អន្តរជាតិ
រុស្ស៊ី ដកទ័ពចេញពីវេណេស៊ុយអេឡា ខណៈលោក ពូទីន ត្រៀមជួបត្រាំនៅ G20 ប្រភពរូប៖ AFP
× រុស្ស៊ី បានដកក្រុមអ្នកជំនាញយោធារបស់ខ្លួនចេញពីប្រទេសវេណេស៊ុយអេឡា នៅថ្ងៃទីពុធ ទី ២៦ ខែមិថុនា ។ ការបញ្ជាឲ្យដកទ័ពទាំងនេះ ធ្វើឡើងខណៈប្រធានាធិបតីរុស្ស៊ី លោក វ្ល៉ាឌីមៀ ពូទីន ត្រៀមខ្លួនសម្រាប់កិច្ចពិភាក្សាជាមួយមេដឹកនាំអាមេរិក លោក ដូណាល់ ត្រាំ ក្នុងជំនួបកំពូល G20 នាសប្តាហ៍នេះ។
តាមរយៈការបង្ហោះលើបណ្តាញសង្គមហ្វេសប៊ុក ស្ថានទូតរុស្ស៊ីប្រចាំក្រុងការ៉ាកាស គូសបញ្ជាក់ថា យន្តហោះយោធាប្រភេទ Il-62 plane ដឹកក្រុមអ្នកជំនាញជនជាតិរុស្ស៊ី ដែលបានធ្វើការជាមួយរដ្ឋាភិបាលវេណេស៊ុយអេឡាអស់រយៈពេលជាច្រើនខែមកហើយនោះ បានចាកចេញពីក្រុងការ៉ាកាសត្រឡប់ទៅកាន់ទីក្រុងមូស្គូវិញ កាលពីថ្ងៃទី ២៦ មិថុនា។
ការបញ្ជាដកទ័ពនេះ ធ្វើឡើង៣ខែក្រោយពី រុស្ស៊ីទទួលរងនូវការរិះគន់ និងការខឹងសម្បារជាខ្លាំងពីសំណាក់សហរដ្ឋអាមេរិក ក្រោយពង្រាយអ្នកជំនាញយោធាប្រមាណ ១០០នាក់ ក្នុងវេណេស៊ុយអេឡា ។ ការបញ្ជូនយោធារុស្ស៊ីទៅកាន់ប្រទេសអាមេរិកឡាទីននេះ បានកើតឡើងបន្ទាប់ពីក្រុងវ៉ាស៊ីនតោន បានបង្ហាញជំហរថា ខ្លួនអាចប្រើប្រាស់កម្លាំងយោធា ដើម្បីផ្តួលរំលំរបបលោក នីកូឡាស់ ម៉ាឌុយរ៉ូ ដែលស្និទ្ធរុស្ស៊ី។
ក្នុងសេចក្តីថ្លែងការណ៍ដដែល ស្ថានទូតរុស្ស៊ីចាត់ទុក ការដកទ័ពក្នុងប្រទេសវេណេស៊ុយអេឡានេះ គឺជាកិច្ចសហប្រតិបត្តិការយោធារវាងប្រទេសទាំងពីរ ដោយអះអាងថា ខ្លួននឹងបន្តធ្វើរឿងនេះទៀត។ ស្ថានទូត បន្ថែមទៀតថា រុស្ស៊ី បានបញ្ជូនសម្ភារៈទំនើបៗទៅកាន់វេណេស៊ុយអេឡាសម្រាប់ការថែទាំជាទៀងទាត់។ ម្យ៉ាងវិញទៀត អ្នកជំនាញរុស្ស៊ី បានផ្តល់ការហ្វឹកហាត់បច្ចេកទេសដល់យោធាវេណេស៊ុយអេឡាផង។
យ៉ាងណាមិញ បេសកកម្មរុស្ស៊ី ក៏បានបកស្រាយទៀតថា ផ្ទុយពីរបាយការណ៍នានាកន្លងទៅ រុស្ស៊ី គ្មានវត្តមានកងទ័ពក្នុងប្រទេសវេណេស៊ុយអេឡានោះទេ ប៉ុន្តែវាជាការបំពេញតាមកិច្ចសន្យាថែទាំ ដោយគ្មានគោលបំណងបង្កអស្ថិរភាពណាមួយឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
ជុំវិញការសម្រេចអ្នកជំនាញយោធារបស់រុស្ស៊ីចេញពីវេណេស៊ុយអេឡានេះ គេមើលឃើញថា កើតឡើងខណៈប្រធានាធិបតីរុស្ស៊ី លោក ពូទីន កំពុងត្រៀមរៀបចំកិច្ចពិភាក្សាជាមួយ លោក ដូណាល់ ត្រាំ នៅក្រៅជំនួបកំពូល G20 ក្នុងប្រទេសជប៉ុន នៅថ្ងៃទី២៨ ខែមិថុនា ឆ្នាំ២០១៩។
សូមបញ្ជាក់ថា ក្នុងខែមីនា ឆ្នាំ២០១៩កន្លងទៅ ក្រុងមូស្គូ បានបញ្ជូនអ្នកជំនាញយោធាប្រមាណ ១០០នាក់ និងសម្ភារទៅកាន់ក្រុងការ៉ាកាស។ ទាក់ទិននឹងការបញ្ជូននេះ រុស្ស៊ី អះអាងថា នៅពេលនេះ ពួកគេ នឹងរក្សាវត្តមានក្នុងប្រទេសវេណេស៊ុយអេឡា សម្រាប់រយៈពេលយូរតាមតម្រូវការរបស់ប្រទេសម្ចាស់ផ្ទះ៕
Tag:
រុស្ស៊ី
សហរដ្ឋអាមេរិក
វេណេស៊ុយអេឡា
G-20
© រក្សាសិទ្ធិដោយ thmeythmey.com