ជាតិ
សេដ្ឋកិច្ច
លោក ច្រឹក សុខនីម៖ បាក់អគារ មិនប៉ះពាល់វិស័យអចលនទ្រព្យនៅព្រះសីហនុនោះទេ
×![]()
ភ្នំពេញ៖ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងថា ករណីបាក់រលំអគារនៅខេត្តព្រះសីហនុ ក្នុងពេលថ្មីៗនេះ មិនបានគំរាមកំហែងដល់វិស័យអចលនទ្រព្យក្នុងខេត្តមួយនេះ ក៏ដូចនៅទូទាំងប្រទេសនោះទេ។ លោកអះអាងថា នេះជាករណីរបស់ម្ចាស់គម្រោងមួយប៉ុណ្ណោះ ពោលគឺជារឿងរបស់បុគ្គលមួយប៉ុណ្ណោះ ដែលមិនអាចឈានដល់ការប៉ះពាល់ដល់ទំនុកចិត្តក្នុងវិស័យនេះនោះទេ។
សូមស្ដាប់ប្រសាសន៍លោក ច្រឹក សុខនីម ខាងក្រោមនេះ៖
«ខ្ញុំថាអត់ប៉ះពាល់ទេ មិនមែនអគារចិនទាំងអស់មានបញ្ហាឯណា គឺមួយក្នុងចំណោមនោះ ដែលជារឿងបុគ្គល»។ នេះការលើកឡើងរបស់លោក ច្រឹក សុខនីម។
បន្ទាប់ពីវិនិយោគសាងសង់ជាបន្តបន្ទាប់ ខុនដូ និងអគារផ្សេងៗយ៉ាងច្រើនយូនីត គ្រោងនឹងត្រូវបញ្ចេញនៅលើទីផ្សារ។ តើករណីបាក់អគារ ដែលត្រូវបានអះអាងថា គ្មានបច្ចេកទេសមួយនេះ មានការរំខានដល់ទំនុកចិត្តរបស់អ្នកទិញ សម្រាប់គម្រោងផ្សេងៗដែរទេ? លោក សុខនីម ឲ្យដឹងដូច្នេះថា៖«អ្នកទិញចុងក្រោយ នឹងចាប់ផ្ដើមរកទិញ (អចលនទ្រព្យ) យីហោក្រុមហ៊ុនដែលទុកចិត្តបាន ដើម្បីធ្វើការងារដោយចីរភាព ដូចនេះក្រុមហ៊ុនត្រូវតែរៀបចំធ្វើរឿងនេះឡើង»។
លោក ច្រឹក សុខនីម បានគាំទ្រការបង្កើតគណៈកម្មការត្រួតពិនិត្យគុណភាពសំណង់នៅខេត្តព្រះសីហនុ ដែលរដ្ឋាភិបាលបានប្រកាសឡើងមួយថ្ងៃក្រោយថ្ងៃបាក់អគារ។ លោកថ្លែងដូចនេះថា៖«ការបង្កើតគណៈកម្មការគឺជារឿងចាំបាច់ និងបន្ទាន់ ព្រោះរឿងបានកើតឡើងហើយជាអតីតកាល តែយើងរកយន្តការដោះស្រាយ កុំឲ្យកើតឡើងនៅពេលបច្ចុប្បន្ន និងអនាគត»។ លោកថែមទាំងគាំទ្រឲ្យកម្ទេច ឬដោះស្រាយអគារណាដែលត្រូវបានគណៈកម្មការរកឃើញអត់គុណភាព ក្នុងពេលចុះប្រតិបត្តិការ ដោយគ្មានការលាក់បាំងគម្រោងអគារ ខុសបច្ចេកទេសទាំងនោះទេ។
គួរបញ្ជាក់ថា ការបាក់រលំអគារកម្ពស់៧ជាន់ នៃគម្រោងសាងសង់សណ្ឋាគារ ដែលចិនជួលដីពលរដ្ឋខ្មែរនេះ បានកើតឡើងស្របពេលដែលគម្រោងសំណង់អគារជាច្រើន កំពុងផុសផុលនៅខេត្តព្រះសីហនុ ដែលវិនិយោគដោយចិន៕
Tag:
ច្រឹក សុខនីម
© រក្សាសិទ្ធិដោយ thmeythmey.com
