អាមេរិក ដាក់ទណ្ឌកម្មលើអតីតរដ្ឋមន្ត្រីអគ្គិសនីវ៉េណេស៊ុយអេឡាពីបទពុករលួយ

អន្តរជាតិ

អាមេរិក ដាក់ទណ្ឌកម្មលើអតីតរដ្ឋមន្ត្រីអគ្គិសនីវ៉េណេស៊ុយអេឡាពីបទពុករលួយ

28, Jun 2019 , 7:19 pm

រូបភាព

អតីតរដ្ឋមន្ត្រីអគ្គិសនីវេណេស៊ុយអេឡា លោក Luis Motta (ប្រភពរូប៖ AFP)

ដោយ:

អតីតរដ្ឋមន្ត្រីអគ្គិសនីវ៉េណេស៊ុយអេឡា លោក Luis Motta ត្រូវបានដាក់ក្រោមទណ្ឌកម្មអាមេរិកជុំវិញករណីអំពើពុករលួយ និងទទួលរងបទចោទពាក់ព័ន្ធនឹងការស៊ីសំណូក។ អតីតមន្ត្រីជាន់ខ្ពស់រូបនេះ ត្រូវបានប្រធានាធិបតីវ៉េណេស៊ុយអេឡា លោក នីកូឡាស់ ម៉ាឌុយរ៉ូ ដកតំណែង កាលពីខែមេសា ក្រោយពីប្រទេសអាមេរិកឡាទីនមួយនេះ ជួបបញ្ហាដាច់ភ្លើងទ្រង់ទ្រាយធំ។

ក្នុងសេចក្តីថ្លែងកាណ៍មួយនៅថ្ងៃទី ២៧ ខែមិថុនា ការិយាល័យគ្រប់គ្រងទ្រព្យសម្បត្តិបរទេសនៃក្រសួងរតនាគារអាមេរិក លើកឡើងថា ជំនួសឲ្យការប្រើតួនាទីរបស់ខ្លួនដើម្បីបម្រើប្រជាជនវ៉េណេស៊ុយអេឡា លោក Motta បម្រើតែប្រយោជន៍ខ្លួនឯងដោយខុសច្បាប់ និងបានរួមចំណែកក្នុងការផ្ទុះឡើងនៃវិបត្តិអគ្គិសនីក្នុងប្រទេសនេះ។

តាមការចុះផ្សាយរបស់ទីភ្នាក់ងារព័ត៌មាន Reuters ការសម្រេចចិត្តនេះ មានន័យថា ទ្រព្យនានាដែល លោកអតីតរដ្ឋមន្ត្រីអគ្គិសនី Motta កាន់កាប់ក្នុងទឹកដីសហរដ្ឋអាមេរិក នឹងត្រូវរាំងខ្ទប់។ ហើយម្យ៉ាងវិញទៀត ប្រជាជនអាមេរិក ក៏ត្រូវហាមឃាត់ពីការដោះដូរផ្នែកហិរញ្ញវត្ថុនានាជាមួយបុគ្គលរូបនេះផងដែរ។

បន្ថែមពីលោក Motta សហរដ្ឋអាមេរិក ក៏បានដាក់ទណ្ឌកម្មប្រឆាំងនឹងលោក Eustiquio Jose Lugo Gomez អតីតមន្ត្រីជាន់ខ្ពស់មួយរូប ទទួលបន្ទុកផ្នែកហិរញ្ញវត្ថុនៃក្រសួងអគ្គិសនីវ៉េណេស៊ុយអេឡាទៀតផង។

ក្នុងរយៈពេល១០ឆ្នាំចុងក្រោយនេះ ក្រុងវ៉ាស៊ីនតោន បានដាក់បញ្ចូលមន្ត្រីគ្រាក់ៗ និងអ្នកជំនួញវេណេស៊ុយអេឡាច្រើនជាង ១៥០នាក់ ក្នុងបញ្ជីខ្មៅរបស់ខ្លួន ដោយលើកហេតុផល រាប់ចាប់តាំងពី ការចូលរួមក្នុងការជួញដូរគ្រឿងញៀន អំពើពុករលួយ និងរំលោភសិទ្ធិមនុស្សជាដើម។

សូមបញ្ជាក់ថា វ៉េណេស៊ុយអេឡា មានបញ្ហាដាច់ភ្លើងទ្រង់ទ្រោយធំជាប្រវត្តិសាស្ត្រជាលើកដំបូង កាលពីថ្ងៃទី៧ ខែមីនា ដែលបានអូសបន្លាយអស់រយៈ៥ថ្ងៃពេញ។ បញ្ហាដាច់ភ្លើង ដែលមិនទៀងទាត់ និងរប៉េះរប៉ោះនេះ បន្តបង្កផលប៉ះពាល់ដល់ប្រទេស រួមមាន បង្អាក់សកម្មភាពនៃការផ្គត់ផ្គង់ចំណីអាហារ និងទឹក ការដឹកជញ្ជូន និងមន្ទីរពេទ្យជាដើម។ ក្នុងហេតុការណ៍នេះ មានការរាយការណ៍ថា មនុស្សស្លាប់ជាច្រើននាក់ថែមទៀតផង។

ពាក់ព័ន្ធនឹងការបញ្ហាដាច់ភ្លើងនេះ កន្លងទៅ លោក ម៉ាឌុយរ៉ូ បានចោទប្រកាន់លើសហរដ្ឋអាមេរិក និងក្រុមបក្សប្រឆាំងវ៉េណេស៊ុយអេឡាថា នៅពីក្រោយហេតុការណ៍នេះ ទោះបីជាអ្នកជំនាញជាច្រើន អះអាងថា ការជួសជុល និងរក្សាមិនបានល្អ ជាមូលហេតុក៏ដោយក្តី៕