ជាតិ
ករណីរលំអគារ៖ សម្តេច ហ៊ុន សែន ទទួលបានថវិកាសប្បុរសជាង២លានដុល្លារអាមេរិក
× គិតត្រឹមម៉ោង១២ថ្ងៃត្រង់ ថ្ងៃទី២៥ ខែមិថុនា សម្តេចនាយករដ្ឋមន្ត្រី ហ៊ុន សែន ទទួលបានថវិកាសប្បុរសចំនួន ២ ១៩៨ ៤០០ដុល្លារអាមេរិក ដើម្បីជួយដល់ជនរងគ្រោះ និងក្រុមគ្រួសារជនរងគ្រោះ ក្នុងគ្រោះថ្នាក់បាក់អគារ៧ជាន់នៅខេត្តព្រះសីហនុ។ នេះបើតាមការបញ្ជាក់របស់សម្តេចនាយករដ្ឋមន្ត្រី ហ៊ុន សែន ក្នុងទំព័រហ្វេសប៊ុករបស់ខ្លួន។
ថវិកាដែលសម្តេច ហ៊ុន សែន ទទួលបានទាំងនោះ គឺក្រៅពីព្រះរាជអំណោយរបស់ព្រះមហាក្សត្រ និងសម្តេចម៉ែរួមទាំងជំនួយឧបត្ថម្ភរបស់ព្រឹទ្ធសភា រាជរដ្ឋាភិបាល និងកាកបាទក្រហមកម្ពជា។ ទាក់ទងនឹងការបែងចែកថវិកាសប្បុរសនោះ ប្រមុខរដ្ឋាភិបាលបានបញ្ជាក់ថា៖ «ថវិកានេះត្រូវបានឧបត្ថម្ភជូនអ្នករបួសក្នុងម្នាក់១ម៉ឺនដុល្លារសម្រាប់២៤នាក់ ឯ២នាក់ទៀតដែលស្ថិតក្រោមគំនរបាក់បែកប្រមាណជិត៦០ម៉ោងដែលនៅរស់រានមានជីវិតដោយសារការជួយសង្គ្រោះត្រូវបានឧបត្ថម្ភក្នុងម្នាក់ចំនួន៣ម៉ឺនដុល្លារអាមេរិក។ សរុបអ្នករបួសចំណាយអស់៣០ម៉ឺនដុល្លារអាមេរិក»។
ចំពោះថវិកា ១ ៨៩៨ ៤០០ ដុល្លារដែលនៅសល់ពីការចំណាយតាមគម្រោងនោះ ខុទ្ទកាល័យនាយករដ្ឋមន្ត្រី បែងចែងស្មើៗគ្នាសម្រាប់ក្រុមគ្រួសារអ្នកស្លាប់២៨នាក់ ដោយក្នុង១នាក់ទៀតទទួលបាន ៦៧ ៨០០ដុល្លារ ដោយមិនគិតពីថវិការដ្ឋាភិបាល១ម៉ឺនដុល្លារ។
សម្តេច ហ៊ុន សែន បានអះអាងថា៖ «លោកសេង ទៀងនាយករងខុទ្ទកាល័យរបស់ខ្ញុំនឹងរៀបចំជូនក្រុមគ្រួសារសពតាមរយៈធនាគារដើម្បីធានាសុវត្ថិភាពសម្រាប់ក្រុមគ្រួសារសព។ ខ្ញុំសូមអរគុណចំពោះសប្បុរសជនទាំងអស់ដែលបានជួយជាថវិកាសម្រាប់ជនរងគ្រោះទាំងអ្នកស្លាប់ទាំងអ្នករបួសដោយមិនគិតពីនិន្នាការនយោបាយ»។
ជាមួយគ្នានេះ សម្តេចបានកោតសរសើរកម្លាំង រុករក និងជួយសង្គ្រោះ រួមទាំងកម្មករ និងអ្នកបច្ចេកទេសចិនដែលបានចូលរួមក្នុងកិច្ចការនេះតាំងពីការចាប់ផ្តើមរហូតដល់ចប់៕
© រក្សាសិទ្ធិដោយ thmeythmey.com