នាយករដ្ឋមន្ត្រីនូវែលសេឡង់ លោកស្រី Jacinda Ardern នៅថ្ងៃទី២៧ មិថុនា បានដករដ្ឋមន្ត្រីលំនៅឋានចេញពីតំណែង និងបានតែងតាំងមន្ត្រីជាន់ខ្ពស់មួយក្រុម ដើម្បីដោះស្រាយវិបត្តិផ្ទះសម្បែងរបស់ប្រទេសនេះ។ ការដកមន្ត្រីអសមត្ថភាពនេះចេញ គឺជារុះរើសមាជិកគណៈរដ្ឋមន្ត្រីដំបូងបង្អស់របស់លោកស្រី ចាប់តាំងពីចូលកាន់អំណាចក្នុងឆ្នាំ២០១៧មក។
វ័យត្រឹម៣៨ឆ្នាំ លោកស្រី Jacinda Andern ទទួលបានប្រជាប្រិយភាពខ្លាំងនៅបរទេស ប៉ុន្តែរដ្ឋាភិបាលលោកស្រី ទទួលរងការរិះគន់យ៉ាងចាស់ដៃនៅក្នុងស្រុកដោយសារបរាជ័យក្នុងការសម្រេចតាមការសន្យា ជាពិសេសគម្រោងសាងសង់លំនៅឋានតម្លៃសមរម្យ។
តាមការចុះផ្សាយរបស់ទីភ្នាក់ងារព័ត៌មាន Reuters លោកស្រី Ardern បានតែងតាំងរដ្ឋមន្ត្រីថាមពល លោក Megan Woods ជារដ្ឋមន្ត្រីលំនៅឋានជំនួសឲ្យលោក Phil Twyford ។ អតីតរដ្ឋមន្ត្រីរូបនេះ ទទួលរងការរិះគន៉ពីសំណាក់ប្រជាជននូវែលសេឡង់ ក្នុងរយៈពេល ប៉ុន្មានខែចុងក្រោយនេះ ដ្បិតលោកបរាជ័យក្នុងការអនុវត្តគម្រោងរដ្ឋាភិបាល ដើម្បីកសាងផ្ទះ ដែលស្គាល់ថា KiwiBuild ។
លោករដ្ឋមន្ត្រីលំនៅឋាននូវែលសេឡង់ថ្មី Megan Woods នឹងដឹកនាំក្រុមដែលមានសមាជិក ៣នាក់ ដែលមានកាតព្វកិច្ចចាត់ចែងលើគម្រោងលំនៅឋានរបស់រដ្ឋាភិបាល។ ក្រុមនេះ គឺរួមមាន លោក Twyford អតីតរដ្ឋមន្ត្រីលំនៅ និងលោក Kris Faafoi រដ្ឋមន្ត្រីក្រសួងទូរគមនាគមន៍ និងប្រព័ន្ធផ្សព្វផ្សាយ។
ថ្លែងនៅក្នុងសន្និសីទព័ត៌មានស្តីពីការរុះរើសមាជិកគណៈរដ្ឋមន្ត្រីនេះ លោកស្រីនាយករដ្ឋមន្ត្រី Ardern គូសបញ្ជាក់ថា គម្រោង KiwiBuild ពុំមានដំណើការទៅមុខល្អ ឬលឿន ដូចអ្វីដែលរដ្ឋាភិបាលលោកស្រី សង្ឃឹម ឬ រំពឹងទុកសោះ។ លោកស្រី បន្តថា ការណ៍នេះ បញ្ជាក់ឲ្យឃើញថា បញ្ហាប្រឈមនានាក្នុងការដោះស្រាយវិបត្តិលំនៅឋាន គឺមានទំហំធំពេកសម្រាប់រដ្ឋមន្ត្រីតែម្នាក់។
«ដូច្នេះ ខ្ញុំ សម្រេចចិត្តដាក់កម្លាំងទេសរដ្ឋមន្ត្រីមួយក្រុម ដើម្បីផ្តល់ដង្ហើមដល់គម្រោងសាងសង់លំនៅឋានរបស់យើង ពោលគឺគម្រោង KiwiBuild ដើម្បីដោះស្រាយបញ្ហាភាពគ្មានផ្ទះសម្បែង»។ នេះជាការសង្កត់ធ្ងន់របស់លោកស្រី Ardern ។
សូមបញ្ជាក់ថា តម្លៃលំនៅឋានក្នុងប្រទេសនូវែលសេឡង់ ហក់ឡើងជាង ៥០ភាគរយ ក្នុងរយៈពេល ១០ឆ្នាំចុងក្រោយនេះ ហើយស្ទើរពីរដងក្នុងទីក្រុងដ៏ធំផុតរបស់ខ្លួន គឺទីក្រុង Auckland ដែលមានប្រជាជនរស់នៅ ១,៦៥ លាននាក់ (២០១៧) ខណៈប្រជាជននូវែលសេឡង់សរុប មានត្រឹមតែ ជាង ៤,៧៩លាននាក់ (២០១៧) ។
កន្លងទៅ រដ្ឋាភិបាលនូវែលសេឡង់ធ្លាប់បានសន្យាថា នឹងបង្កើតផ្ទះចំនួន ១០ម៉ឺនខ្នង តាមរយៈគម្រោង KiwiBuild ក្នុងអំឡុង ១០ឆ្នាំ។ ប៉ុន្តែគម្រោងនេះ ស្ថិតនៅគម្លាតឆ្ងាយពីការគ្រោងទុក ដ្បិតផ្ទះត្រឹមពីរបីរយខ្នងប៉ុណ្ណោះ ត្រូវបានសាងសង់៕