អន្តរជាតិ
ដើម «កូកា» គេយកទៅផលិតជា ថ្នាំញៀន កូកាអ៊ីន (ប្រភពរូប៖ AFP)
×![]()
ផលិតកម្មកូកាអ៊ីនសាកល ឈានដល់កម្រិតខ្ពស់បំផុតក្នុងឆ្នាំ២០១៧ ដោយបំបែកកំណត់ត្រាឆ្នាំ២០១៦ រហូតដល់ ២៥ភាគរយ ។ នេះបើយោងតាមភ្នាក់ងារអង្គការសហប្រជាជាតិទទួលបន្ទុកឧក្រិដ្ឋកម្ម និងថ្នាំញៀន ក្នុងរបាយការណ៍ប្រចាំឆ្នាំរបស់ខ្លួន។ កំណើនដ៏ខ្លាំងក្លានេះ កើតឡើងខណៈផលិតកម្មហក់ឡើងខ្ពស់ ក្រោយជម្លោះក្នុងប្រទេសកូឡុំប៊ីបានបិទបញ្ចប់។
ក្នុងរបាយការណ៍ ដែលបានចុះផ្សាយនៅថ្ងៃទី ២៥ ខែមិថុនា ការហក់ឡើងនៃផលិតកម្មកូកាអ៊ីន កើតឡើងដោយសារតែ ការកើនឡើងនៃរោងចក្រផលិតកូកាអ៊ីនក្នុងប្រទេសកូឡុំប៊ី ដែលប៉ាន់ស្មានថា បានផលិតកូកាអ៊ីនប្រមាណ ៧០ភាគរយនៃកូកាអ៊ីនសរុបរបស់ពិភពលោក។ ចន្លោះពីឆ្នាំ ២០០៧ ដល់ ឆ្នាំ២០១៧ ក្នុងប្រទេសអាមេរិកឡាទីននេះ មានកំណើននៃការផលិតកូកាអ៊ីនដល់ទៅ ៥០ភាគរយ ដែលឈានដល់ចំនួន ១៩៧៦តោន កាលពីឆ្នាំ២០១៥។
យោងតាមការចុះផ្សាយរបស់ទីភ្នាក់ងារព័ត៌មាន AFP ក្នុងរយៈពេល១០ឆ្នាំចុងក្រោយនេះ បរិមាណកូកាអ៊ីន ត្រូវបានរឹបអូសនៅទូទាំងពិភពលោក កើនឡើងប្រមាណ ៧៤ភាគរយ ។ តួយ៉ាង ក្នុងឆ្នាំ២០១៧ អាជ្ញាធរនៅជុំវិញពិភពលោក បានឃាត់ទុកបរិមាណថ្នាំញៀនប្រភេទនេះទាំងអស់ដល់ទៅ ១២៧៥តោន ដែលកើនឡើង ១៣ភាគរយ បើធៀបទៅនឹងឆ្នាំ២០១៦។
ទាក់ទិននឹងតួលេខនេះ របាយការណ៍ដដែល អះអាងថា កិច្ចប្រឹងប្រែងក្នុងការអនុវត្តច្បាប់ ចាប់ផ្តើមមានប្រសិទ្ធភាពជាងមុន ហើយកិច្ចសហប្រតិបត្តិការអន្តរជាតិដ៏រឹងមាំរួមចំណែកយ៉ាងធំធេងលើកិច្ចការនេះ។
មែនទែនទៅ ផលិតកម្មកូកាអ៊ីនក្នុងតំបន់ភាគកណ្តាលមួយចំនួនក្នុងប្រទេសកូឡុំប៊ី មានការធ្លាក់ចុះ ក្រោយពីមានកិច្ចព្រមព្រៀងសន្តិភាពឆ្នាំ២០១៦ ជាមួយអតីតកងកម្លាំបដិវត្តន៍កូឡុំប៊ី ខណៈប្រជាកសិករ ត្រូវបានរដ្ឋាភិបាលផ្តល់ឲ្យនូវជម្រើសល្អផ្សេងដែលស្របច្បាប់ ជាជាងការដាំដុះដើម កូកា។
យ៉ាងណាមិញ របាយការណ៍របស់ UN រកឃើញថា ក្រោយពេលជម្លោះនៅកូឡុំប៊ីចប់ ការដាំដុះដំណាំកូកាមានការកើនឡើង ដោយវាលដាំដុះថ្មីៗមានទីតាំងឆ្ងាយពីទីក្រុងសំខាន់ៗ ហើយតំបន់ទាំងនេះ បច្ចុប្បន្ន ស្ថិតក្រោមការកាន់កាប់របស់ឧក្រិដ្ឋជនដែលពីមុនឡើយជារបស់ក្រុមបះបោរ។
ម្យ៉ាងវិញទៀត របាយការណ៍ដដែល ក៏បានផ្តល់តួលេខក្នុងឆ្នាំ២០១៨ សម្រាប់ផលិតកម្មអាភៀនសាកលផងដែរ ដែលកើនឡើងលើសពីកំណត់ត្រា ក្នុងឆ្នាំ២០១៧។ នៅទូទាំងពិភពលោក មនុស្សជាង ៣៥លាននាក់ រងផលប៉ះពាល់ក្នុងឆ្នាំ២០១៧ ដោយសារការប្រើប្រាស់ថ្នាំញៀន។ តួលេខនេះ មានកំណើន ៤,៥លាននាក់ បើធៀបទៅនឹងការប៉ាន់ស្មាន កាលពីឆ្នាំ២០១៦។ ភ្នាក់ងារ UN ខាងលើនេះ បានប៉ាន់ស្មានទៀតថា ក្នុងឆ្នាំ២០១៧ មនុស្សប្រមាណ ៥៣,៤លាននាក់ ជាអ្នកញៀនអាភែន ដែលកើនឡើងជាង ៥៦ភាគរយ បើធៀបទៅនឹងឆ្នាំ២០១៦៕
Tag:
UN
Cocaine
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
