ជាតិ
សង្គមជាតិ
នយោបាយជាតិ
សម្ដេច ស ខេង ៖ការវិនិយោគត្រូវរក្សាអត្តសញ្ញាណជាតិ
× ភ្នំពេញ៖ ពីពិធីតែងតែអភិបាលខេត្តព្រះសីហនុថ្មី នៅព្រឹកថ្ងៃទី២៩ មិថុនា សម្ដេច ស ខេង រដ្ឋមន្ត្រីក្រសួងមហាផ្ទៃ ស្នើឲ្យការវិនិយោគទាំងអស់នៅកម្ពុជា ជួយចូលរួមរក្សានូវអត្តសញ្ញាណជាតិខ្មែរ ដោយមិនត្រូវឲ្យបាត់បង់ឡើយ។
ថ្លែងចំពោះមុខថ្នាក់ដឹកនាំខេត្តព្រះសីហនុ សម្ដេច ស ខេង បានសង្កត់ធ្ងន់ថា គ្រប់បណ្ដាប្រទេសទាំងអស់ តែងតែចង់បានការវិនិយោគពីបរទេស ប៉ុន្តែការវិនិយោគនោះ ក៏ត្រូវតែគោរពនិងរក្សាអត្តសញ្ញាណជាតិរបស់ប្រទេសដែលជាម្ចាស់ផ្ទះដែរ។ ក្នុងន័យនេះរដ្ឋមន្ត្រីក្រសួងមហាផ្ទៃ ចង់សំដៅឲ្យអ្នកវិនិយោគទាំងអស់ ត្រូវលើកបដា ឬផ្លាកសម្គាល់ទីតាំងអាជីវកម្មនោះ ដោយសរសេរអក្សរខ្មែរខាងលើ មុននឹងសរសេរអក្សរអង់គ្លេស និងចិនជាដើម។ ក្រៅពីអក្សរខ្មែរ សម្ដេច ក៏ស្នើឲ្យអ្នកវិនិយោគទាំងអស់ មិនត្រូវធ្វើអ្វីដែលប៉ះពាល់ដល់វិស័យទេសចរណ៍ ដែលនាំឲ្យបាត់បង់អត្តសញ្ញាណជាតិខ្មែរឡើយ។
ក្នុងពិធីចូលកាន់តំណែងជាអភិបាលខេត្តព្រះសីហនុជាផ្លូវ របស់លោក គួច ចំរើន នៅថ្ងៃទី២៩ មិថុនានេះ ប្រមុខក្រសួងមហាផ្ទៃ បាននិយាយដូច្នេះថា៖«ត្រូវរក្សាដាច់ខាតឲ្យបាននូវអត្តសញ្ញាណជាតិ ក្នុងពេលវិនិយោគ ស្រូបយកការវិនិយោគនេះ។ គឺរក្សាបានដាច់ខាតនូវអត្តសញ្ញាណជាតិ ដើម្បីបង្កឱកាសឲ្យទេសចរ មិនមែនតែជនជាតិណាមួយទេ គឺជនជាតិចម្រុះពីក្រៅមក គេអាចចូលមកកម្ពុជា ដើម្បីកម្សាន្តងូតទឹកសមុទ្រ ឬក៏វិនិយោគលើវិស័យផ្សេងៗទៀត បានដូចគ្នា។ នេះគឺជាចំណុចសំខាន់ណាស់»។
បន្ថែមពីនេះ សម្ដេច ស ខេង ក៏ស្នើម្ចាស់ទីតាំងអាជីវកម្មផ្ដល់សេវាកម្មទេសចរណ៍ ត្រូវប្រកាន់យកគុណធម៌ សុជីវធម៌ និងសីលធម៌ខ្ជាប់ខ្លួន ដើម្បីបម្រើដល់ភ្ញៀវទេសចរណ៍ឲ្យបានត្រឹមត្រូវ។ ចំណែកបញ្ហាការពារ និងថែរក្សាបរិស្ថាន ក៏ជារឿងដែលមន្ត្រីអាជ្ញាធរទាំងអស់ត្រូវយកចិត្តដោះស្រាយ និងទប់ស្កាត់ផងដែរ។
Tag:
ស ខេង
គួច ចំរើន
អគារ
© រក្សាសិទ្ធិដោយ thmeythmey.com