អន្តរជាតិ
សំបុត្រមួយច្បាប់របស់លោក ត្រាំ ឲ្យលោក គីម អាចបន្តក្ដីសង្ឃឹមដល់ការចរចា?
មេដឹកនាំកូរ៉េខាងជើង គីម ជុងអ៊ុន កំពុងអានសំបុត្ររបស់ប្រធានាធិបតីអាមេរិក ដូណាល់ ត្រាំ ។ រូបភាព KCNA
×![]()
ដោយ: តន ចាន់រិទ្ធារ៉ា
មេដឹកនាំកូរ៉េខាងជើង គីម ជុងអ៊ុន បានទទួលលិខិតមួយច្បាប់របស់ប្រធានាធិបតីអាមេរិក ដូណាល់ ត្រាំ ។ ទីភ្នាក់ងារព័ត៌មានរដ្ឋកូរ៉េខាងជើង KCNA ផ្សាយនៅថ្ងៃទី២៤ ខែមិថុនា ថា លោក គីម ពេញចិត្តនឹងសំបុត្ររបស់លោក ត្រាំ ។ នៅថ្ងៃដដែលនេះ ប្រមុខការទូតអាមេរិក និងជាមន្ត្រីចរចាជាមួយកូរ៉េខាងជើង ម៉ៃ ប៉ុមប៉េអូ ក៏ប្រកាសថា វ៉ាស៊ីនតោនត្រៀមចរចាជាមួយព្យុងយ៉ាង ទោះជាជំនួបរៀបចំទាន់ហន់អ្វីក៏ដោយ។ សំបុត្ររបស់លោក ត្រាំ អាចជាសញ្ញាវិជ្ជមានសម្រាប់ការចរចាដែលជាប់គាំង?
ខណៈដំណើរការចរចាដើម្បីរំសាយនុយក្លេអ៊ែរមិនមានដំណើរការ ប្រធានាធិបតីអាមេរិក ដូណាល់ ត្រាំ ក៏បានផ្ញើសំបុត្រផ្ទាល់ខ្លួនមួយច្បាប់ទៅកាន់មេដឹកនាំកូរ៉េខាងជើង គីម ជុងអ៊ុន ។ គេមិនដឹងថា សំបុត្រ លោក ត្រាំ ទៅដល់ដៃលោក គីម តាមផ្លូវណាឡើយ ខណៈអាមេរិក និងកូរ៉េខាងជើងគ្មានទំនាក់ទំនងការទូតនឹងគ្នាឡើយ។ ប៉ុន្តែទីភ្នាក់ងារព័ត៌មាន KCNA ផ្សាយថា លោក គីម រីករាយនឹងអត្ថន័យដ៏ខ្ពង់ខ្ពស់ក្នុងសំបុត្រនេះ។
បើតាម KCNA លោក គីម បានកោតសរសើរសេចក្ដីក្លាហានដ៏មោះមុតរបស់លោក ត្រាំ ហើយថា នឹងពិចារណាឲ្យបានដិតដល់ពីមាតិកាលម្អិតក្នុងសំបុត្រ។ ប៉ុន្តែប្រព័ន្ធផ្សព្វផ្សាយរដ្ឋកូរ៉េខាងជើងដដែលនេះ មិនបានបញ្ចេញអត្ថន័យក្នុងសំបុត្រឡើយ។ នៅទីក្រុងវ៉ាស៊ីនតោនឯណោះវិញ អ្នកនាំពាក្យសេតវិមាន Sarah Sanders មិននិយាយអ្វីច្រើនឡើយ ដោយបានត្រឹមបញ្ជាក់ពីការផ្លាស់ប្ដូរសំបុត្ររវាងលោក ត្រាំ និងលោក គីម តែប៉ុណ្ណោះ។
សំបុត្រលោក ត្រាំ នេះ ទំនងជាសរសេរតបនឹងសំបុត្រលោក គីម ដែលបានផ្ញើឲ្យលោកនៅមុនខួបមួយឆ្នាំនៃជំនួបលើកដំបូងនៅសិង្ហបុរីខែមិថុនា ឆ្នាំ២០១៨ ។ ក្រោយទទួលសំបុត្រដ៏ស្រស់ស្អាតនោះហើយ លោក ត្រាំ និយាយថា ទំនាក់ទំនងជាមួយលោក គីម នៅតែរឹងមាំដដែល ហើយរឿងវិជ្ជមាននឹងកើតមានឡើងឆាប់ៗផងដែរ។
សំបុត្ររបស់លោក ត្រាំ អាចជាសញ្ញាវិជ្ជមានសម្រាប់ការចរចាដែលជាប់គាំង? ការផ្លាស់ប្ដូរសំបុត្រនេះ បានផ្ដល់ក្ដីសង្ឃឹមជាថ្មីដល់ការចាប់ផ្ដើមការចរចាឈានទៅការលុបបំបាត់នុយក្លេអ៊ែរកូរ៉េខាងជើង បន្ទាប់ពីការខកចិត្តនៅឯជំនួបនៅវៀតណាមកាលពីខែកុម្ភៈ។ ការរីករាយរបស់លោក គីម ក្រោយអានសំបុត្ររបស់លោក ត្រាំ អាចជាសញ្ញាបង្ហាញថា លោកទទួលបានការធានាអ្វីម្យ៉ាងពីមេដឹកនាំអាមេរិកជុំវិញលក្ខខណ្ឌដែលកូរ៉េខាងជើងចង់បានជុំវិញការរំសាយនុយក្លេអ៊ែររបស់ខ្លួន។ លោក ត្រាំ ក៏ទំនងជាដាក់សំណើអ្វីមួយដែរទៅឲ្យលោក គីម ដើម្បីពិចារណា ឬក៏ជាសំណើរៀបចំជំនួបលើកទីបីក៏ថាបាន។
រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី២៤ ខែមិថុនា លើកឡើងពីលទ្ធភាពដ៏ជាក់ច្បាស់មួយជុំវិញការចាប់ផ្ដើមឡើងវិញជំនួបក្រុមការងារប្រទេសទាំងពីរក្រោយការផ្លាស់ប្ដូរសំបុត្រមេដឹកនាំ។ លោក ប៉ុមប៉េអូ និយាយដែរថា អាមេរិកត្រៀមចរចាជាមួយកូរ៉េខាងជើងនៅពេលណាក៏បានដែរឲ្យតែកូរ៉េខាងជើងច្បាស់ថា ត្រៀមខ្លួនរួចស្រេចដែរនោះ។
ទីក្រុងសេអ៊ូល ក៏បង្ហាញជំហរវិជ្ជមានចំពោះការដោះដូរសំបុត្ររវាងលោក ត្រាំ និងលោក គីម ដែរ។ អ្នកនាំពាក្យវិមានប្រធានាធិបតីកូរ៉េខាងត្បូងចាត់ទុកសកម្មភាពនេះ ជាការរក្សាស្ថិរភាពនៃដំណើរការចរចាជារួម និងជាការការពារបរិយាកាសល្អសម្រាប់ការបន្តកិច្ចសន្ទនាផងដែរ៕
Tag:
កូរ៉េខាងជើង
អាមេរិក
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
