អន្តរជាតិ
នយោបាយអន្តរជាតិ
×![]()
ការអធិប្បាយរបស់ប្រធានាធិបតីអាមេរិក លោក ដូណាល់ ត្រាំ ក្នុងអំឡុងពេលនៃដំណើរទស្សនកិច្ចចូលរួមប្រជុំកំពូលក្រុមG20 ពាក់ព័ន្ធនឹងទំនាក់ទំនងពាណិជ្ជកម្មជាមួយនឹងចិន និងវៀតណាម កំពុងតែក្លាយជាក្តីបារម្ភសម្រាប់វៀតណាម ហើយក៏ក្លាយជាសំណួរមួយថាតើអាមេរិក ពិតជាចង់ធ្វើសង្គ្រាមពាណិជ្ជកម្មជាមួយនឹងវៀតណាម ដូចជាកំពុងតែធ្វើជាមួយនឹងចិនឬយ៉ាងណា?
តាមរយៈកិច្ចសម្ភាសន៍ជាមួយនឹងសារព័ត៌មាននៅថ្ងៃ២៦ មិថុនា លោកប្រធានាធិបតី ដូណាល់ ត្រាំ បានឲ្យដឹងពីផលប៉ះពាល់ និងលទ្ធផលនៃសង្គ្រាមពាណិជ្ជកម្មរវាងអាមេរិក និងចិន ដោយលោក អះអាងថា សេដ្ឋកិច្ចរបស់ចិន កំពុងតែធ្លាក់ចុះ បន្ទាប់ពីរដ្ឋបាលរបស់លោក បានដំឡើងពន្ធជាបន្តបន្ទាប់ទៅលើការនាំចូលរបស់ចិន។ នេះបើយោងតាមការចុះផ្សាយរបស់សារព័ត៌មាន The Guardian។
អ្វីដែលគួរឲ្យកត់សម្គាល់នោះ តាមប្រភពព័ត៌មានដដែលនោះ ជាមួយនឹងការលើកឡើងពីវិវាទពាណិជ្ជកម្មរវាងអាមេរិក និងចិន លោកប្រធានាធិបតី ត្រាំ ក៏បានពន្លិចពីគោលដៅដំឡើងពន្ធនាំចូលលើរដ្ឋអាស៊ីអាគ្នេយ៍វៀតណាម ដូចជាចិនទៀតផង។ លោកប្រធានាធិបតី ហាក់ដូចជាមិនពេញចិត្តចំពោះគោលនយោបាយពាណិជ្ជកម្មវៀតណាមលើក្រុមហ៊ុនអាមេរិក ដែលកំពុងតែវិនិយោគនៅទីនោះ។
តាម The Guardian លោកប្រធានាធិបតី បានលើកឡើងយ៉ាងដូច្នេះថា៖« មានក្រុមហ៊ុនជាច្រើន កំពុងតែឆ្ពោះទៅកាន់វៀតណាម ក៏ប៉ុន្តែ វៀតណាម បានគេងចំណេញលើយើង អាក្រក់ជាងអ្វីដែលចិន បានធ្វើទៅទៀត។ នឹងមានរឿងបន្តបន្ទាប់កើតឡើងនៅទីនោះ»។
ឆ្លើយតបនឹងការលើកឡើងនេះ អ្នកនាំពាក្យក្រសួងការបរទៀតណាម លោកស្រី Lê Thị Thu Hằng នៅថ្ងៃ២៧ មិថុនា តាមរយៈសន្និសីទសារព័ត៌មានប្រចាំ បានអះអាងថា វៀតណាម ពិតជាផ្តល់តម្លៃលើទំនាក់ទំនង និងភាពជាដៃគូគ្រប់ជ្រុងជ្រោយជាមួយនឹងអាមេរិក។ លោកស្រី លើកឡើងថា ចំណងវៀតណាម-អាមេរិក បានមានភាពល្អប្រសើរច្រើន រួមទាំងលើការវិនិយោគ និងពាណិជ្ជកម្ម។ នេះបើយោងតាម Vietnam News។
អ្នកនាំពាក្យរូបនេះ ក៏បានគូសបញ្ជាក់ផងដែរថា វៀតណាម បានប្រឹងប្រែងកែលម្អតុល្យភាពពាណិជ្ជកម្មរវាងប្រទេសទាំងពីរ តាមរយៈការបង្កើនការនាំចេញផលិតផលអាមេរិក ដែលជាតម្រូវការចាំបាច់របស់វៀតណាម, ធ្វើឲ្យមានភាពល្អប្រសើរលើបរិយាកាសវិនិយោគ, បង្កើតលក្ខខណ្ឌអនុគ្រោះកាន់តែច្រើនសម្រាប់ក្រុមហ៊ុនអាមេរិក ដែលចង់ប្រតិបត្តិការនៅវៀតណាម ក៏ដូចជាជំរុញក្រុមហ៊ុនវៀតណាមឲ្យវិនិយោគនៅអាមេរិកដូចគ្នា។
លោកស្រីអ្នកនាំពាក្យ បានបន្តទៀតថា វៀតណាម ពិតជាចង់លើកកម្ពស់ចំណងសេដ្ឋកិច្ច-ពាណិជ្ជកម្ម-វិនិយោគ ដោយសេរី និងតម្លាភាពជាមួយនឹងអាមេរិក ដោយឈរលើគោលការណ៍គ្រឹះផលប្រយោជន៍ទៅវិញទៅមក៕
Tag:
ចិន
អាមេរិក
វៀតណាម
© រក្សាសិទ្ធិដោយ thmeythmey.com
