អន្តរជាតិ
នាយករដ្ឋមន្រ្តីវៀតណាម ង្វៀន សួនហ្វុក ជួបជាមួយសមភាគីសិង្ហបុរី លី សៀនឡុង នៅបាងកក។ រូបភាព VGP
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីវៀតណាម ង្វៀន សួនហ្វ៊ុក (Nguyen Xuan Phuc) បានរិះគន់ចំៗសម្ដីរបស់នាយករដ្ឋមន្ត្រីសិង្ហបុរី លី សៀនឡុង ដែលថា វៀតណាមឈ្លានពានកម្ពុជា។ នាជំនួបនៅទីក្រុងបាងកកនៅថ្ងៃទី២២ ខែមិថុនា លោក ង្វៀន សួនហ្វ៊ុក ប្រាប់លោក លី ដោយត្រង់ថា ការនិយាយបែបនេះ ធ្វើឲ្យប៉ះពាល់ដល់កម្ពុជា និងវៀតណាម។ ប៉ុន្តែលោក លី និយាយថា លោកមិនរំពឺងវៀតណាម និងកម្ពុជាផ្លាស់ប្ដូរទស្សនៈរបស់ខ្លួនលើបញ្ហាឈឺចាប់នេះឡើយ។
នាយកករដ្ឋមន្ត្រីសិង្ហបុរី លី សៀនឡុង និងសមភាគីវៀតណាម ង្វៀន សួនហ្វ៊ុក បានឆ្លៀតជួបគ្នានៅក្រៅកិច្ចប្រជុំមេដឹកនាំអាស៊ាននៅប្រទេសថៃដែលទើបបញ្ចប់ថ្មីៗនេះ។ សារព័ត៌មានសិង្ហបុរី Straits Times ផ្សាយថា ជំនួបនេះ ត្រូវបានស្នើដោយលោក លី ផ្ទាល់ដើម្បីជជែកពីបញ្ហាក្នុងទំនាក់ទំនងទ្វេភាគីដែលកើតឡើងនៅពេលថ្មីៗនេះដែរ។ នោះ គឺការលើកឡើងរបស់លោក លី ដែលថា វៀតណាមឈ្លានពានកម្ពុជានៅឆ្នាំ១៩៧៩ ។
នាជំនួបដែលធ្វើឡើងមុនជំនួបមេដឹកនាំអាស៊ាននៅថ្ងៃទី២២ ខែមិថុនា លោក ង្វៀន សួនហ្វ៊ុក បានបង្ហាញការមិនពេញចិត្តចំពោះសម្ដីលោក លី ។ សារព័ត៌មានវៀតណាម VN Express បានស្រង់សម្ដីលោក ង្វៀន ថា ប្រវត្តិសាស្ត្រ បញ្ជាក់ហើយថា ការលើកឡើងរបស់លោក លី ជុំវិញលើការធ្វើសង្គ្រាមជាមួយខ្មែរក្រហមជារឿងមិនពិតឡើយ ហើយការនិយាយលំអៀងបែបនេះ មានផលប៉ះពាល់អវិជ្ជមានដល់កម្ពុជា និងវៀតណាម ពិសេសគ្រួសារកម្លាំងស្ម័គ្រចិត្តវៀតណាមដែលជួយកម្ពុជា។
អត្ថបទទាក់ទង
មិនមែនតែមេដឹកនាំវៀតណាមឡើយ លោក លី ក៏ឆ្លៀតជាមួយនាយករដ្ឋមន្ត្រីកម្ពុជាដើម្បីជជែកពីបញ្ហានេះដែរ។ នាយករដ្ឋមន្ត្រីសិង្ហបុរីត្រូវបានស្រង់សម្ដីដោយ Strait Times ដូចនេះថា៖ «ខ្ញុំបានបង្ហាញពីជំហររបស់ខ្ញុំ ហើយបានពន្យល់ពីមូលហេតុដែលខ្ញុំនិយាយពីសង្គ្រាមនៅកម្ពុជា និងទស្សនៈយល់ឃើញរបស់សិង្ហបុរីលើបញ្ហានេះ។»
លោក លី បន្តទៀតថា ជារឿងធម្មជាតិ ដែលជំហរទាំងពីរនេះខុសគ្នា តែសិង្ហបុរីមិនរំពឹងថា ពួកគេ (វៀតណាមនិងកម្ពុជា) ផ្លាស់គំនិតពួកគេឡើយ ហើយពួកគេក៏មិនរំពឹងថា សិង្ហបុរីនឹងផ្លាស់ប្ដូរទស្សនៈរបស់ខ្លួនលើបញ្ហានេះដែរ។ លោកបន្ថែមថា ភាគីទាំងអស់ បានដើរទៅហួសពីបញ្ហានោះ និងក្លាយជាមិត្តភក្តិ និងដៃគូ ហើយផ្លូវដែលល្អជាងគេក្នុងការបោះជំហានទៅមុខ គឺការនិយាយដោយស្មោះត្រង់ពីអតីតកាល។ ដូចនេះ ភាគីទាំងអស់អាចបង្កើតការទុកចិត្តគ្នា និងធ្វើការជាមួយគ្នាកាន់តែជិតដិត។
សម្រាប់ជំនួបនៅបាងកក នាយករដ្ឋមន្ត្រីសិង្ហបុរី និងវៀតណាម និយាយថា បានជួយឲ្យភាគីទាំងពីរយល់ដឹងពីគ្នាកាន់តែប្រសើរ ហើយក៏បានយល់ព្រមបន្តកិច្ចសហប្រតិបត្តិការដើម្បីពង្រឹង និងអភិវឌ្ឍទំនាក់ទំនងទ្វេភាគីគ្រប់វិស័យ៕
Tag:
វៀតណាម
សិង្ហបុរី
កម្ពុជា
លី សៀនឡុង
ង្វៀន សួនហ្វ៊ុក
© រក្សាសិទ្ធិដោយ thmeythmey.com
