ជាតិ
សង្គមជាតិ
ពីថ្ងៃទី២៦ មិថុនា ដល់ថ្ងៃទី២ កក្កដា ខេត្តជាប់សមុទ្រមានភ្លៀងធ្លាក់ខ្លាំង ជាងបណ្តាខេត្តផ្សេងៗ
×![]()
ភ្នំពេញ៖ ក្រសួងធនធានទឹក បានព្យាករណ៍ថា ចាប់ពីថ្ងៃទី២៦ ខែមិថុនា ដល់ថ្ងៃទី២ ខែកក្កដា បណ្តាខេត្តជាប់សមុទ្រ នឹងមានភ្លៀងធ្លាក់ពីបរិមាណបង្គួរទៅច្រើន។ ដោយឡែកបណ្តារាជធានី-ខេត្តផ្សេងទៀត មានភ្លៀងធ្លាក់ក្នុងកម្រិតខ្សោយ ទៅមធ្យម។ 
ចាប់ពីថ្ងៃទី២៦ មិថុនា ដល់ថ្ងៃទី២ កក្កដា បណ្តាខេត្តមាត់សមុទ្រ រួមមានខេត្តកោះកុង និងខេត្តព្រះសីហនុ នឹងមានភ្លៀងធ្លាក់រាយប៉ាយពីបង្គួរ ទៅច្រើន គួបផ្សំនឹងខ្យល់បោកបក់ និងរលកសមុទ្រខ្ពស់ៗ។ នេះបើយោងតាមសេចក្តីជូនដំណឹងស្តីពីស្ថានភាពអាកាសធាតុ ពីថ្ងៃទី២៦ មិថុនា ដល់ថ្ងៃទី២ កក្កដា របស់ក្រសួងធនធានទឹក និងឧតុនិយម ដែលពន្យល់ថាដោយសារ ជ្រលងសម្ពាធទាប នៅបន្តអូសបន្លាយលើប្រទេសកម្ពុជា ស្របពេលដែលខ្យល់មូសុងនិរតី បង្កើនឥទ្ធិពល។
បើតាមសេចក្តីជូនដំណឹងដដែល ឥទ្ធិពលខ្យល់មូសុងនិរតី ក៏ធ្វើឲ្យបណ្តារាជធានី និងខេត្តមួយចំនួន ដូចជារាជធានីភ្នំពេញ ខេត្តកណ្តាល កំពង់ស្ពឺ តាកែវ និងកំពត អាចមានភ្លៀងធ្លាក់ ក្នុងកម្រិតខ្សោយទៅមធ្យម។ រីឯខេត្តជាប់ព្រំដែនកម្ពុជា-វៀតណាម និងនៅភាគពាយព្យខាងជើង និងឦសាន អាចមានភ្លៀងធ្លាក់ ពីមធ្យមទៅបង្គួរ។ក្រសួងធនធានទឹក បានអំពាវនាវឲ្យសាធារណជន ជាពិសេសអ្នកនេសាទ និងអ្នកដែលធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ ដើម្បីជៀសវាងគ្រោះថ្នាក់ដែលអាចកើតមាន៕
Tag:
ភ្លៀង
អាកាសធាតុ
© រក្សាសិទ្ធិដោយ thmeythmey.com
