អន្តរជាតិ
កូរ៉េខាងជើង ប្រាប់កូរ៉េខាងត្បូងឲ្យឈប់ជ្រៀតជ្រែកក្នុងការចរចាជាមួយអាមេរិក
រូបភាព AFP
×![]()
ដោយ: តន ចាន់រិទ្ធារ៉ា
ក្រសួងការបរទេសកូរ៉េខាងជើង នៅថ្ងៃទី២៧ ខែមិថុនា បានប្រាប់កូរ៉េខាងត្បូងឲ្យឈប់ជ្រៀតជ្រែកការចរចារវាងខ្លួន និងអាមេរិកដើម្បីដោះស្រាយបញ្ហានុយក្លេអ៊ែរ។ សារដែលមានន័យព្រមានផងនោះ ធ្វើឡើងមួយថ្ងៃក្រោយប្រធានាធិបតីកូរ៉េខាងត្បូង មូន ចេអ៊ីន និយាយថា ព្យុងយ៉ាង និងវ៉ាស៊ីនតោនជួបគ្នាស្ងាត់ៗដើម្បីរៀបចំជំនួបមេដឹកនាំលើកទីបី។ កន្លងមក កូរ៉េខាងត្បូង ត្រូវបានគេមើលឃើញថា ជាតួអង្គសម្របសម្រួលក្នុងដំណើរការចរចាស្ដីពីនុយក្លេអ៊ែរដែលបច្ចុប្បន្នកំពុងជាប់គាំង។
កូរ៉េខាងជើង និងអាមេរិកជាគូសន្ទនាដោយផ្ទាល់។ នេះជាការលើកឡើងរបស់មន្ត្រីក្រសួងការបរទេសកូរ៉េខាងជើងម្នាក់នៅថ្ងៃទី២៧ ខែមិថុនាជុំវិញដំណើរការចរចាដើម្បីលុបបំបាត់នុយក្លេអ៊ែរ។ ការលើកឡើងបែបនេះ ប្រៀបដូចជាការទាត់ចោលតួនាទីរបស់កូរ៉េខាងត្បូងក្នុងការជជែកស្ដីពីបញ្ហានុយក្លេអ៊ែរនៅឧបទ្វីបកូរ៉េ ខណៈកូរ៉េខាងត្បូង ត្រូវបានគេចាត់ទុកជាអង្គជាប់ទាក់ទងដោយផ្ទាល់មួយក្នុងសំណុំរឿងរ៉ាំរ៉ៃមួយនេះ។
បន្ទាប់ពីបរិយាកាសនៅឧបទ្វីបធូរស្រាលខ្លាំងក្នុងឆ្នាំ២០១៨ កូរ៉េខាងត្បូង បានព្យាយាមអូសកូរ៉េខាងជើង និងអាមេរិកឲ្យខិតជិតគ្នា និងឈានដល់ការចរចាទល់មុខកម្រិតមេដឹកនាំដល់ទៅពីរដងផងដែរ។ ប្រធានាធិបតីកូរ៉េខាងត្បូង មូន ចេអ៊ីន ប្រកាន់ជំហរទន់ភ្លន់ដាក់កូរ៉េខាងជើង និងអនុវត្តនយោបាយសន្ទនាជាមួយមេដឹកនាំកូរ៉េខាងជើង គីម ជុងអ៊ុន ។ ក្រុងវ៉ាស៊ីនតោនវិញក៏តែងពិគ្រោះយោបល់ជាមួយសេអ៊ូលមិនដាច់ដែរលើការងាររំសាយនុយក្លេអ៊ែរនេះ។
នៅថ្ងៃទី២៦ ខែមិថុនា លោក មូន ក៏បង្ហើបថា អាមេរិក ជួបស្ងាត់ៗជាមួយកូរ៉េខាងជើងជុំវិញការរៀបចំជំនួបមេដឹកនាំកំពូលលើកទីបី។ ប៉ុន្តែមួយថ្ងៃក្រោយ កូរ៉េខាងជើងប្រាប់ឲ្យកូរ៉េខាងត្បូងឈប់លូកលាន់ការចរចាទៀត។ ក្នុងសេចក្ដីថ្លែងការណ៍ផ្សាយដោយទីភ្នាក់ងារព័ត៌មានរដ្ឋកូរ៉េខាងជើង KCNA មន្ត្រីក្រសួងការបរទេសកូរ៉េខាងជើងម្នាក់និយាយថា កូរ៉េខាងត្បូងកំពុងព្យាយាមដំកើងខ្លួនឯងជាអ្នកសម្របសម្រួលបញ្ហា។
យ៉ាងណាមិញ ក្រុងព្យុងយ៉ាង ហាក់មិនពេញចិត្តវត្តមានសេអ៊ូលឡើយ ដោយមន្ត្រីក្រុងព្យុងយ៉ាងដដែលបន្តថា បើកូរ៉េខាងជើងត្រូវទាក់ទងជាមួយវ៉ាស៊ីនតោន គឺអាចប្រើប្រាស់បណ្ដាញទំនាក់ទំនងដែលមានស្រាប់។ បើតាម KCNA មន្ត្រីក្រសួងការបរទេសកូរ៉េខាងជើងសង្កត់ធ្ងន់ថា កូរ៉េខាងជើង នឹងមិនទាក់ទងអាមេរិកតាមរយៈរដ្ឋាភិបាលកូរ៉េខាងត្បូងឡើយ។ គ្មានឡើយទំនាក់ទំនងក្រោយឆាក និងមុខរវាងសេអ៊ូល និងព្យុងយ៉ាង។
សេចក្ដីថ្លែងការណ៍ដដែល ក៏បានរំឭកអាមេរិកឲ្យផ្លាស់ប្ដូរមធ្យោបាយថ្មីដើម្បីបន្តកិច្ចសន្ទនាដែលកំពុងថមថយល្បឿនបន្តិចម្ដងៗ។ មន្ត្រីខាងលើប្រាប់អាមេរិកថា ពេលវេលានៅមិនសល់ច្រើនឡើយសម្រាប់ការនាំយកវិធីសាស្ត្រសម្រាប់ការចរចា ខណៈឱសានវាទរបស់លោក គីម ដែលទុកពេលត្រឹមដំណាច់ឆ្នាំសម្រាប់កិច្ចសន្ទនា ក៏ខិតជិតដល់ផងដែរ។
ប្រធានាធិបតីអាមេរិក ដូណាល់ ត្រាំ នឹងជួបជាមួយលោក មូន នៅសេអ៊ូល ក្រោយបញ្ចប់ដំណើរទស្សនកិច្ចនៅជប៉ុន។ បញ្ហានុយក្លេអ៊ែរកូរ៉េខាងជើង នឹងនៅតែរបៀបវារៈសំខាន់ដដែល។ គេរំពឹងថា លោក មូន នឹងការប្រឹងប្រែងរបស់លោកទៀត ខណៈលោក ត្រាំ វិញ អះអាងថា លោកអាចមានទំនាក់ទំនងជាមួយលោក គីម តាមច្រកដោយឡែក ដ្បិតគ្មានជំនួបទល់មុខគ្នាឡើយ៕
Tag:
កូរ៉េខាងជើង
កូរ៉េខាងត្បូង
អាមរិក
© រក្សាសិទ្ធិដោយ thmeythmey.com
