លោក ហ៊ុន ម៉ា​នី​៖ តួនាទី និង​ភាព​ទទួលខុសត្រូវ​រប​ស់​យុវជន នឹង​សម្រេចបាន​ការអភិវឌ្ឍ​ប្រទេស​នៅ​ឆ្នាំ​២០៣០
ជាតិ
សង្គមជាតិ
លោក ហ៊ុន ម៉ា​នី​៖ តួនាទី និង​ភាព​ទទួលខុសត្រូវ​រប​ស់​យុវជន នឹង​សម្រេចបាន​ការអភិវឌ្ឍ​ប្រទេស​នៅ​ឆ្នាំ​២០៣០
24, Jun 2019 , 10:19 pm        
រូបភាព
​ភ្នំពេញ​៖ តួនាទី និង​ភាព​ទទួលខុសត្រូវ​រប​ស់​យុវជន ពិត​ជាមាន​សារៈសំខាន់​ណាស់ ក្នុងការ​ឆក់យក​ឱកាស​ចូលរួមចំណែក ដើម្បី​សម្រេច​ការអភិវឌ្ឍ​ប្រទេសជាតិ​នៅ​ឆ្នាំ​២០៣០ និង​ឆ្ពោះទៅកាន់​ឆ្នាំ​២០៥០​។ លោក ហ៊ុន ម៉ា​នី ប្រធាន​សហភាព​សហព័ន្ធ​យុវជន​កម្ពុជា (​ស​.​ស​.​យ​.​ក​) បាន​លើកឡើងថា អ្វីៗ​ក៏ដោយ​គឺ​ត្រូវការ​យុវជន​ចូលរួម និង​ឈ្វេងយល់​ពីអ្វី​ដែលជា​ការប្រឹងប្រែង​របស់​រដ្ឋាភិបាល​មក​ដល់​ថ្ងៃនេះ និង​បន្តធ្វើ​ទៅមុខ​ថែមទៀត​។​

 
​លោក ហ៊ុន ម៉ា​នី បាន​ឆ្លើយតប​នឹង​សំណួរ​របស់​អ្នកកាសែត ក្រោយ​កិច្ចប្រជុំ​គណៈកម្មាធិការ​កណ្តាលរ​បស់ ស​.​ស​.​យ​.​ក នៅ​ខេត្តសៀមរាប នា​ថ្ងៃទី​២៣ មិថុនា ថា ស​.​ស​.​យ​.​ក ពីមួយ​ឆ្នាំទៅ​មួយឆ្នាំ បាន​ក្លាយជា​វេទិកា​មួយ​រីកលូតលាស់​បន្ថែម ព្រោះ​វេទិកា​នេះ អាច​ផ្តល់ឱកាស​ដល់​យុវជន យុវនារី​ចូលរួម និង​លះបង់​អ្វីៗ ដោយ​ស្ម័គ្រចិត្ត​របស់ខ្លួន​ជូន​ដល់​សង្គមជាតិ​។ 
 
​ប្រធាន​ស​.​ស​.​យ​.​ក រូបនេះ បាន​និយាយ​ដូច្នេះ​៖«​ពេល​មានការ​ចូលរួម​ស្ម័គ្រចិត្ត​ពី​យុវជន ជា​បន្តបន្ទាប់ គឺ​វា​បាន​ក្លាយជា​វេទិកា​មួយ​ដែល​ឱ្យ​យុវជន ដែលមាន​ចិត្ត ឆន្ទៈ បេះដូង និង​ការលះបង់ ដើម្បី​សង្គមជាតិ​។ ខ្ញុំ​សូម​កញ្ជាក់​ថា ការចូលរួមចំណែក​នេះ គឺ​យុវជន​អាច​ហ្វឹកហាត់​ខ្លួនឯង  អាច​សាកល្បង​ថា តើ​ខ្លួន​អត់ធន់​ប៉ុនណា​... អាច​លះបង់​ពេលវេលា​ខ្លួនឯង​ប៉ុនណា​...​មាន​ឆន្ទៈ​ប៉ុនណា​ជូន​សង្គម​យ៉ាណា​....​ធ្វើ​ការងារ​សង្គម​យ៉ាង​ណា ការធ្វើការងារ​ជា​ក្រុម​យ៉ាងណា ទាំងនេះ​គឺជា​មូលដ្ឋាន ក្នុងការ​បណ្តុះបណ្តាល​ខ្លួនឯង​ឱ្យក្លាយ​ជា​អ្នកដឹកនាំ ក្នុង​កម្រិត​ណាមួយ​នាពេល​អនាគត​»​។ 
 
​តាមរយៈ​មូលដ្ឋាន​ទាំងនេះ ស​.​ស​.​យ​.​ក ផ្តល់ឱកាស និង​បំផុសស្មារតី​ដល់​យុវជន ចូលរួម និង​ចេះ​ទទួលខុសត្រូវ  និង​ចេះ​ចូលរួម​ផ្តល់​ជា​កម្លាំងចិត្ត​ដែលជា​ដំណោះស្រាយ​ដែល ស​.​ស​.​យ​.​ក ចង់​ធ្វើ និង​ចង់បាន នាពេល​អនាគត​។ នេះ​ជាការ​បន្ថែម​របស់លោក ហ៊ុន ម៉ា​នី​៕  


កិច្ចប្រជុំគណៈកម្មាធិការកណ្តាលនៃសហភាពសហព័ន្ធយុវជនកម្ពុជា (ប្រភពរូបបានពីទំព័រហ្វេសប៊ុកស.ស.យ.ក៕
 

Tag:
 យុវជន​
  ហ៊ុន ម៉ា​នី
© រក្សាសិទ្ធិដោយ thmeythmey.com