លោក ប៉ាង រតនា៖ ទាវបង្ហាញពីការពិចារណាល្អិតល្អន់មុនជ្រើសរើសគូស្រករ

ជាតិ

បទយកការណ៍ / បទសម្ភាសន៍

លោក ប៉ាង រតនា៖ ទាវបង្ហាញពីការពិចារណាល្អិតល្អន់មុនជ្រើសរើសគូស្រករ

29, Jun 2019 , 9:39 pm

រូបភាព

ដោយ: ប៉ូ សាគុន

ភ្នំពេញ៖ លើកយកតែចំណុចភក្ដីភាព និងសេចក្ដីស្មោះត្រង់ នៃស្នេហាទុំទាវ មកវិភាគដើម្បីរំលេចឱ្យឃើញពីភាពបរិសុទ្ធនៃស្នេហាមួយនេះ។ មុនពេល ទាវ សម្រេចចិត្តជ្រើសរើសទុំមកធ្វើជាគូជីវិត នាងបានបង្ហាញពីការពិចារណាយ៉ាងល្អិតល្អន់ តាមរយៈអត្ថបទកំណាព្យរឿងស្រាប់។ ទាំងនេះគឺជាការវិភាគរបស់លោក ប៉ាង រតនា មន្ត្រីស្រាវជ្រាវនៃវិទ្យាស្ថានភាសាជាតិ នៃរាជបណ្ឌិតសភាកម្ពុជា។

តាមពិតទៅអក្សរសិល្ប៍រឿង ទុំទាវ កន្លងមានការវិភាគផ្សេងៗគ្នា។ ប៉ុន្តែសម្រាប់លោក ប៉ាង រតនា ច្បិចយកតែចំណុចស្នេហាភក្ដីរបស់ទុំនិងទាវយកមកបង្ហាញតែប៉ុណ្ណោះ។

ដើម្បីជ្រាបច្បាស់ពីការវិភាគរបស់លោក ប៉ាង រតនា តទៅនេះសូមស្ដាប់បទសម្ភាសរបស់កញ្ញា ប៉ូ សាគុន នៃសារព័ត៌មានថ្មីៗ ដូចតទៅ៖

លោក ប៉ាង រតនា មន្ត្រីស្រាវជ្រាវនៃវិទ្យាស្ថានភាសាជាតិ នៃរាជបណ្ឌិតសភាកម្ពុជា មិនបានវិភាគរឿងទាំងមូលឡើយ ប៉ុន្តែលោកវិភាគតែចំណុចនៃការបង្កើតស្នេហា ដំណាក់កាលពិចារណារកឱ្យឃើញពីជម្រៅចិត្តគូភាគី និងដំណាក់កាលថែរក្សាស្នេហាប៉ុណ្ណោះ។

លោក ប៉ាង រតនា ថាស្នេហាទុំទាវ គឺជាស្នេហាដ៏បរិសុទ្ធ។ ទាវបានបង្ហាញដល់នារីគ្រប់រូបក្នុងការគិតពិចារណាដោយល្អិតល្អន់មុនសម្រេចចិត្តជ្រើសរើសបុរសណាម្នាក់មកធ្វើជាគូជីវិត។ ក្នុងអត្ថបទកំណាព្យរឿង ទាវ មិនបានយល់ព្រមភ្លាមៗ ឬយល់ព្រមក្នុងរយៈពេលគិតពិចារណាខ្លីឡើយ ចំពោះការសុំស្នេហ៍របស់ ទុំ ។ ប៉ុន្តែនាងបានព្យាយាមពិសោធន៍រហូតបានឃើញច្បាស់ថា ទុំ ជាបុរសពិតហើយ ទើបនាងហ៊ានប្រគល់ក្ដីស្នេហ៍ឱ្យ។ គូស្នេហ៍មួយគូនេះ បានបង្ហាញពីភាពស្មោះត្រង់ឱ្យគ្នាទៅវិញទៅមក។ ស្នេហារបស់ពួកគេធំធេងដែលមិនមានអំណាចអ្វីមកបំបែកបាន សូម្បីតែសេចក្ដីស្លាប់៕