ជាតិ
សង្គមជាតិ
រដ្ឋមន្ត្រីដែនដី ស្នើម្ចាស់សំណង់ កុំឲ្យមានទម្លាប់ «ហុចស្រោមសំបុត្រ» ទៅមន្ត្រី លោក ជា សុផារ៉ា ថ្លែងក្នុងកិច្ចប្រជុំមួយម្ចាស់ម៉ៅការសំណង់ និងគណៈកម្មការត្រួតពិនិត្យ (រូបពីរដ្ឋបាលខេត្តព្រះសីហនុ)
× លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានស្នើដល់ម្ចាស់សំណង់ និងក្រុមហ៊ុនម៉ៅការទាំងអស់ ត្រូវបញ្ឈប់ទម្លាប់ហុចស្រោមសំបុត្រ ពេលដែលគណៈកម្មការចុះត្រួតពិនិត្យសំណង់អគាររបស់ពួកគេ។ លើសពីនេះ លោក បានស្នើឲ្យមន្ត្រីនៃគណៈកម្មការត្រួតពិនិត្យ ត្រូវធ្វើការតាមជំនាញ និងគោរពតាមវិជ្ជាជីវៈរបស់ខ្លួន។
ការលើកឡើងរបស់លោក ជា សុផារ៉ា គឺធ្វើឡើងក្នុងកិច្ចប្រជុំមួយ កាលពីថ្ងៃទី២៥ ខែមិថុនា ឆ្នាំ២០១៩ ជាមួយនឹងម្ចាស់ក្រុមហ៊ុនម៉ៅការសំណង់ក្នុងខេត្តព្រះសីហនុ និងមន្ត្រីនៃគណៈកម្មកាទាំងត្រួតពិនិត្យ ដើម្បីណែនាំមុននឹងចុះត្រួតពិនិត្យគុណភាពនិងលក្ខណៈបច្ចេកទេសនៃសំណង់ទាំងអស់ ដែលកំពុងសាងសង់នៅលើទឹកដីខេត្តព្រះសីហនុ។
លោករដ្ឋមន្ត្រី បានណែនាំដល់មន្ត្រីទាំងអស់ត្រូវត្រួតពិនិត្យការដ្ឋានសំណង់ទាំងអស់ ឲ្យបានត្រឹមត្រូវ ហើយមុននឹងសាងសង់ ត្រូវមានច្បាប់អនុញ្ញាត និងលិខិតបើកការដ្ឋាន ជាដើម។ លោក ក៏បានប្រាប់ម្ចាស់សំណង់ទាំងអស់ ឲ្យត្រៀមឯកសារទាក់ទិននឹងសំណង់របស់ខ្លួនផងដែរ ហើយមិនត្រូវមានទម្លាប់ហុចស្រោមសំបុត្រ ពេលគណៈកម្មការ ចុះទៅត្រួតពិនិត្យនោះទេ។ ប៉ុន្តែលោកមិនបានលើកឡើងពីការដាក់ពិន័យចំពោះមន្ត្រីដែលទទួលស្រោមសំបុត្រនោះឡើយ។
រដ្ឋមន្ត្រីដែនដី សង្កត់ធ្ងន់បែបនេះថា ៖«មន្ត្រីទាំងអស់ត្រូវបំពេញបេសកកម្ម គឺអនុវត្តតាមជំនាញ និងវិជ្ជាជីវៈប្រកបដោយក្រមសីលធម៌ឲ្យបានត្រឹមត្រូវ ដើម្បីទាក់ទាញវិនិយោគកាន់តែធំ កាន់តែច្រើន កាន់តែល្អថែមទៀត នៅក្នុងខេត្តព្រះសីហនុ»។
លើលសពីនេះ លោក ក៏បានអំពាវនាវដល់វិនិយោគិន កុំឲ្យមានការភិតភ័យ ព្រោះគណៈកម្មការចុះទៅនេះ មិនមែនបំភិតបំភ័យនោះទេ ប៉ុន្តែ វា ជាការគាំទ្រឲ្យអនុវត្តតាមបទដ្ឋានបច្ចេកទេសត្រឹមត្រូវ ធានាបរិមាណ និងគុណភាព។
គួរបញ្ជាក់ថា គណៈកម្មការត្រួតពិនិត្យគុណភាពសំណង់នេះ ត្រូវបានបង្កើតឡើង បន្ទាប់ពីកើតមានករណីបាក់រលំអគារកម្ពស់៧ជាន់នៅក្រុងព្រះសីហនុ កាលព្រឹកថ្ងៃទី២២ ខែមិថុនា ដែលបណ្ដាលឲ្យមនុស្ស២៨នាក់ស្លាប់ និងរងរបួស២៦នាក់។ គណៈកម្មការនេះ មានក្រុមការងារបច្ចេកទេសនិងជំនាញ៨ក្រុម៕
© រក្សាសិទ្ធិដោយ thmeythmey.com