ជាតិ
សង្គមជាតិ
សិល្បះ
លោក ប៉ាង រតនា៖ ស្នេហាទុំទាវមានលក្ខណៈពិសេសដែលយុវជនគួរយកគំរូតាម
× ភ្នំពេញ៖ ទាវ បានបង្ហាញពីការពិនិត្យពិចារណាយ៉ាងហ្មត់ចង់មុនជ្រើសរើស ទុំ មកធ្វើជាគូអនាគត។ ភាពស្មោះត្រង់និងភក្ដីភាពរវាងស្នេហាទុំនិងទាវ ដែលមិនមានអំណាចអ្វីមកបំបែកបាន សូម្បីតែសេចក្ដីស្លាប់។ ទាំងអស់នេះគឺជាលក្ខណៈពិសេសនៃស្នេហាទុំទាវ ដែលលោក ប៉ាង រតនា មន្ត្រីស្រាវជ្រាវនៃវិទ្យាស្ថានភាសាជាតិ នៃរាជបណ្ឌិតសភាកម្ពុជា លើកឡើងក្នុងបាឋកថានៅពុទ្ធសាសនបណ្ឌិត្យ កាលពីថ្ងៃទី២០ខែមិថុនាឆ្នាំ២០១៩។
លោក ប៉ាង រតនា ដែលជាមន្ត្រីស្រាវជ្រាវនៃវិទ្យាស្ថានភាសាជាតិ នៃរាជបណ្ឌិតសភាកម្ពុជា បានលើកឡើងពីលក្ខណៈពិសេសមួយចំនួននៃស្នេហាទុំទាវមកបង្ហាញសិក្ខាកាម ដែលភាគច្រើនជាសិស្សនិស្សិតនិងគរុសិស្សប្រមាណជា៧០នាក់។
មុនចូលដល់ស្នូលប្រធានបទ លោក រតនា បានបកស្រាយពីលក្ខណៈចិត្តសាស្ត្ររបស់មនុស្សដែលមានពីធម្មជាតិ ទៅលើទំនាក់ទំនងផ្លូវអារម្មណ៍។ បន្ទាប់មកលោកបានលើកយកសំណេររបស់អ្នកវិភាពអក្សរសិល្ប៍មួយចំនួនស្ដីពីស្នេហាទុំទាវ ត្រង់ចំណុចតិះដៀលស្នេហាមួយនេះ មកបង្ហាញសិក្ខាកាមដើម្បីជាការប្រៀបធៀប និងជាត្រីវិស័យក្នុងការវិភាគ។
លោក ប៉ាង រតនា បានលើកយកលក្ខណៈពិសេស៣ចំណុចក្នុងចំណោមច្រើនចំណុចទៀត មកបកស្រាយ។ ចំណុចទាំង៣នោះ ទី១និយាយពីរបៀបនៃការចាប់ផ្ដើមស្នេហារវាងទុំនិងទាវ ទី២ការគិតពិចារណាយ៉ាងហ្មត់ចត់របស់ទាវ មុនប្រគល់ក្ដីស្នេហ៍ឱ្យទុំ និងទី៣ ភាពបរិសុទ្ធនៃស្នេហាទុំទាវ (បានន័យថាភាពស្មោះត្រង់និងភក្ដីភាព)។
លោកបញ្ជាក់ដូច្នេះ៖« ក្រោយបានជួបទាវ ទុំបានដឹងខ្លួនច្បាស់ថាខ្លួនមិនអាចនៅក្នុងភេទជាសង្ឃបានទៀតឡើយ ទើបទុំមកសុំចៅអធិការសឹក។ ពេលចៅអធិការមិនព្រមសឹកឱ្យ ទើបទុំទៅសឹកដោយខ្លួនឯងនៅជិតដំបូក។ នៅក្នុងកំណាព្យរឿងទុំទាវ មានបង្ហាញច្រើនវគ្គថាទុំបានព្យាយាមសារភាពស្នេហ៍ទៅកាន់ទាវ ប៉ុន្តែទាវមិនជឿឡើយ។ សេចក្ដីក្នុងកំណាព្យ ទាវព្យាហាមរកវិធីសាស្ត្រ ធ្វើឱ្យប្រាកដថាទុំពិតជាស្រឡាញ់ខ្លួនស្មោះ ទើបនាងព្រមប្រគល់សេចក្ដីស្នេហាឱ្យទុំ។ ទោះបីទុំទៅក្នុងវាំងដែលមានមនុស្សស្រីស្អាតៗជាច្រើន តែទុំមិនបានចាប់អារម្មណ៍ឡើយ។ ទុំតែងតែនឹករឭកដល់ទាវជានិច្ច។ ចំណែកទាវវិញទោះបីជាម៉ឺនងួនមានទ្រព្យសម្បត្តិច្រើនក៏នាងមិនចាប់អារម្មណ៍ សូម្បីព្រះរាជាជាស្ដេចផែនដីក៏នាងនៅតែស្មោះនិងទុំ។ ពួកគេហ៊ានស្លាប់ជាមួយគ្នា។ ទាំងនេះបង្ហាញពីភក្ដីភាពនៃស្នេហារបស់ពួកគេ»។
លោក ប៉ាង រតនា អះអាងថានៅសម័យបច្ចុប្បន្ននេះពិតជាកម្រមានស្នេហាណាដែលបរិសុទ្ធដូចស្នេហាទុំទាវណាស់។ លោកថាយុវជនគួរតែយកគំរូពីភាពស្មោះត្រង់និងភក្ដីភាពរបស់ទុំនិងទាវ។
ទោះជាយ៉ាងណា មន្ត្រីស្រាវជ្រាវនៃវិទ្យាស្ថានភាសាជាតិ នៃរាជបណ្ឌិត្យសភាកម្ពុជារូបនេះ បញ្ជាក់ថា គ្រប់ស្នាដៃអក្សរសិល្ប៍ទាំងអស់តែងតែមានចំណុចវិជ្ជមាន និងចំណុចអវិជ្ជមាន។ ប៉ុន្តែសម្រាប់លោក គឺលើកតែលក្ខណៈពិសេសនៃស្នេហាទុំទាវមកបង្ហាញតែប៉ុណ្ណោះ ក្នុងថ្ងៃធ្វើបាឋកថាកាលពីថ្ងៃទី២០នោះ។ លោក ប៉ាង រតនា ថាអ្នកអានស្នាដៃអក្សរសិល្ប៍មានសិទ្ធវិភាគ រកចំណុចល្អ និងមិនល្អ ដើម្បីយកមកធ្វើជាប្រយោជន៍សម្រាប់ខ្លួនឯង។
សូមបញ្ជាក់ថា នេះគ្រាន់តែជាការវិភាគរបស់លោក ប៉ាង រតនា មន្ត្រីស្រាវជ្រាវនៃវិទ្យាស្ថានភាសាជាតិ នៃរាជបណ្ឌិតសភាកម្ពុជាតែប៉ុណ្ណោះ។ មានអ្នកស្រាវជ្រាវ និងអ្នកនិពន្ធមួយចំនួន ក៏បានមើលឃើញពីចំណុចអវិជ្ជមាននៃស្នេហាក្នុងស្នាដៃអក្សរសិល្ប៍នេះដែរ៕
Tag:
ប៉ាង រតនា
អក្សរសាស្ត្រ
អក្សរសិល្ប៍
ពុទ្ធសាសនបណ្ឌិត្យ
ទុំទាវ
© រក្សាសិទ្ធិដោយ thmeythmey.com