាន់បានផ្តល់ដំណោះស្រាយសម្រាប់ពួកគេនៅឡើយនោះទេ។ កាន់តែធ្ងន់ធ្ងរនោះ មីយ៉ាន់ម៉ា មិនអាចធ្វើឲ្យជនភៀសខ្លួន ដែលកំពុងតែស្នាក់នៅបណ្តោះអាសន្ននៅក្នុងជំរំរបស់បង់ក្លាដែស ប្រមាណ៧០ម៉ឺននាក់ មានអារម្មណ៍សុវត្ថិភាពសម្រាប់ការវិលត្រលប់ទៅកាន់ប្រទេសវិញឡើយ។
ជុំវិញផែនការ នៃការផ្តល់អត្តសញ្ញាណផ្លូវការសម្រាប់ជនភៀសខ្លួន ដូចដែលប្រមុខការទូតថៃបានបង្ហើប គឺជារឿងវិជ្ជមានបំផុតសម្រាប់ពួកគេ។ កន្លងមក រដ្ឋាភិបាលមីយ៉ាន់ម៉ា មិនដែលទទួលស្គាល់ពួកគេ ជាប្រជាជនពេញសិទ្ធិនោះទេ ហើយពួកគេ ក៏ជានិច្ចកាលទទួលរងការរើសអើងពីបណ្តាប្រជាជនមីយ៉ាន់ម៉ាមួយចំនួន ជាពិសេសនោះពីក្រុមពុទ្ធសាសនិកជ្រុលនិយមតែម្តង៕
Tag:
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com