កីឡាជាតិ
ជាតិ
កម្ពុជារំពឹងបានបទពិសោធល្អៗពីជើងឯកយុវជនអាស៊ាន និងសុំយោគយល់ចំពោះការខ្វះខាត
×![]()
លោក ស៊ុន ចាន់ថុល ប្រធានសហព័ន្ធខ្មែរកីឡាហែលទឹករំពឹងទទួលបានបទពិសោធល្អៗពីការធ្វើម្ចាស់ផ្ទះការប្រកួតកីឡាហែលទឹកជ្រើសរើសជើងឯកយុវជនអាស៊ីអាគ្នេយ៍ក្នុងការអភិវឌ្ឍន៍សមត្ថភាព ដើម្បីត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមនៅឆ្នាំ២០២៣។ ជាមួយគ្នានេះ លោកសុំការយោគយល់ពីប្រតិភូកីឡាមកពីបណ្តាប្រទេសទាំង៩ក្នុងតំបន់អាស៊ាន ចំពោះការខ្វះខាតសម្រាប់ការធ្វើម្ចាស់ផ្ទះនេះផងដែរ។ 
តាំងពីធ្វើម្ចាស់ផ្ទះការប្រកួតកីឡា Games Ganefo អាស៊ីលើកទី១នៅឆ្នាំ១៩៦៦ សហព័ន្ធខ្មែរកីឡាហែលពុំធ្លាប់ធ្វើជាម្ចាស់ផ្ទះការប្រកួតលក្ខណៈអន្តរជាតិនោះឡើយក្នុងរយៈពេលជាង៥០ឆ្នាំកន្លងមកនេះ។ ប៉ុន្តែនៅឆ្នាំ២០១៩នេះ សហព័ន្ធបានទទួលសិទ្ធិធ្វើជាម្ចាស់ផ្ទះការប្រកួតកីឡាហែលទឹកជ្រើសរើសជើងឯកយុវជនអាស៊ីអាគ្នេយ៍ ឡើងវិញដោយមានប្រតិភូមកពី១០ប្រទេសក្នុងតំបន់អាស៊ានចូលរួម។
លោក ស៊ុន ចាន់ថុល ប្រធានសហព័ន្ធខ្មែរកីឡាហែលទឹក ដែលធ្វើជាធិបតីក្នុងពិធីបើកការប្រកួតនេះជឿជាក់ថា ការធ្វើជាម្ចាស់ផ្ទះការប្រកួតលក្ខណៈអន្តរជាតិឡើងវិញនេះ គឺចៀសមិនផុតពីកំហុសឆ្គង ដែលកើតឡើងដោយអចេតនានោះឡើយ។ កត្តានេះហើយទើប លោក ស្នើសុំការយោគយល់ទុកជាមុនពីប្រតិភូកីឡាមកពីបណ្តាប្រទេសទាំងនោះ ក្នុងអំឡុងពេលប្រកួត និងស្នាក់នៅក្នុងកម្ពុជា។
រដ្ឋមន្ត្រីក្រសួងសាធារណការនិងដឹកជញ្ជូនរូបនេះចាត់ទុកការធ្វើម្ចាស់ផ្ទះការប្រកួតនៅពេលនេះ ជាប្រវត្តិសាស្ត្រថ្មីមួយទៀតនិងជាឱកាសក្នុងការបង្ហាញពីភាពរីកចម្រើនរបស់សហព័ន្ធខ្មែរកីឡាហែលទឹក។ ហើយវាជាឱកាសដើម្បីវាស់ស្ទង់កម្រិតសមត្ថភាពរបស់កីឡាករកីឡាការិនី និងមន្ត្រីអាជ្ញាកណ្តាលចៅក្រម ក៏ដូចជាឲ្យពួកគេបានសិក្សាពីបទពិសោធថ្មីៗ ដើម្បីអភិវឌ្ឍសមត្ថភាពផងដែរ។
«វាជាប្រវត្តិសាស្ត្ររបស់សហព័ន្ធខ្មែរកីឡាហែលទឹក ដែលបានធ្វើជាម្ចាស់ផ្ទះការប្រកួតលក្ខណៈអន្តរជាតិបែបនេះ បន្ទាប់ពីខកខានចាប់តាំងពីឆ្នាំ១៩៦៦ ដែលកម្ពុជាបានធ្វើម្ចាស់ផ្ទះ កីឡា Games Ganefo អាស៊ីលើកទី១។ ហេតុដូច្នេះ ខ្ញុំសូមការយោគយល់ និងអធ្យាស្រ័យចំពោះការខ្វះខាតក្នុងការរៀបចំ និងការទទួលបដិសណ្ឋារកិច្ចក្នុងកំឡុងពេលប្រកួត និងការស្នាក់នៅនៅកម្ពុជា។ យើងសង្ឃឹមថា សហព័ន្ធនឹងអាចរៀនសូត្របានច្រើនពីការរៀបចំនេះ»។ ការលើកឡើងបែបនេះរបស់លោក ស៊ុន ចាន់ថុល ក្នុងពិធីបើកការប្រកួតកីឡាជ្រើសរើសយុវជនអាស៊ីអាគ្នេយ៍នៅព្រឹកថ្ងៃទី២៨ មិថុនា នាពហុកីឡដ្ឋានជាតិមរតកតេជោ។
លោកបានបន្ថែមថា៖«ខ្ញុំពិតជាមានមោទនភាពក្រៃលែង ដែលបានកម្ពុជាធ្វើម្ចាស់ផ្ទះរៀបចំការប្រកួតជ្រើសរើសជើងឯកយុវជនអាស៊ីអាគ្នេយ៍លើកទី៤៣ឆ្នាំនេះ ដែលជាព្រឹត្តិការណ៍ថ្មីមួយទៀត ដើម្បីបង្ហាញមុខមាត់ និងការរីកចម្រើនរបស់កម្ពុជា»។
លោក ហែម គីរី អគ្គលេខាធិការសហព័ន្ធ បានបញ្ជាក់ពីគោលបំណងនៃព្រឹត្តិការណ៍នេះថា គឺដើម្បីពង្រឹងទំនាក់ទំនង រឹតចំណងមិត្តភាព សាមគ្គីភាព និងការស្វែងយល់ពីគ្នាទៅវិញទៅមករវាងបណ្តាប្រទេសក្នុងតំបន់អាស៊ាន ក៏ដូចជាដើម្បីពង្រឹងសន្តិភាព ស្ថិរភាព និងការអភិវឌ្ឍ និងដកស្រង់បទពិសោធន៍ពីគ្នាទៅវិញទៅមកជាដើម។
ការប្រកួតនេះមានកីឡាករកីឡាការិនីចូលរួមសរុបចំនួន៤០៦រូប ដែលមកពី១០ប្រទេសក្នុងតំបន់អាស៊ាន រួមមានម្ចាស់ផ្ទះកម្ពុជា ថៃ វៀតណាម ឡាវ មីយ៉ាន់ម៉ា សិង្ហបុរី ព្រុយណេ ហ្វីលីពីន ឥណ្ឌូណេស៊ី និងម៉ាឡេស៊ី។ សម្រាប់ការប្រកួតដែលធ្វើឡើងចន្លោះពីថ្ងៃទី២៨-៣០ ខែមិថុនានេះដែរ កម្ពុជាបានដាក់កីឡាករកីឡាការិនីចំនួន២០រូបឲ្យចូលរួម៕
Tag:
ហែលទឹក
ស៊ុន ចាន់ថុល
ហែម គីរី
© រក្សាសិទ្ធិដោយ thmeythmey.com
