កីឡាជាតិ
ជាតិ
ត្បូងឃ្មុំរំពឹងលេងបានល្អក្នុងជំនួបជាមួយព្រះខ័នរាជស្វាយរៀង ខណៈភ្នំពេញក្រោនប៉ះកំពង់ចាម
× ក្រុមភ្នំពេញក្រោនបើកទ្វារកីឡដ្ឋាន R.S.N ទទួលភ្ញៀវកំពង់ចាម ខណៈក្រុមការពារតំណែងជើងឯកព្រះខ័នរាជស្វាយរៀងជួបក្រុមភ្ញៀវ ត្បូងឃ្មុំម្ចាស់ជើងឯកថ្នាក់ខេត្ត សម្រាប់ជំនួបជើងទី១ពានរង្វាន់សម្តេច ហ៊ុន សែន ថ្នាក់ជាតិនៅម៉ោង៦ល្ងាចថ្ងៃទី២៧ មិថុនានេះ។ ទោះមិនរំពឹងឈ្នះ តែត្បូងឃ្មុំដែលដឹកនាំដោយលោក ផន រស្មីពេជ្រ ប្តេជ្ញាថា នឹងព្យាយាមរារាំងមិនឲ្យមានការស៊ុតបញ្ចូលទីច្រើនពីម្ចាស់ផ្ទះព្រះខ័នរាជស្វាយរៀង។
លោក កា វចនា អនុប្រធានមន្ទីរអប់រំ យុវជន និងកីឡាខេត្តត្បូងឃ្មុំបាននិយាយថា ក្រុមត្បូងឃ្មុំមិនរំពឹងថា អាចយកឈ្នះក្រុមព្រះខ័នរាជស្វាយ ដែលជាក្រុមការពារតំណែងជើងឯកបានឡើយនៅល្ងាចនេះ។ ប៉ុន្តែក្រុមជើងឯកថ្នាក់ខេត្តមួយនេះ ប្តេជ្ញាប្រឹងប្រែងឲ្យអស់សមត្ថភាពក្នុងការការពារសំណាញ់ទីឲ្យបានល្អ។
«ក្រុមព្រះខ័នរាជស្វាយរៀង គឺជាខ្លាកំណាចមួយ ខ្ញុំគិតថាខ្ញុំមិនមានសង្ឃឹមក្នុងការយកឈ្នះនោះទេ ប៉ុន្តែខ្ញុំនឹងព្យាយាមធ្វើយ៉ាងណាកុំឲ្យរបូតគ្រាប់បាល់ច្រើនពេក បើត្រឹម៥គ្រាប់ឲ្យគាត់យកចុះ ព្រោះក្រុមខ្ញុំវាខ្សោយដែរ»។ នេះជាការលើកឡើងរបស់លោក កា វចនា ដែលបានបន្ថែមថា ក្រុមត្បូងឃ្មុំបានហ្វឹកហាត់ត្រៀមខ្លួនបានយ៉ាងល្អក្នុងការតទល់ជាមួយជើងខ្លាំងនៅថ្ងៃនេះ៕
© រក្សាសិទ្ធិដោយ thmeythmey.com