វៀតណាម បានបង្កើតក្រុមការងារពិសេសមួយ ដែលប្រមូលផ្តុំអ្នកជំនាញជាច្រើន ដោយក្នុងនោះក៏មានអ្នកវិទ្យាសាស្ត្រជនជាតិរុស្ស៊ី ៤នាក់ផងដែរមកពី «មន្ទីរពិសោធន៍ ឡេនីន» ។ ក្រុមអ្នកជំនាញពិសេសនេះ បង្កើតឡើងក្នុងគោលដៅរក្សាសាកសពរបស់មេដឹកនាំបដិវត្តន៍វៀតណាម ហូ ជីមិញ ទុកកុំឲ្យរលួយ។
តាមរយៈការសម្រេចជាផ្លូវការ ដែលដកស្រង់ចុះផ្សាយដោយទីភ្នាក់ងារព័ត៌មាន Reuters កាលពីថ្ងៃទី ២១ មិថុនា ក្រុមប្រឹក្សានេះ មានកាតព្វកិច្ចចម្បងក្នុងការបង្កើតគម្រោង និងវិធានការចាំបាច់នានា ដើម្បីរក្សា និងការពារសុវត្ថិភាពនៃសាកសពរបស់មេដឹកនាំបដិវត្តន៍ ហូ ជីមិញ សម្រាប់រយៈពេលវែង។
ក្រុមប្រឹក្សាពិសេសនេះ ត្រូវបានបង្កើតឡើង ដើម្បីវាយតម្លៃលើស្ថានភាពសាកសពរបស់ ហូ ជីមិញ ដែលត្រូវបានរក្សាសពទុកកុំឲ្យរលួយជាលើកដំបូងជិត ៥០ឆ្នាំមុន ។ វា នឹងចាប់ផ្តើមប្រតិបត្តិការ នាខែកក្កដា ឆ្នាំ២០១៩តទៅ។
បណ្តាប្រទេសមួយចំនួនលើពិភពលោក រួមមាន ចិន កូរ៉េខាងជើង និងវៀតណាម បានអប់សាកសពមេដឹកនាំស្ថាបនិករបស់ពួកគេ ដោយមានជំនួយពីមន្ទីរពិសោធន៍ ឡេនីន របស់អតីតសហភាពសូវៀត ។ មន្ទីរពិសោធន៍នេះ មានភាពល្បីល្បាញដោយសារការរក្សាសាកសពរបស់ វ្ល៉ាឌីមៀ ឡេនីន ភ្លាមៗក្រោយពីការស្លាប់របស់លោក ក្នុងឆ្នាំ១៩២៤។ ម្យ៉ាងវិញទៀត សាកសពទាំងអស់នេះ ទាមទារការថែទាំជាទៀងទាត់ និងតម្លៃថ្លៃ ដើម្បីរក្សាស្ថានភាពឲ្យល្អ។
សាកសពរបស់អតីតមេបដិវត្តន៍វៀតណាម ដែលស្គាល់ថា «ពូហូ» ក្នុងប្រទេសវៀតណាម ត្រូវបានគេរក្សាទុកនៅក្នុងស្តូបតម្កល់ដ៏ធំមួយ ដែលសាងសង់ដោយសហភាពសូវៀតណាម ក្នុងរដ្ឋធានី ហាណូយ ។ នៅទីនោះ ហូ ជីមិញ ត្រូវបានគេដាក់តាំង ក្នុងមឈូសកញ្ចក់ ។ ទីតាំងនេះ ទាក់ទាញភ្ញៀវទេសចររាប់ពាន់នាក់ទៅទស្សនាជារៀងរាល់ឆ្នាំ។
នៅពេលសហភាពសូវៀត បានដួលរំលំក្នុងឆ្នាំ១៩៩១ រុស្ស៊ី បានចាប់ផ្តើមគិតថ្លៃ សម្រាប់ការផ្គត់ផ្គង់សារធាតុគីមី ដែលលាយរួចស្រាច់ សម្រាប់ចាក់បញ្ចូលក្នុងសាកសព ហូ ជីមិញ ។ ក្នុងឆ្នាំ២០០៣ វៀតណាម ធ្លាក់បានស្នើរុស្ស៊ី សើរើផលិតកម្មសារធាតុគីមួយនេះទៅកាន់ប្រទេសខ្លួន ព្រមទាំងបានបញ្ជូនអ្នកវិទ្យាសាស្ត្រទៅកាន់ទីក្រុងមូស្គូ ដើម្បីរៀនសូត្រពីរូបមន្តសម្ងាត់របស់មន្ទីរពិសោធន៍ ឡេនីន ។
ប្រាប់សារព័ត៌មានរដ្ឋវៀតណាម ក្នុងខែមេសា ឆ្នាំ២០១៩ មន្ត្រីបម្រើការក្នុងសារមន្ទីរ ដែលដាក់តាំងសាកសព ហូ ជីមិញ ឈ្មោះថា Cao Dinh Kiem អះអាងថា អ្នកជំនាញជនជាតិរុស្ស៊ី ផលិតសារធាតុគីមី ដើម្បីរក្សាសាកសព ដោយសម្ងាត់ ។ លោក បន្តថា៖ «កាលនោះ ពួកគេ បានបញ្ចប់ការផលិតនោះ កម្មករជនជាតិវៀតណាម ត្រូវបានដាក់ការងារឲ្យបោសសម្អាតទីតាំងផលិតនោះ ហើយពេលនោះហើយដែល យើងមានឱកាសសិក្សាអំពីរូបធាតុផ្សំដែលនៅសេសសល់»។
ទោះបីជាអ្នកវិទ្យាសាស្ត្រវៀតណាម សព្វថ្ងៃនេះ ចេះដឹងច្បាស់អំពីរបៀបនៃការរក្សាសាកសពក៏ដោយក្តី ប៉ុន្តែអ្នកវិទ្យាសាស្ត្ររុស្ស៊ី នៅតែបន្ត ត្រូវបានហៅដោយភាគីវៀតណាមឲ្យមកជួយរក្សាសាកសពរបស់ហូ ជីមិញ ជាប្រចាំដដែល៕